އިންޑިއާގެ ދެކުނު ސްޓޭޓްތަކަށް ކުރާ މޫސުމީ ވިއްސާރައިގައި ފެންބޮޑުވެ، މިހާތަނަށް 25 މީހުން މަރުވެއްޖެއެވެ.
އެ ހާދިސާގައި ހާލުގައި ޖެހުނު އެތައް ބަޔަކު ވަނީ ވަގުތީ ހިޔާތަކަށް ގެންގޮސްފައެވެ.
ފެންބޮޑުވުމާ ގުޅިގެން ތެލަންގާނާ ސްޓޭޓުގައި 16 މީހަކު މަރުވެފައިވާއިރު، އަވައްޓެރި އަންދްރާ ޕްރަދޭޝްގައި ވޭތުވެދިޔަ ދެ ދުވަހުގެ ތެރޭގައި ނުވަ މީހަކު މަރުވެފައިވެއެވެ.
"ގިނަ ގެތަކަށް ވެސް ގެއްލުން ލިބިފައިވޭ،" ތެލަންގާނާގެ ޑިޒާސްޓާ ރެސްޕޮންސް އެންޑް ފަޔާ ސާވިސްގެ ޑިރެކްޓަރު ޖެނެރަލް ވައި ނާގީ ރެޑީ އޭއެފްޕީ ނިއުސްއަށް ވިދާޅުވިއެވެ.
ފާއިތުވި 24 ގަޑިއިރުގެ ތެރޭގައި 400 މިލިމީޓަރު ވާރޭ ވެހިފައިވާ ކަމަށް ވެސް އޭނާ ވިދާޅުވިއެވެ.
އިންޑިއާ ނޫސްތަކާ ހަވާލާދީ އަލް ޖަޒީރާއިން ބުނާ ގޮތުގައި ތެލަންގާނާ ސަރުކާރުން ވަނީ ފެންބޮޑުވުން ގައުމީ ކާރިސާއެއްގެ ގޮތުގައި ކަނޑައަޅައިދިނުމަށް އިންޑިއާގެ ފެޑެރަލް ސަރުކާރަށް އެދިފައެވެ. މިހާތަނަށް ތެލަންގާނާގައި 3،800 އެއްހާ މީހުން ސަލާމަތްކޮށް ވަގުތީ ހިޔާތަކަށް ބަދަލުކޮށްފައިވެއެވެ.
ހޯމަ ދުވަހު އިންޑިއާގެ ވައިގެ ސިފައިން ވަނީ 200އަށް ވުރެ ގިނަ ރެސްކިއު އޮފިސަރުންނާއި 30 ޓަނުގެ ކުއްލި އެހީ ދެ ސްޓޭޓަށް ފޮނުވައިފައެވެ.
ވިއްސާރައިގެ ސަބަބުން އިންޑިއާއަށް ކޮންމެ އަހަރަކު ވެސް އެތައް ގެއްލުމެއްލިބެއެވެ.
މިދިޔަ ހަފުތާގައި އިންޑިއާގެ ހުޅަނގުން ގުޖުރާތު ސްޓޭޓަށް ކުރި ވިއްސާރައިގައި ފެންބޮޑުވެ، ތިން ދުވަސް ތެރޭގައި 28 މީހަކު ވަނީ މަރުވެފައެވެ.
އިންޑިއާގެ އިތުރުން އަވައްޓެރި ބަންގްލަދޭޝްގައި ވެސް މިދިޔަ މަހު ވަރަށް ބޮޑަށް ފެންބޮޑުވެ، 40 މީހުން މަރުވެފައިވާއިރު، ގާތްގަނޑަކަށް 300،000 މީހުން ހާލުގައި ޖެހިފައިވެއެވެ.