ޚިދުމަތުން ދުރަށްދާންޖެހިފައިވާ ޚިދުމަތްތެރިންނާއި، ދާއިމީ ވަޒީފާއަށް ނުކުތުމަށް އުޒުރުވެރިވާ ފަންނީ އަދި އިދާރީ ޚިދުމަތްތެރިންގެ ދަފުތަރެއް އެކުލަވާލައި ރަޖިސްޓާ ވުމުގެ ފުރުސަތު ސަރުކާރުން ހުޅުވާލައިފިއެވެ.
މަތީ ތައުލީމާ ބެހޭ ވުޒާރާއިން ބުނީ މި ދަފުތަރަކީ ޚިދުމަތުން ދުރަށްދާންޖެހިފައިވާ ޚިދުމަތްތެރިންނާއި، ދާއިމީ ވަޒީފާއަށް ނުކުތުމަށް އުޒުރުވެރިވާ ފަންނީ އަދި އިދާރީ ޚިދުމަތްތެރިން އަނބުރާ ޚިދުމަތަށް ނުކުތުމުގެ މަގު ތަނަވަސްކޮށްދިނުމަށް އެކަށައަޅާފައިވާ ޚާއްސަ ސިޔާސަތު ތަންފީޒު ކުރުމަށްޓަކައި އެކުލަވާލި ދަފުތަރެއް ކަމަށެވެ.
އެ ވުޒާރާއިން އެކުލަވާލައިފައިވާ މި ދަފުތަރުގައި ރަޖިސްޓްރީވުމުގެ ފުރުސަތު ހުޅުވާލާފައިވަނީ އަންނަ އަހަރުގެ ސެޕްޓެމްބަރު މަހުގެ ނިޔަލަށެވެ.
އެ ވުޒާރާއިން ވަނީ މި ދަފުތަރުގައި ރަޖިސްޓްރީވުމަށް ޝައުގުވެރިވާ މީހުން ގޫގަލް ފޯމެއް ފުރިހަމަ ކުރުމަށްފަހު ރަޖިސްޓަރީ ކުރެވޭނެ ކަމަށް ބުނެފައެވެ. އަދި "ޚިދުމަތުން ދުރަށްދާންޖެހިފައިވާ ޚިދުމަތްތެރިންނާއި، ދާއިމީ ވަޒީފާއަށް ނުކުތުމަށް އުޒުރުވެރިވާ ފަންނީ އަދި އިދާރީ ޚިދުމަތްތެރިން ޚިދުމަތަށް ނެރުމުގެ އުޞޫލު 2024" ސިވިލް ސާވިސް ކޮމިޝަނުގެ ވެބްސައިޓް މެދުވެރިކޮށް ލިބެން ހުންނާނެ ކަމަށް އެ ވުޒާރާއިން ވަނީ ބުނެފައެވެ.
އެ ދަފުތަރާ ގުޅޭ އިތުރު މަޢުލުމާތު އެ ވުޒާރާގެ ނަމްބަރު 3026930 ނުވަތަ 3026951އަށް ގުޅުމަށް އަދި [email protected] އަށް އީމެއިލް ކުރުމަށް އެ ވުޒާރާޢިން ވަނީ އެދިފައެވެ.
މި ސަރުކާރުން އަންނަނީ ދިވެހި ދައުލަތުގެ ވަޒީފާތަކުން މުސްކުޅިކޮށްފައިވާ މީހުންނާއި އުމުރުން 65 އަހަރު ފުރިފައިވާ މީހުންގެ ތެރެއިން ވަޒީފާގައި ދެމި ތިބުމަށް އެދޭ މީހުންނަށް، އުމުރުން 75 އަހަރު ވަންދެން ވަޒީފާގައި ދެމިހުރުމުގެ ފުރުސަތު ފަހި ކޮށްދިނުމުގެ މަސައްކަތް ވެސް ކުރަމުންނެވެ.