ނިމިދިޔަ އޯގަސްޓު މަހު ރާއްޖޭގެ ރަސްމީ ރިޒާވުގައި ހުރި ޑޮލަރުގެ އަދަދު 444 މިލިއަނަށް އިތުރުވެފައިވާކަމަށް މަރުކަޒީ ބޭންކު އެމްއެމްއޭގެ ތަފާސް ހިސާބުތަކުން ދައްކައިފިއެވެ.
އެމްއެމްއޭއިން އާންމުކޮށްފައިވާ ތަފާސް ހިސާބުގައިވާ ގޮތުން ޖުލައި މަހު ރިޒާވުގައި ހުރީ 395 މިލިއަން ޑޮލަރެވެ. އެެހެންކަމުން އެ މަހު ޔޫސަބަލް ރިޒާވުގެ ގޮތުގައި ހުރީ 45 މިލިއަން ޑޮލަރެވެ.
ނަމަވެސް އޯގަސްޓު މަހު ރިޒާވަށް 49 މިލިއަން ޑޮލަރު އިތުރުވެ އެ އަދަދުވަނީ 444 މިލިއަން ޑޮލަރަށް އިތުރުވެފައެވެ.
ރިޒާވް އިތުރުވި އަދަދު --
ޖުމްލަ ރިޒާވް އިތުރުވީ ނަމަވެސް މި އަދަދަކީ އަދިވެސް އެއް މަހުގެ އިމްޕޯޓަށް ބޭނުންވާ ފައިސާއެެވެ.
ޖުމްލަ ރިޒާވު 444 މިލިއަނަށް އިތުރުވުމާއެކު ޔޫސަބަލް ރިޒާވުގެ އަދަދު ވެސް ވަނީ އިތުރުވެފައެވެ. އެގޮތުން މިހާރު ޔޫސަބަލް ރިޒާވުގައި ހުރީ 61 މިލިއަން ޑޮލަރެވެ.
މި އަހަރު ރަސްމީ ރިޒާވްގައި އެންމެ ގިނައިން ފައިސާ ހުރީ އެޕްރީލް މަހުގައެވެ. އެ މަހު 622 މިލިއަން ޑޮލަރު ހުރިއިރު މި އަހަރު ރިޒާވް އެންމެ މަދުވެފައިވަނީ ޖުލައި މަހު، 395 މިލިއަން ޑޮލަރަށެވެ.
އަހަރު ފެށުނު އިރު ރިޒާވްގައި 551 މިލިއަން ޑޮލަރު ހުއްޓެވެ.
މި އަހަރުގެ ނިޔަލަށް، ޔޫސަބަލް ރިޒާވާއި ސޮވެރިން ޑިވެލޮޕްމެންޓް ހިމަނައިގެން ރަސްމީ ރިޒާވު 606 މިލިއަން ޑޮލަރަށް ވުރެ އިތުރުވާނެ ކަމަށް އެމްއެމްއޭއިން ވަނީ އަންދާޒާކޮށްފައެވެ.