ކައުންސިލްތަކުގެ ޚިޔާނާތުގެ މައްސަލަތަކުގައި އެކަށީގެންވާ ފިޔަވަޅު ނޭޅި، ދެވިފައި ވަނީ ނުބައި މެސެޖެއް ކަމަށް ސިޓީސް، ލޯކަލް ގަވަމަންޓް އެންޑް ޕަބްލިކް ވޯކްސް މިނިސްޓްރީގެ ޑެޕިއުޓީ މިނިސްޓަރު މުޙައްމަދު ޢާރިފް ރޭ ވިދާޅުވެއްޖެއެވެ.
އެސްއެސްޓީވީގެ ބާރުހަތަރެއް ޕްރޮގްރާމުގައި އާރިފް ވިދާޅުވީ، މެންޑޭޓު އޮތް ގޮތުން މިނިސްޓްރީގެ ދައުރަކީ ކައުންސިލްތަކުން ބަޖެޓުގެ ކަންކަން ކުރިއަށް ގެންދަންވީ ގޮތާއި ބަޖެޓު ޚަރަދު ކުރަން ވީ ރަނގަޅު ގޮތްތައް ކިޔައިދިނުން ކަމަށެވެ.
ކައުންސިލްތަކަށް ފައިސާ ދެނީ ކޮންމެ އަހަރަކަށް ދައުލަތުން އެކުލަވާލާ ބަޖެޓުގައި ގްރާންޓުގެ ގޮތުގައި ވަކި އަދަދެއް ޖަހާފައެވެ.
އޭގެ މަނާއަކީ އެބޭފުޅުންނަށް ލިބެނީ ގްރާންޓް އެންވެލޮޕެއް. ދައުލަތުގެ އެހެން މުއައްސަސާތަކުގައި ބަޖެޓު ހަދާހެން ބަޖެޓު ހަދާފައެއް ނޫން އެބޭފުޅުންނަށް ލިބިވަޑައިގަންނަވަނީ. އެ ގްރާންޓް އެންވެލޮޕަށް އެއް މިލިއަން ލިބިއްޖެއްޔާ އެ އެއް މިލިއަން ގަނޑުކޮށް ކޮންމެ އަހަރެއްގެ ވެސް ޖެނުއަރީ 15ގެ ކުރީގައި ދައުލަތުގެ ބަޖެޓު ކޯޓުތަކަށް މި އަޅަނީ. ތިމަންނަމެން މުސާރައަށް ކަނޑައަޅަނީ މިހާވަރޭ. މިގޮތަށް ބައިބަޔަކަށް ކަނޑައަޅަނީ އެކައުންސިލަކުން
ލާމަރުކަޒީ ގާނޫނުގައި ކައުންސިލްތަކުގެ ޚިޔާނާތުގެ މައްސަލަތަކަށް އުސޫލުތަކެއް ކަނޑައަޅައިފައިވާކަން އޭނާ ފާހަގަކުރެއްވިއެވެ. އެގޮތުން، ކޮންމެ އަހަރަކު ރަށްރަށުގެ ކައުންސިލްތައް ހިނގާ ގޮތް މޮނިޓާ ކުރުމަކީ އަތޮޅު ކައުންސިލްތަކުގެ ޒިންމާއެއް ކަމަށާއި ގާނޫނާ ޚިލާފަށް ދައުލަތުގެ ފައިސާ ބޭނުންކުރާކަން ފާހަގަކޮށް، ލޯކަލް ގަވަމެންޓް އޮތޯރިޓީ (އެލްޖީއޭ)އަށް އަންގަން ޖެހޭ ކަމަށް އާރިފް ވިދާޅުވިއެވެ.
އެލްޖީއޭއިން ކައުންސިލްތަކުން ފައިސާ ޚަރަދުކުރާ ގޮތް ބަލައި، ރެގިއުލޭޓް ކުރަން ލާޒިމުވާ ކަމަށާއި އެފަދަ މައްސަލަތަކުގައި ކައުންސިލްތަކަށް ފިޔަވަޅުއަޅައި، އަދަބުދީފައި ހުރިކަން އޭނާ ފާހަގަކުރެއްވިއެވެ.
"އެކަމު އެބޭފުޅުންނަކީ ސަސްޕެންޑުކުރުން ފިޔަވައި އިތުރުކަމެއް ކުރެވޭ ބަޔެއް ނޫން، އެބޭފުޅުންނަކަށް މައްސަލަ ކޯޓަކަށް ނުފޮނުވޭ، އެހެން ދިމާލަކަށް ނުފޮނުވޭ، އެބޭފުޅުން އެ މައްސަލަ ދެން ފޮނުވަން ޖެހެނީ އެންޓި ކޮރަޕްޝަން ކޮމިޝަނަށް،" އާރިފް އިތުރަށް ތަފްސީލުކޮށްދެއްވިއެވެ.
ޚިޔާނާތުގެ ތުހުމަތުގައި ޕީޖީ އޮފީހަށް ފޮނުވި މައްސަލައެއްގައި ވެސް އެކަށީގެންވާ ފިޔަވަޅެއް ނޭޅި ދިޔަކަން އޭނާ ފާހަގަކުރެއްވިއެވެ.
އާރިފް އިޝާރާތް ކުރެއްވީ، ރ. ދުވާފަރު ކައުންސިލްގެ ބައެއް މެންބަރުންނާއި، އެ އިދާރާގެ ބައެއް މުވައްޒަފުންގެ އަމިއްލަ އެކައުންޓުތަކަށް، ވާނުވާ ނޭނގޭ ގޮތަށް އެ ކައުންސިލުގެ ބަޖެޓުން ދެ މިލިއަނަށް ވުރެ ގިނަ ރުފިޔާ ވަދެފައިވާކަމަށް އެލްޖީއޭއިން އެކުލަވާލި ޚާއްސަ މޮނިޓަރިން ރިޕޯޓަކުން ހާމަވި މައްސަލައަށެވެ.
ދެހާސް ބާވީހުގައި ފެންމަތިވި އެ މައްސަލަ އޭސީސީން ބަލައި، ޕީޖީ އޮފީހަށް ފޮނުވުމުން މިދިޔަ އަހަރު އެ އޮފީހުން ނިންމީ އެ މީހުންނަށް ދައުވާ ނުކޮށް ނަސޭހަތުގެ އެއްބަސްވުން ހެދުމަށެވެ.
ޕީޖީ އޮފީހުން އެގޮތަށް ނިންމުމުން، އެއީ މުސްތަގުބަލުގައި ވެސް ކައުންސިލްތަކުގެ ޚިޔާނާތްތަކުގެ މައްސަލަތަކުގައި ހަމައެކަނި ނަސޭހަތް ދިނުމަށް ފަހު މައްސަލަ ނިންމާލަން އުސޫލެއް ހެދުނީ ކަމަށް އާރިފް ވިދާޅުވިއެވެ.
"ޕްރެސިޑެންޓެއް ކަނޑައެޅުނީ އެއީ ކައުންސިލަކުން ޚިޔާނާތްތެރިވިޔަސް ވެސް އެ މީހުންނަށް ނަސޭހަތް ދީފައި ބޭތިއްބިދާނެ ކަމަށް. އެހެންވީމަ ކައުންސިލްތަކުން ކަންބޮޑުވާން ޖެހޭ ކަމެއް ނުއެއް އާދޭ މިކަމުގައި. އެހެންވީމަ އަޅުގަނޑަށް ގަބޫލުކުރެވެނީ އެކަމަށް ސަމާލުކަން ދޭން ޖެހޭ ކަމެކޭ އެއީ،" އޭނާ ވިދާޅުވިއެވެ.
މި ފަހުން ވަނީ ހދ. އަތޮޅު ކައުންސިލުން މިދިޔަ އަހަރު ތައިލޭންޑްގެ ބެންކޮކަށް ކުރި ދަތުރުން އެ އަތޮޅުގެ ކައުންސިލްތަކަށް މަންފާއެއް ލިބިފައިނުވާތީ، އެ މައްސަލައިގައި ފިޔަވަޅު އަޅަން އަންގާފައެވެ. އެ ދަތުރަށް ހދ. އަތޮޅު ކައުންސިލުން ޖުމުލަ 952،885 ރުފިޔާ ޚަރަދުކުރި ކަމަށް އޮޑިޓް ރިޕޯޓުން ވަނީ ދައްކާފައެވެ.
އޭގެފަހުން، އއ. މާޅޮހު ކައުންސިލުން ބައިމިލިއަނެއްހާ ރުފިޔާ ގެއްލިފައިވާތީ އެ މައްސަލައިގައި ވެސް ފިޔަވަޅު އަޅަން އޮޑިޓާ ޖެނެރަލް، ހުސައިން ނިޔާޒީ ވަނީ އަންގަވައިފިއެވެ.