ސައިބާ ކުށްތަކާއި، ޑިޖިޓަލް އަދި ފޮރެންސިކް ސައިންސްގެ ދާއިރާ މަތީ ތައުލީމުގެ މަންހަޖުގައި ހިމެނުމަށް މަސައްކަތްކުރައްވަމުންދާ ކަމަށް ހަޔާ އެޑިއުކޭޝަން މިނިސްޓަރު ޑރ. މަރިޔަމް މާރިޔާ ރޭ ވިދާޅުވެއްޖެއެވެ.
ނެޝަނަލް ކޮލެޖް އޮޕް ޕޮލިސިން އެންޑް ލޯ އެންފޯސްމަންޓުން ހިންގި ބައެއް ކޯސްތައް ނިންމި ދަރިވަރުންގެ ދަސްވެނިވުމަށް ރޭ ބޭއްވި ރަސްމިއްޔާތު ޝަރަފުވެރިކޮށްދެއްވާ ވާހަކަދައްކަވަމުން މިނިސްޓަރު މާރިޔާ ވިދާޅުވީ، ފުލުހުންނަކީ ހަމައެކަނި ގާނޫނު ތަންފީޒުކުރަން ތިބޭ ބައެއް ނޫން ކަމަށާއި އެއީ މުޖުތަމައުގެ އިތުބާރު ލިބިފައިވާ މީހުންނަށް ވާންޖެހޭނެ ކަމަށެވެ.
އެގޮތުން، މަތީ ތައުލީމާ ތަމުރީނުތައް ހޯދައި، ދިރާސާތައްކޮށް، އެ ދިރާސާތަކުގެ އަލީގައި ތިމާގެ ކެރެކްޓާ އިސްލާހުކުރާ ބަޔަކަށް ވާންޖެހޭނެ ކަމަށް މާރިޔާ ވިދާޅުވިއެވެ. މަތީ ތައުލީމާއި އެ މަރުހަލާގައި ކުރެވޭ ދިރާސާތަކުގެ ސަބަބުން އޮފިސަރުންގެ އިލްމީ ފެންވަރާއި ފަންނީ ހުނަރުވެރިކަން އިތުރުވެގެންދާނެ ކަމަށް ވެސް އޭނާ ވިދާޅުވިއެވެ.
"ނަތީޖާއެއްގެ ގޮތުން އެ ބޭފުޅުންގެ [ފުލުހުންގެ] ކިބައިގައި ކްރިއޭޓިވް ވިސްނުމާއި މައްސަލަތައް ހައްލުކުރުމުގެ ގާބިލުކަން ކުރިއަރައިގެން ވާނެ. އަދި، އަދުލު އިންސާފު ގާއިމުކުރުމަށް ކުރެވޭ މަސައްކަތުގައި އެފަދަ ބޭފުޅުންނަށް އަދާކޮށްދެވޭ ރޯލުގެ އަގުބޮޑުވޭ،" މިނިސްޓަރު މާރިޔާ ވިދާޅުވިއެވެ.
ނެޝަނަލް ކޮލެޖް އޮޕް ޕޮލިސިން އެންޑް ލޯ އެންފޯސްމަންޓުން ހިންގި ބައެއް ކޯސްތައް ނިންމި ދަރިވަރުންގެ ދަސްވެނިވުމަށް ރޭ ބޭއްވި ރަސްމިއްޔާތުގައި މިނިސްޓަރު މާރިޔާ ބައިވެރިވެވަޑައިގަންނަވަނީ -- ފޮޓޯ/ ޕޮލިސް
ފޮރެންސިކް ސައިންސް، ސައިބާ ކްރައިމް އިންވެސްޓިގޭޝަން އަދި ކޮމިއުނިޓީ ޕޮލިސިން ފަދަ ޚާއްސަ ދާއިރާތަކަށް އަމާޒުކޮށްގެން ބޭއްވޭ ޑިޕްލޮމާ ޕްރޮގްރާމްތަކުން މުޖުތަމައަށް ކުރިމަތިވެފައިވާ އެކިއެކި ނުރައްކާތަކާއި ގޮންޖެހުންތަކަށް އޮފިސަރުން ތަމްރީނުވެފައިވާކަން ކަށަވަރުކޮށްދޭނެ ކަމަށް މާރިޔާ ވިދާޅުވިއެވެ. އެ ތަމްރީނުތަކަކީ ޒަމާނީ ކުށްތަކާއި، ގޮންޖެހުންތަކަށް ޙައްލު ހޯދުމަށް ބޭނުންވާ ޢިލްމާއި ހުނަރު އޮފިސަރުންނަށް ލިބިދާނެ ތަމުރީނުތަކެއް ކަމަށް މާރިޔާ ވިދާޅުވިއެވެ.
"...މި ތަމުރީނުތައް ވެގެންދާނީ، މަތީ ތައުލީމުގެ ގާނޫނު ތަންފީޒުކުރުމުގެ ދާއިރާގައި އެންމެ ޒަމާނީ އުކުޅުތަކާއި ޒަމާނީ ވަސީލަތްތައް ބޭނުންކުރުމަށް މަގުފަހިކޮށްދޭ މުހިންމު ވަސީލަތަކަށް. ސައިބާ ކުށްތަކާއި ޑިޖިޓަލް ފޮރެންސިކް ފަދަ ޒަމާނީ ދާއިރާތައް މަންހަޖުގައި ހިމެނުމަށް ވެސް ދަނީ މަސައްކަތްކުރަމުން،" މާރިޔާ ވިދާޅުވިއެވެ.
މާރިޔާ ވިދާޅުވީ، އަމާޒަކީ ހުރިހާ ފުލުހުންނަށް، ވަކިން ޚާއްސަކޮށް އަންހެން ފުލުހުންނަށާއި ރަށްރަށުގައި މަސައްކަތްކުރާ ފުލުހުންނަށް އެފަދަ ފުރުސަތުތައް ފަހިކޮށްދިނުން ކަމަށެވެ. އެގޮތުން، ބައިނަލްއަގުވާމީ ފަރާތްތަކާއެކު އިތުރު ފުރުސަތުތައް ހޯދައިދުނުމަށް ރޭވިފައިވާ ކަމަށް ވެސް މާރިޔާ ވިދާޅުވިއެވެ.
ރޭ ބޭއްވި ރަސްމިއްޔާތުގައި، ކޮމިޝަނާ އޮފް ޕޮލިސް އަލީ ޝުޖާއުއާއި ފުލުހުންގެ އެގްޒެކެޓިވް އޮފިސަރުން އަދި ނެޝަނަލް ކޮލެޖް އޮފް ޕޮލިސިން އެންޑް ލޯ އެންފޯސްމަންޓުގެ އިސްވެރިން ބައިވެރިވެވަޑައިގެންނެވިއެވެ.
އެ ރަސްމިއްޔާތުގައި، ޕޮލިސް ކޮލެޖުން ހިންގި ހަތަރު ކޯހަކުން 297 ދަރިވަރުން ދަސްވެނިވެފައިވެއެވެ. އެއީ، ޑިޕްލޮމާ އިން ކްރިމިނަލް އިންވެސްޓިގޭޝަން ކޯހުގެ 208 ދަރިވަރުންނާއި، ޑިޕްލޮމާ އިން ސެކިއުރިޓީ އެންޑް ރިސްކު މެނޭޖްމަންޓް ކޯހުގެ 27 ދަރިވަރުންނާއި، މާސްޓާސް އިން ލީޑަޝިޕް އެންޑް މެނޭޖްމަންޓް (ޕޮލިސިން އެންޑް ސެކިއުރިޓީ) ކޯހުގެ 37 ދަރިވަރުންގެ އިތުރުން ޑިޕްލޮމާ އިން ފޮރެންސިކް އިންވެސްޓިގޭޝަން ކޯހުގެ 25 ދަރިވަރުންނެވެ.