މިދިޔަ އަހަރުގެ ކަންގަތި އެވޯޑު 15 ކައުންސިލަކުން ހާސިލުކޮށްފިއެވެ.
އެ ކައުންސިލްތަކަށް އެވޯޑު ހަވާލުކޮށްފައި ވަނީ މިދިޔަ ބުރާސްފަތި ދުވަހު ރޭ ލޯކަލް ގަވަމެންޓް އޮތޯރިޓީ(އެލްޖީއޭ)އިން ބޭއްވި ރަސްމިއްޔާތެއްގައެވެ. މި ރަސްމިއްޔާތުގައި ލޯކަލް ގަވަމެންޓް މިނިސްޓަރު އާދަމް ޝަރީފް އުމަރާއި ފޮރިން މިނިސްޓަރު ޑރ. އަބްދުﷲ ޚާލިލް ވަނީ ބައިވެރި ވެވަޑައިގެންފައެވެ.
އެ ކައުންސިލްތަކަށް 22 އެވޯޑު ދީފައިވެއެވެ.
އެއީ، މިދިޔަ އަހަރުގެ ޕާފޯމެންސް އިންޑެކްސްގެ ރޭންކިންއަށް ބަލައި އަތޮޅު ކައުންސިލްތަކަށް ދެވޭ ގަދަހަމާންތި ދަރަޖައާއި، ރަށު ކައުންސިލުތަކަށް ދެވޭ ރަނަހަމާންތި ދަރަޖައިގެ އެއް ވަނަ، ދެވަނަ އަދި ތިން ވަނައަށް ކަންގަތި އެވޯޑެވެ. އަދި މިދިޔަ އަހަރު ލާމަރުކަޒީ ނިޒާމު ހަރުދަނާކޮށް ހެޔޮ ހިންގުމުގެ އަސާސްތައް ކުރިއަރުވައި ނަމޫނާ ރަށްވެހި ޚިދުމަތްތަކެއް ރައްޔިތުންނަށް ފޯރުކޮށްދީފައިވާތީ، މާލެ ސިޓީ ކައުންސިލަށް ހިރިހަމާންތި އެވޯޑް ދީފައިވެއެވެ.
ގަދަހަމާންތި ދަރަޖަ: މިއީ އިންޑެކްސްގެ ނަތީޖާއަށް ބަލައި އަތޮޅު ކައުންސިލްތަކުން އެއް ވަނަ، ދެވަނަ އަދި ތިން ވަނައަށް އަންނަ ކައުންސިލްތަކަށް އަރުވާ އިއްޒަތެކެވެ. އެ އިއްޒަތް ހާސިލުކުރި ކައުންސިލްތަކަކީ:
- އެއްވަނަ – ހައްދުންމަތީ އަތޮޅު ކައުންސިލް
- ދެވަނަ – މިލަދުންމަޑުލު އުތުރުބުރީ އަތޮޅު ކައުންސިލް
- ތިންވަނަ – ހުވަދުއަތޮޅު ދެކުނުބުރީ އަތޮޅު ކައުންސިލް
އެވޯޑު ދިނުމަށް ބޭއްވި ރަސްމިއްޔާތުގެ ތެރެއިން --- ފޮޓޯ/ ލޯކަލް ގަވަމެންޓް މިނިސްޓްރީ
ރަނަހަމާންތި ދަރަޖަ: މިއީ އިންޑެކްސްގެ ނަތީޖާއަށް ބަލައި ރަށު ކައުންސިލްތަކުން އެއްވަނަ ،ދެވަނަ އަދި ތިން ވަނައަށް އަންނަ ކައުންސިލްތަކަށް އެރުވޭ ޢިއްޒަތެކެވެ. މިބައިން މިދިޔަ އަހަރު ވަނަވަނައަށް އައިސްފައިވާ ކައުންސިލްތަކަކީ:
- އެއްވަނަ – އަރިއަތޮޅު އުތުރުބުރީ ބޮޑުފޮޅުދޫ ކައުންސިލް
- ދެވަނަ – ތިލަދުންމަތީ އުތުރުބުރީ ތުރާކުނު ކައުންސިލް
- ތިންވަނަ – މާލެއަތޮޅު ހިންމަފުށީ ކައުންސިލް
މި އިއްޒަތްތަކުގެ އިތުރުން އެހެން އެވޯޑުތައް ކައުންސިލްތަކަށް ދީފައިވެއެވެ.
ކަންގަތި އެވޯޑް ދިނުމުގައި ބޭނުންކުރެވޭ މިންގަނޑު ކަމަށްވާ ލޯކަލް ޕާފޯމަންސް އިންޑެކްސްއަކީ، ކައުންސިލްތަކުގެ މަސައްކަތުގެ ފެންވަރު ވަޒަންކުރުމަށް 2015 ވަނަ އަހަރު ތަޢާރަފުކުރެވުނު ޚާއްސަ އިންޑެކްސެއް ކަމަށް އެލްޖީއޭއިން ބުނެއެވެ.
އޭގެއިތުރުން، މި އިންޑެކްސްގެ އެހީގައި، ލާމަރުކަޒީ ޤާނޫނުގެ ދަށުން އުފެދިފައިވާ ރަށު އަދި އަތޮޅު ކައުންސިލްތަކުގެ މަސައްކަތްތައް މިންކޮށް ވަޒަންކުރުމާއި އިންޑެކްސް މެދުވެރިކޮށް، އަހަރަކު އެއްފަހަރު އެ ކައުންސިލްތަކުގެ ޕާފޯމަންސް މޮނިޓާކޮށް، ދަރަޖަ ކުރާ ކަމަށް އެ އޮތޯރިޓީން ވަނީ ބުނެފައެވެ.