އެމެރިކާގައި 2008ވަނަ އަހަރު 19 އަހަރުގެ ފިރިހެނެއްގެ ގަޔަށް ބަޑިޖަހާ މަރާލި މައްސަލައެއްގައި ކުރި ގޯސް ހުކުމަކުން 10 އަހަރު ޖަލުގައި އޮތް މީހަކަށް ބަދަލުގެ ގޮތުގައި 50 މިލިއަން ޑޮލަރު ދޭން ޖެހިއްޖެއެވެ.
ޢުމުރުން 34 އަހަރުގެ މާސެލް ބްރައުން ނަމަކަށް ކިޔާ މި މީހާގެ މައްޗަށް 35 އަހަރުގެ ޖަލު ހުކުމެއް ކުރީ އެ ކުށުގައި ބައިވެރިވިކަމުގެ ތުހުމަތު ސާބިތުވީކަމަށް ނިންމައެވެ.
ނަމަވެސް ހުކުމުން 10 އަހަރު ތަންފީޒުކޮށްފައިވަނިކޮށް 2018 ވަނަ އަހަރު އޭނާ ވަނީ މިނިވަންކޮށް، ދައުވާތައް ބޭރުކޮށްލައިފައެވެ.
ޗިކާގޯގައި ހުންނަ އެމެރިކާގެ ޑިސްޓްރިކްޓް ކޯޓުގައި ދެ ހަފުތާގެ މުއްދަތަކަށް ކުރިއަށްގެންދިޔަ އަޑުއެހުންތަކަށްފަހު އެ ކޯޓުގެ ޖޫރީން އެ ނިންމުން ނިންމީ، ފުލުހުން ހެކި އޮޅުވާލައި، ދޮގު އިއުތިރާފަކަށް އިއުތިރާފުވުމަށް ބްރައުންއަށް މަޖުބޫރުކޮށްފައިވާކަން އެނގުމުންނެވެ.
މީގެ އިތުރުން، 30 ގަޑިއިރަށްވުރެ ގިނައިރު ވަންދެން ސުވާލުކުރާ ކޮޓަރިއެއްގައި ބަންދުކޮށް، ބްރައުންއަށް ކާބޯތަކެތި ނުދީ، ތަކުރާރުކޮށް ފޯނު ކޯލަކަށް އެދުމުން ވެސް އެ ކަމަށް ހުރަސްއަޅައި، ނިދަން މަސައްކަތްކުރުމުން އެ ކަމަށް ވެސް ހުރަސް އަޅާފައިވާ ކަމަށް ވެސް ވަނީ ލޯފާމް ލޯވީ އެންޑް ލޯވީން ބުނެފައެވެ.
މާސެލް ބްރައުން (ކ) އޭނާގެ ވަކީލުންގެ ޓީމުގެ މެމްބަރަކާ އެކު--ފޮޓޯ/ނިއުޔޯކްޓައިމްސް
ކުށަށް އިއުތިރާފު ނުވެއްޖެ ނަމަ ދިގު މުއްދަތަކަށް ބްރައުން ޖަލަށްލާނެކަމުގެ އިންޒާރު ވެސް ފުލުހުން ދިން ކަމަށާއި ބްރައުންއަށް އެހީތެރިވުމަށް އޭނާގެ މަންމަ ފުލުސް އޮފީހަށް ދިއުމުން މަންމައާއި ވަކީލު އަނބުރާ ފޮނުވާލާފައިވާ ކަމަށް ޝަރީއަތުގައި ބުންޏެވެ.
މިއީ އެމެރިކާގެ ތާރީޚުގައި ވެސް ނުހައްގުން މީހެއްގެ މައްޗަށް ކުށެއް ސާބިތުކުރުމަށް އިއުތިރާފްވާން މަޖުބޫރުކޮށް، އެ ކަން ފާހަގަވުމުން އޭގެ ބަދަލުގައި ގޮތުގައި މިހާ ބޮޑު އަދަދެއް މީހަކަށް ދެވުނު ފުރަތަމަ ފަހަރެވެ.