ފަހި ދިރިއުޅުން ކޯޕަރޭޝަނުގެ އަމާން އުދަރެސް ފްލެޓްތަކަކީ އިޖްތިމާއީ ބޯހިޔާވަހިކަމަށް ކުރީ ސަރުކާރުން ފެށި މަޝްރޫއުގެ އެންމެ ބޮޑު އެއް މަސައްކަތެވެ.
އިމާރާތްކުރެވޭ ޖުމްލަ 32 ޓަވަރުގެ ތެރެއިން 16 ޓަވަރެވެ. މިއީ 18 ބުރީގެ ޓަވަރުތަކަކަށް ވީއިރު، މި ޓަވަރުތައް އެޅުމަށް އެފްޑީސީން ހަވާލުކުރީ ދެ ކުންފުންޏަކަށެވެ.
މި މަޝްރޫއުގައި ހިމެނޭ 32 ޓަވަރުގެ ތެރެއިން 16 ޓަވަރު ނޭޝަނަލް ބިލްޑިންސް ކޮންސްޓްރަކްޝަން ކުންފުނި (އެންބީސީީސީ)އާ ހަވާލުކުރިއިރު، އަނެއް 16 ޓަވަރު ހަވާލުކުރީ ޖޭއެމްސީ ޕްރޮޖެކްޓްސްއާއެވެ. މީގެ ތެރެއިން ޖޭއެމްސީ ޕްރޮޖެކްޓްސްއާ ހަވާލުކުރީ އަމާން އުދަރެސްގެ ޓަވަރުތައް އެޅުމަށެވެ.
އެފްޑީސީން އިމާރާތްކުރާ 4000 ހައުސިން ޔުނިޓުގެ ނެއިބަހުޑް މޮޑެލްއެއް --- ސަން ފޮޓޯ
މި ޓަވަރުތަކުގެ އެންމެ ފަހުގެ މަސައްކަތް ބަލައިލުމަށް މީގެ މަދު ދުވަސްކޮޅެއް ކުރިން ދިޔައިއިރު، ފާހަގަވީ މަސައްކަތުގެ އަވަސްކަމެވެ. ކޮންކްރީޓު ތަނބުތަކާއި، ފާރުތަކުގައި ކުލަޖެހި ތަށިމުށި ޖެހިފައި ހުރި މަންޒަރު ފެނުމުން ސިފަވީ މި ތަނުގެ ހިތްގައިމުކަމާއި، ޖާގަ ތަނަވަސްކަމެވެެ.
އެެހެން ފްލެޓްތަކާ މި ތަނާ ހުރި ތަފާތުތައް ގިނައެވެ.
މި ޓަވަރުތަކަކީ ޖުމްލަ ދެ ބަވާތެއްގެ ރޫމްތައް ހިމެނޭ ޓަވަރުތަކެކެވެ. އޭގެ ތެރޭގައި ހިމެނެނީ ތިން ކޮޓަރީގެ 2800 އެޕާޓްމެންޓާއި އަދި ދެ ކޮޓަރީގެ 1200 އެޕާޓްމެންޓެވެ. މީގެ ތެރޭގައި ހިމެނޭ ތިން ކޮޓަރީގެ އެޕާޓްމެންޓްތަކުގައި 900 އަކަފޫޓް ހުންނައިރު، ދެ ކޮޓަރީގެ އެޕާޓްމެންޓްތަކުގައި 650 އަކަފޫޓް ހުންނާނެއެވެ.
އެފްޑީސީން ހުޅުމާލޭ ދެވަނަ ފިޔަވަހީގައި އިމާރާތްކުރާ ބައެއް ޓަވަރުތައް 95 ޕަސެންޓް ނިމިފައި --- ސަން ފޮޓޯ
ކޮންސްޓްރަކްޝަން މަސައްކަތް ތަފާތު
މި އިމާރާތްތައް ޚާއްސަވާ އެންމެ ބޮޑު އެއް ކަމަކީ ކޮންސްޓްރަކްޝަން މަސައްކަތް ކުރިއަށް ދިޔަ ގޮތެވެ. މި މަޝްރޫއުގެ ޓަވަރުތައް އަޅާ ދެ ކުންފުނިން ވެސް އެ މަސައްކަތްކުރަނީ މުޅިން އާ ގޮތަކަށެވެ.
އެއީ ތައްގަނޑު ބޭނުންކޮށްގެން އެ ތައްގަނޑަށް ކޮންކްރީޓް އަޅައި ފާރުތަކާއި ސިޑިއާއި، ޝީޓު އެއްފަހަރާ އެޅުމެވެ. މިހެން އެ މަސައްކަތްކުރުމުން ފްލޯ ސައިކަލް ނުވަތަ އެ ފްލޯގެ ފާރުތައް ހިމެނޭހެން ކޮންކްރީޓް މަސައްކަތް 10 ދުވަހާއި 14 ދުވަހުގެ ތެރޭ ނިމި ތައްގަނޑު ނެއްޓުމަށްފަހު އޭގެ މަތީ ފްލޯގެ މަސައްކަތް ފެށެއެވެ.
ހަމައެއާއެކު އިމާރާތް ބިންހެލުން ފަދަ ގުދުރަތީ ކާރިސާތައް ދިމާވާއިރު، ރައްކާތެރިކަން ވަރުގަދަ އިމާރާތްތަކަކަސް ހެދެއެވެ.
މީގެ އިތުރުން މިއީ އެހެން ސޯޝަލް ހައުސިން މަޝްރޫއުތަކާ ބަލާއިރު އަކަފޫޓަކަށް ޖެހޭ އަގު ވެސް ކުޑަވާ އެއް ސަބަބެވެ.
އެފްޑީސީ އިން ދައްކާލި ސާމްޕަލް އެޕާޓްމެންޓް --- ސަން ފޮޓޯ/ މުހައްމަދު ޝާތިއު
މިއީ ހިތްފަސޭހަ، ފަހި އެޕާޓްމަންޓުތަކެއް
ކޮންމެ އެޕާޓްމެންޓެއްގައި ވެސް ކޮޓަރިތަކުގެ އިތުރުން ސިޓިން ރޫމް، ފާހަނާ، ބަދިގެ އަދި ބެލްކަނީ އެއް ހުރެއެވެ. ބަދިގެއާއި ސިޓިން ރޫމަކީ ވަކިން ހުންނަ ދެ ތަނަށް ވާއިރު، ލޯންޑްރީ ރޫމެއް ވެސް ވަކިން ހުރެއެވެ. ކޮޓަރިތަކުގެ ގޮތުގައި އެއް މާސްޓާ ބެޑްރޫމް އަދި ކުޑަ ރޫމްތައް ހުރެއެވެ.
މި އެޕާޓްމަންޓުތަކަށް ބަލައިލާއިރު، ހުރީ ވައިދައުރުވާނެ ޖާގަތައް ވެސް ގާއިމްކޮށްފައެވެ. ކުޑަދޮރުތަކާއި ބެލްކަނީތައް ހަދައިފައިހުރީ ކުޑަކުދިންނަށް ވެސް ރައްކާތެރިވާނެހެން އުސްކޮށެވެ.
މި ޓަވަރުތަކަކީ ސަރުކާރުގެ ސޮވެރިން ގެރެންޓީގެ ދަށުން އިންޑިޔާގެ އެގްޒިމް ބޭންކުން ދިން ދެ ލޯނަކުން އަޅާ ޓަވަރުތަކެކެވެ. އެއީ 110.5 މިލިއަން ޑޮލަރުގެ ލޯނަކާއި އަދި 116.45 މިލިއަން ޑޮލަރުގެ ލޯނަކެވެ. މި ދެ ލޯނުގެ ޖުމްލަ 227 މިލިއަން ޑޮލަރަށް އަރައެވެ.