ކާމިޔާބު ގިނަ ރޮމޭންޓިކް ކޮމެޑީ ފިލްމުތައް އުފައްދާފައިވާ ޑައިރެކްޓަރު ޑޭވިޑް ދަވަން ދެން އުފައްދާ ފިލްމަށް ވަރުން ދަވަން އަދި ބަތަލާ ޕޫޖާ ހޭގް ސޮއިކޮށްފިއެވެ.
މި ދެތަރިން އެކީގައި ފުރަތަމަ ފަހަރަށް މަސައްކަތްކުރާ މި ފިލްމަށް ވަގުތީ ގޮތުން ދެވިފައިވާ ނަމަކީ "ޔޭ ޖަވާނީ ތޯ އިޝްގް ހޯނާ ހޭ"އެވެ. ވަރުން ދަވަންއާ އެކު ޕޫޖާ ނަގާފައިވާ ފޮޓޯއެއް އިންސްޓަގްރާމްގައި ހިއްސާ ކުރަމުން ބަތަލާ ބުނެފައި ވަނީ ވަރުންއާ އެކު ސްކްރީނުން ފެނުމަކީ ހުވަފެނެއް ހަގީގަތަކަށްވުން ކަހަލަ ކަމެއް ކަމަށެވެ.
ވަރުންއާ އެކު ފިލްމުގެ ދެވަނަ ޝެޑިއުލްގެ ޝޫޓިން ތެރޭ ފޮޓޯއެއް އަނެއްކާ ވެސް ވަރަށް އަވަހަށް ޕޯސްޓު ކުރާނެ ކަމަށް ބަތަލާ ވަނީ އިންސްޓަގްރާމްގައި ބުނެފައެވެ.
ބޮލީވުޑްގެ ތަރިން ކަމަށްވާ ވަރުން ދަވަން އަދި ޕޫޖާ ހޭގް--ފޮޓޯ/ބޮލީވުޑްހަންގާމާ
މި ފިލްމާ ބެހޭ ތަފުސީލު މިހާތަނަށް މީޑިއާއާ ހިއްސާކޮށްފައި ނެތް ނަމަވެސް މި ފިލްމަކީ ވެސް ޑޭވިޑްގެ އެހެން ރޮމޭންޓިކް ކޮމެޑީ ފިލްމުތަކަށް ދޫނުކުރާނެ ފެންވަރު ރަގަޅު ފިލްމަކަށް ވާނެ ކަމަށް ރިޕޯޓުތައް ބުނެއެވެ.
ޑޭވިޑް ދަވަންގެ މިފަހުން ރިލީޒްވި މަގުބޫލު ފިލްމުތަކުގެ ތެރޭ "މޭ ތެރަ ހީރޯ"، "ޖުޅްވާ 2" އަދި "ކޫލީ ނަމްބަރު 1" ހިމެނެއެވެ. މި ތިން ފިލްމަކީ ވެސް ވަރުން ލީޑް ރޯލް ކުޅެފައިވާ ފިލްމުތަކެކެވެ.
ސައުތު ސިނަމާއިން ބޮޑު މަޝްހޫރުކަމެއް ހޯދުމަށްފަހު ބޮލީވުޑްގައި މިހާރު މަސައްކަތް ކުރަމުން އަންނަ ބަތަލާ ޕޫޖާގެ ކުރިއަށް ހުރި އިތުރު ފިލްމުތަކުގެތެރޭ އެކްޝަން ތުރިލާ "ދޭވާ"، ސައުތު ސިނަމާގެ ދެ ފިލްމު ކަމަށްވާ "ސޫރިޔާ 44" އަދި "ތަލަޕަތީ 69" ހިމެނެއެވެ.
ވަރުން ދަވަންގެ އެންމެ އަވަހަށް ރިލީޒްވާނެ ފިލްމަކީ މި މަހުގެ 25 ވަނަ ދުވަހު ސިނަމާތަކަށް ގެންނަ ފިލްމު "ބޭބީ ޖޯން"އެވެ.