މޯލްޑިވްސް ނެޝަނަލް ޔުނިވާސިޓީ (އެމްއެންޔޫ)ގައި ހުންނަ މެޑިކަލް ސްކޫލްގައި ކިޔަވަން، ބޭރުގެ 500 ދަރިވަރަކަށް ފުރުސަތު ދިނުމަށް އެދި ގައުމަކުން ރިކުއެސްޓް ލިބިފައިވާ ކަމަށް ހަޔާ އެޑިއުކޭޝަން މިނިސްޓްރީން މިއަދު ބުނެފިއެވެ.
މި ކަމާ ގުޅޭ ގޮތުން "ސަން"އަށް މައުލޫމާތު ދެއްވަމުން ހަޔާ އެޑިއުކޭޝަން މިނިސްޓްރީގެ ސްޓޭޓް މިނިސްޓަރު ޑރ. އަބްދުﷲ ނަޒީރު ވިދާޅުވީ ސަރުކާރުގެ ވިޒިޓާ އިކޮނަމީގެ ދަށުން ބޭރު ގައުމުތަކުގެ ދަރިވަރުން ރާއްޖޭގައި ކިޔެވުމަށް ފެސިލިޓޭޓް ކޮށްދިނުމަށް ހަމަޖެހިފައިވާ ކަމަށެވެ. މި ގޮތުން ތިން ދާއިރާއަކުން ބޭރުގެ ގައުމުތަކުގެ ދަރިވަރުންގެ ޑިމާންޑް އޮތް ކަމަށް ނަޒީރު ވިދާޅުވިއެވެ. އެއީ ހޮސްޕިޓާލިޓީ ދާއިރާގެ އިތުރުން އޭވިއޭޝަން އަދި މެޑިސިން ދާއިރާއެވެ.
އޭގެ ތެރެއިން މެޑިސިން ކިޔަވަން އެޕްލިކޭޝަންތައް ފޮނުވައިފައިވަނީ އަވަށްޓެރި ބޮޑު ގައުމަކުން ކަމަށް ވިދާޅުވި ނަމަވެސް އެއީ ކޮން ގައުމަކުން ކަމެއް އޭނާ ވިދާޅެއްނުވެއެވެ.
އެހެން ނަމަވެސް އެ ދަރިވަރުންނަށް ފުރުސަތު ދެވޭވަރަށް އަދި ރާއްޖޭގެ ތައުލީމު ދޭ ތަންތަނުގެ ޖާގަ ނެތްކަން ނަޒީރުގެ ވާހަކައިގައި ފާހަގަކުރެއްވިއެވެ. އެ ގޮތުން އައްޑޫ ފްލައިން ސްކޫލްގައި ކިޔެވުމަށް ވެސް ބޭރުގެ އެކި ގައުމުތަކުގެ ދަރިވަރުންގެ ޑިމާންޑް އޮތް ނަމަވެސް، އެ އަދަދަށް އެ ދަރިވަރުންނަށް އަދި ފުރުސަތު ދެވެން ނެތުމުގެ ސަބަބުން، އެ ދަރިވަރުން ތިބީ ކިޔުގައި ކަމަށް އޭނާ ވިދާޅުވިއެވެ.
ހޮސްޕިޓާލިޓީ ދާއިރާއިން ތަމްރީނުދިނުމަށް ލ. އަތޮޅުގައި ފައިވް ސްޓާ ޓްރެއިނިން ރިޒޯޓެއް އެޅުމަށް މިހާރުވަނީ އެއްބަސްވުމުގައި ސޮއިކޮށްފައެވެ.
މެޑިސިން ދާއިރާއަށް ބަލާއިރު، އައިޖީއެމްއެޗްގައި ހުންނަ މެޑިކަލް ސްކޫލްގެ ކެޕޭސިޓީއަކީ އަހަރަކު 40 ދަރިވަރުންނެވެ.
މި ސަރުކާރުން ވަނީ، ހުޅުމާލޭގައި އެއްފަހަރާ 400 ދަރިވަރުންނަށް ކިޔެވޭ ވަރުގެ މެޑިކަލް ސްކޫލަކާއި، 250 އެނދުގެ ޓީޗިން ހޮސްޕިޓަލެއް އެޅުމަށް ނިންމައިފައެވެ.
ނަޒީރު ވިދާޅުވި ގޮތުގައި މިއީ ވިޒިޓާ އިކޮނަމީގެ ދަށުން ބޭރު ގައުމުތަކުގެ ދަރިވަރުން ތައުލީމުގެ ބޭނުމަށް ރާއްޖެ ގެނައުމަށް ޓަކައި ކުރެވެމުންދާ މަސައްކަތްތަކެވެ.
ސަރުކާރުގެ އަމާޒަކީ މި ދައުރު ނިމޭއިރު، ރާއްޖޭގައި މަތީ ތައުލީމު ހާސިލުކުރާ ދަރިވަރުންގެ ފަސް އިންސައްތައަކީ ބޭރު ގައުމުތަކުގެ ދަރިވަރުންނަށް ހެދުމެވެ.
މި މަސައްކަތުގެ ތެރެއިން އެ ދަރިވަރުންނަށް ބޭނުންވާނެ އެކޮމޮޑޭޝަންތައް ރާއްޖޭގެ ފަސް ރަށެއްގައި އަޅާނެ ކަމަށާއި، މިހާރު އެ ރަށްތައް ވެސް ހުރީ ކަނޑައަޅައިފައި ކަމަށް ނަޒީރު ވިދާޅުވިއެވެ. އޭގެ ތެރޭގައި ހުޅުމާލޭގެ އިތުރުން، ހއ. ދިއްދުއާއި ރ. އަލިފުށި އަދި ގއ. ވިލިނގިލި ހިމެނެއެވެ.
މީގެ އިތުރުން އަމިއްލަ ގެތަކުގައި ބޭރު ގައުމުތަކުގެ ދަރިވަރުން ކިޔެވުމަށް ބެއިތިއްބޭނެ ނިޒާމެއް ގާއިމް ކުރުމަށް ޓަކައި ބޭނުންވާ ގާނޫނެއް ވެސް ވުޖޫދުކުރަންޖެހޭ ކަމަށް އޭނާ ވިދާޅުވިއެވެ.
ސްކޫލް އޮފް މެޑިސިން ރާއްޖޭގައި ގާއިމްކޮށް ކިޔަވައިދޭން ފެށީ 2019ވަނަ އަހަރެވެ. ރާއްޖޭގައި މެޑިސިން ކިޔަވައިދެނީ މެލޭޝިއާގެ ގައުމީ ޔުނިވާސިޓީ، ކެބަންސާން މެލޭޝިއާ (ޔޫކޭއެމް)ގައި ކިޔަވައިދޭ ކަރިކިއުލަމަށެވެ.
ފަސް އަހަރަށް ދެމިގެންދާ އެ ކޯހުގެ، އެމްއެންޔޫގެ ފުރަތަމަ ބެޗު މިދިޔަ މަހު ވަނީ ދަސްވެނިވެފައެވެ.