އުމްރާނީ ތަރައްގީ ގެނައުމަށް ޓަކައި ފަންނީ މީހުން ބޭނުންވާ ކަމަށް ވިދާޅުވެ، އެ ދާއިރާއިން އުނގެނުމަށް ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާބެހޭ މިނިސްޓަރު އާދަމް ޝަރީފު ޢުމަރު އެދިވަޑައިގެންފިއެވެ.
ވިލާ އިންޓަނޭޝަނަލް ހައި ސްކޫލްގެ މި އަހަރުގެ އިނާމު ދިނުމުގެ ޖަލްސާ ޝަރަފުވެރި ކޮށްދެއްވައި އާދަމް ޝަރީފް ވިދާޅުވީ ގައުމަށް ޚިދުމަތް ކުރުމަށް ދާއިރާއެއް އިޚުތިޔާރުކުރާއިރު ރާއްޖޭގައިހުރި މައްސަލަތައް ދެނެގަނެ، ވަޒީފާގެ ފުރުސަތުތައް އޮންނަ، ގައުމަށް ބޭނުންވާ ދާއިރާތަކުން މަތީ ތައުލީމު ހާސިލު ކުރުމަކީ މުހިންމުކަމެއް ކަމަށެވެ.
އެގޮތުން ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ދާއިރާއަކީ މި ވަގުތަށް ވަރަށް މުހިންމު ދާއިރާއެއް ކަމަށާއި އެ ދާއިރާއަށް ތަފާތު ފަންނުގެ ހުނަރުވެރި، ގާބިލު، ތަޖުރިބާކާރު، ޓެކްނިކަލް މީހުން ބޭނުންވާނެ ކަމަށް އޭނާ ވިދާޅުވިއެވެ. އަދި ރައީސް ޑރ. މުޙައްމަދު މުއިއްޒުގެ ވެރިކަމުގައި ރާއްޖޭގައި އާބަން ސެންޓަރުތަކާއި އާބަން ރީޖަންތައް އުފައްދާނެ ކަމަށާއި އެ ތަރައްގީއަށް ވާސިލުވުމަށް ވެސް ފަންނީ މީހުން ވަރަށް ގިނަ އަދަދަކަށް ބޭނުންވާނެކަން އާދަމް ޝަރީފް ވިދާޅުވިއެވެ.
މީގެ އިތުރުން އޭނާ ވިދާޅުވީ އިޖުތިމާއީ ގިނަ މައްސަލަތައް އުފެދޭ އެއް ސަބަބަކީ ތޮއްޖެހިގެން ދިރިއުޅެންޖެހުން ކަމަށާއި ރަށްރަށުން މީހުން އެކި ބޭނުންތަކުގައި އަމިއްލަ ވަޒަން ދޫކޮށް މާލެއަށް އައުމުން، ލޯބިވާ މަންމައާއި ބައްޕައާއި ކާފައާއި މާމަގެ އެކަނިވެރިކަން ބަރުދާސްތު ކުރަންޖެހޭ ކަމަށެވެ.
އެހެންވެ، އާބަން ޑިވެލޮޕްމަންޓްގެ ދާއިރާއިން ތައުލީމު ހާސިލުކުރުމަކީ އާއިލާއާއެކު ދިރިއުޅުމަށް، މައިންބަފައިންނާއި އާއިލާގެ މީހުންނާއި ކާފައާއި މާމަ ގާތުގައި ދިރިއުޅުމަށް މަގުފަހިވާނެ ވަރަށް ރަނގަޅު ފުރުސަތުތައް ލިބޭނެ ދާއިރާއެއް ކަމަށް އާދަމް ޝަރީފް ވިދާޅުވިއެވެ.
ރައީސް ޑރ. މުހައްމަދު މުއިއްޒުގެ މެނިފެސްޓޯގައި ވަނީ ރާއްޖޭގައި މެދުމިނުގެ ހަތް އާބަން ސެންޓަރެއް ގާއިމް ކުރަން ހިމަނުއްވާފައެވެ. އެއީ މާލޭގެ އުތުރުން ތިން ސެންޓަރާއި ދެކުނުން ހަތަރު ސެންޓަރު ހިމެނޭ ގޮތަށެވެ.
މި ސަރުކާރުން ވަނީ، އަމާޒަކީ، ރާއްޖޭގެ ބައެއް ރަށްރަށް ހިމެނޭ ގޮތަށް އާބަން ރީޖަންތަކާއި ސެންތަރުތަކެއް ގާއިމްކޮށް، އާބަން ރީޖަންތަކުގައި ނުވަ އަހަރުތެރޭ އެއް ލައްކަ މީހުން އާބާދު ކުރުން ކަމަށް މީގެ ކުރިން ހާމަކޮށްފައެވެ.