ސްޕެނިޝް ލަލީގާގެ ރެއާލް ސޮސިއެޑާޑްއަށް ކުޅެމުންދިޔަ މިކޭލް މެރީނޯ އިންގްލިޝް ޕްރިމިއާ ލީގުގެ އާސެނަލްއަށް ސޮއި ކޮށްފިއެވެ.
ބޭރުގެ މީޑިއާތަކުގައިވާ ގޮތުން މެދުތެރެއަށް ކުޅެމުންދާ މެރީނޯ އާސެނަލްއަށް ސޮއި ކޮށްފައިވަނީ ހަތަރު އަހަރު ދުވަހުގެ އެއްބަސްވުމެއްގެ ދަށުންނެވެ. އަދި މި ވިޔަފާރީގެ އަގު 31.6 މިލިއަން ޕައުންޑަށް އެރުމަކީ ގާތް ކަމެކެވެ. އޭގެ ތެރޭގައި ހިމެނެނީ އެންމެ ފުރަތަމަ ދެއްކުމަށް ހަމަޖެހިފައިވާ 27.4 މިލިއަން ޕައުންޑާއި ފަހުން އެހެން ކަންތައްތަކާ ގުޅުވައިގެން ދިނުމަށް ހަމަޖެހިފައިވާ 4.2 މިލިއަން ޕައުންޑެވެ.
އުމުރުން 28 އަހަރުގެ މެރީނޯއަކީ އާސީޒަނަށް އާސެނަލްއިން އެޓީމަށް ގެނައި ތިންވަނަ ކުޅުންތެރިޔާއެވެ. މިސީޒަނަށް އާސެނަލްއިން މީގެކުރިންވަނީ އިޓަލީވިލާތުގެ ޑިފެންޑާ ރިކާޑޯ ކަލަފިއޯރީ އާއި އެޓީމަށް ލޯން އެއްބަސްވުމެއްގެ ދަށުން މިދިޔަ ސީޒަންގައި ކުޅުނު ކީޕާ ޑޭވިޑް ރާޔާގެ އެއްބަސްވުން ދާއިމީކޮށްފައެވެ.
މެރީނޯ އައުމާއެކު އާސެނަލްގެ މެދުތެރެއިން އެޓީމުގެ ކޯޗު މިކޭލް އާޓޭޓާއަށް މިހާރު ތިބި ކުޅުންތެރިންކަމަށްވާ ޑެކްލަން ރައިސް، ޖޯޖީނިއޯ، ތޯމަސް ޕާޓޭ އަދި މާޓިން އޮޑެގާޑްގެ އިތުރަށް އިތުރު އޮޕްޝަނެއް ލިބޭނެއެވެ.
މެރީނޯވަނީ ދާދިފަހުން ޔޫރޯ މުބާރާތް ކާމިޔާބު ކުރި ސްޕެއިން ޓީމަށްވެސް ކުޅެފައެވެ. އަދި އާޓޭޓާ ހާމަކުރިގޮތުގައި މެރީނޯއަކީ ހުނަރުވެރި ކުޅުންތެރިއެއް ކަމަށާއި އޭނާ އައުމުން އާސެނަލް އިތުރަށް ވަރުގަދަ ވެގެންދަނެކަމަށެވެ. މެރީނޯވަނީ 2018 ވަނަ އަހަރު ސޮސިއެޑާޑްއަށް ބަދަލުވުމުގެ ކުރިން ނިއުކާސްލް ޔުނައިޓެޑްގައި އެއް ސީޒަން ހޭދަކޮށްފައެވެ.
މެރީނޯ މިދިޔަ ސީޒަންގައި ސޮސިއެޑާޑްއަށްވަނީ 45 މެޗު ކުޅެދީ އަށް ލަނޑު ޖަހައިދީފައެވެ. އަދި މެރީނޯވަނީ މިހާތަނަށް ސްޕެއިން ޤައުމީ ޓީމަށް 28 މެޗުވެސް ކުޅެފައެވެ.