ހިންދީ ސިނަމާގެ ކުރީގެ ބަތަލާ މީނާ ކުމާރީގެ ލޯބީގެ ހަޔާތުގެ މައްޗަށް ބިނާކޮށް ފިލްމެއް އުފައްދަން ނިންމާފައިވާ ކަމަށް ރިޕޯޓުތައް ބުނެފިއެވެ.
"ކަމަލް އޯރް މީނާ"ގެ ނަމުގައި އުފައްދާ މި ފިލްމު ބިނާކޮށްފައިވަނީ މީނާ ކުމާރީ ގިނަ ދުވަސްތަކެއް ވަންދެން ލޯބީގެ ގޮތުން ގުޅިގެން އުޅުމަށް ފަހު ޒަވާޖީ ހަޔާތެއް ފެއްޓި ފިލްމު ޑައިރެކްޓަރު އަމްރޯހީގެ މެދުގައި އުފެދުނު ލޯބީގެ ހާދިސާތަކުގެ މައްޗަށެވެ.
މި ފިލްމުގެ ޑައިރެކްޓަރަކީ މަގުބޫލު ފިލްމު ކަމަށްވާ "ހިޗްކީ' އަދި އާމިރު ޚާންގެ ދަރިފުޅު ޖުނައިދު ޚާން ފިލްމީ ދާއިރާއަށް ތަޢާރަފުވި "މަހާރާޖް"ގެ ޑައިރެކްޓަރު ސިދާތު ޕީ މަލްހޯތްރާއެވެ.
މި ފިލްމުގައި ބޮޑަށް ދައްކުވައިދޭނީ ހިންދީ ސިނަމާގައި މަޝްހޫރުކަން ހޯދި 1973ގެ ފިލްމު "ޕަކީޒާ" އުފެއްދި ދުވަސްވަރު މީނާ ކުމާރީއާއި ކަމަލާ ދެމެދު އުފެދުނު ލޯބީގެ ގުޅުމުގެ ހާދިސާތަކެވެ.
މީނާ ކުމާރީ އަދި ކަމަލް އަމްރޯހީ--ފޮޓޯ/ބޮލިވުޑްހަންގާމާ
ކަމަލާއި މީނާގެ ލޯބީގެ ގުޅުން އުފެދުނީ މީނާ ކުމާރީގެ އުމުރުން އެންމެ 18 އަހަރުގައެވެ. އޭރު ކަމަލަކީ ކައިވެނިކޮށް ކުދިން ވެސް ލިބިފައިވާ މީހެކެވެ. މި ފިލްމު އުފެއްދުމުގައި އިސްކޮށްހުރި ކަމަލްގެ ކާފަ ދަރިފުޅު ބިލާލް އަމްރޯހީ މީޑިއާއަށް މައުލޫމާތު ދެމުން ބުނީ ކެމެރާގެ ފުރަގަހުގައި ހިނގާދިޔަ މަޝްހޫރު ލޯބީގެ ވާހަކަ ބެލުންތެރިންނަށް ގެނެސްދެވޭތީ އެކަމާ އުފާކުރާ ކަމަށެވެ.
ކާފަ ކަމަލަކީ ހިންދީ ސިނަމާގެ އެންމެ މަގުބޫލު އެއް ޑައިރެކްޓަރު ކަމަށާއި މީނާ ކުމާރީއާއި ކަމަލްގެ ވާހަކަ ފެށުނު ގޮތާއި ނިމުނު ގޮތް ބެލުންތެރިންނަށް އެނގުމަކީ މުހިއްމު ކަމެއް ކަމަށް ބިލާލް ވަނީ ބުނެފައެވެ. މި ފިލްމުގައި ކަމަލް މީނާ ކުމާރީއަށް އަމިއްލަ އަތުން ލިޔެފައިވާ 500އަށް ވުރެ ގިނަ ލޯބީގެ ސިޓީއާއި ޖާނަލް ފެންނާނެއެވެ.
މި ފިލްމުގެ ކާސްޓުންނަކީ ކޮން ބައެއްކަމާއި ފިލްމުގެ މަސައްކަތް ފެށޭނެ ތާރީޚެއް އަދި އިއުލާނެއް ނުކުރެއެވެ.