އާސަންދަ ހަމަޖައްސައިދޭނެ ކަމަށް ބުނެ، ގެއަކަށް ގެންގޮސް ފޭރެން މަސައްކަތްކޮށް ގަލަމަކުން ބިރުދެއްކިކަމުގެ ތުހުމަތުގައި ފުލުހުން މީހަކު ހައްޔަރުކޮށްފިއެވެ.
މި މައްސަލައިގައި ތުުހުމަތުކުރެވެނީ 41 އަހަރުގެ ދިވެހި ފިރިހެނެއްގެ މައްޗަށެވެ.
އެ މީހާ ހައްޔަރުކޮށް، އިއްޔެ ވަނީ ބަންދާ މެދު ގޮތެއް ނިންމަން ކްރިމިނަލް ކޯޓަށް ހާޒިރުކޮށްފައެވެ. ބަންދު އަމުރުން އެނގޭ ގޮތުގައި އެ މީހާ ވަނީ ޖުމްހޫރީ މައިދާން ކައިރީން މީހަކާ ދިމާވެގެން އާސަންދަ ހަމަޖައްސައިދޭނެ ކަމަށް ބުނެ ފިނިހިޔާ ގޯޅީގައި ހުރި ގެއަކަށް ވައްދައިފައެވެ.
އެއަށް ފަހު ފޯނާއި ފައިސާ އަތުލަން މަސައްކަތްކުރި ކަމަށާއި އަދި، އަތުގައި އޮތް ގަލަމުން ކަރުގައި ޖައްސައި، ހަޅޭ ނުލެވުމަށް ބުނެ ބިރުދެއްކި ކަމަށް ކޯޓު އަމުރުގައިވެއެވެ.
މި މައްސަލައިގައި ތުހުމަތުކުރެވޭ މީހާއަކީ ފޭރުމުގެ ކުށުގެ ރިކޯޑެއް އޮތް މީހެކެވެ.
އެހެންވެ، ކްރިމިނަލް ކޯޓުން އިއްޔެ ވަނީ އެ މީހާގެ ބަންދަށް 15 ދުވަސް ޖަހައިފައެވެ. އޭނާގެ ބަންދުގެ މުއްދަތު ހަމަވާނީ މި މަހު 26 އަށެވެ.