އިންޑިއާގެ އިރުމަތީ ސިޓީ ކޮލްކަތާގެ ސަރުކާރު ހޮސްޕިޓަލެއް ކަމަށްވާ އާރްޖީ ކާރް މެޑިކަލް ކޮލެޖް އެންޑް ހޮސްޕިޓަލުގައި ރޭޕްކޮށް އަނިޔާވެރި ގޮތަކަށް ޑޮކްޓަރަކު މަރައިލި މައްސަލައިގައި 11 ދުވަހުގެ ހަޅުތާލަށް ފަހު އިންޑިއާގެ ބައެއް ޑޮކްޓަރުން އަލުން މަސައްކަތަށް ނުކުމެއްޖެއެވެ.
ޑޮކްޓަރުން ހަޅުތާލު ކުރަމުން ދިޔައީ އިމަޖެންސީ ޚިދުމަތްތައް ފިޔަވައި އެހެން ޚިދުމަތްތައް ދިނުން މެދުކަނޑައިލުމަށް ފަހުއެވެ.
މަސައްކަތް ފެށި ނަމަވެސް، ހަޅުތާލު ކުރިއަށްދާ ކަމަށް އިންޑިއާގެ ނޫސްތަކުން ރިޕޯޓުކުރެއެވެ. އެގޮތުން، އިއްޔެ ވެސް ކޮލްކަތާގައި މީހުން މަގުމައްޗަށް އެއްވެ ހަޅުތާލުކޮށްފައިވެއެވެ.
"އަޅުގަނޑުމެން އަލުން މަސައްކަތް ފަށަނީ އާރްޖީ ކާރުގެ ހޮސްޕިޓަލްގެ މައްސަލައަށް ސްޕްރީމް ކޯޓުން ތަދައްޚުލުވުމާއި، ޑޮކްޓަރުންނަށް ރައްކާތެރިކަން ދޭނެ ކަމަށް ސްޕްރީމް ކޯޓުން ޔަގީން ދިނުމުން،" ނިއުދިއްލީގެ އޯލް އިންޑިއާ އިންސްޓިޓިއުޓް އޮފް މެޑިކަލް ސައިންސަސް (އޭއައިއެމްއެސް)ގެ ރެޒިޑެންޓް ޑޮކްޓާސް އެސޯސިއޭޝަން (އާރުޑީއޭ)އިން ބުންޏެވެ.
އިއްޔެ ބޭއްވި އަޑުއެހުމެއްގައި ސުޕްރީމް ކޯޓުން ވަނީ ޑޮކްޓަރުންނަށް އެނބުރި މަސައްކަތަށް ދިއުމަށް އިލްތިމާސްކޮށް، ސުލްހަވެރި މުޒާހަރާކުރާ މީހުންނާ މެދު ފިޔަވަޅެއް ނޭޅުމަށް އަމުރުކޮށްފައެވެ. އަދި، ދެ ހަފުތާގެ ތެރޭގައި ސަލާމަތީ ފިޔަވަޅުތައް އަޅަން ލޯކަލް އަދި ނޭޝަނަލް އޮތޯރިޓީތަކަށް ކޯޓުން ވަނީ އަމުރުކޮށްފައެވެ.
ޑޮކްޓަރު ރޭޕްކޮށް މަރާލި ހާދިސާގައި މިހާތަނަށް ލިބުނު ކުރިއެރުން ހިމެނޭ ރިޕޯޓެއް ވެސް ސެންޓްރަލް ބިއުރޯ އޮފް އިންވެސްޓިގޭޝަން (ސީބީއައި)އިން ވަނީ ކޯޓަށް ހުށަހަޅާފައެވެ.
ޑޮކްޓަރު މަރާލާފައި އޮއްވައި ފެނުނީ އޭނާ މަސައްކަތްކުރާ ހޮސްޕިޓަލްގެ ސެމިނާ ހޯލުން މި މަހުގެ ނުވަވަނަ ދުވަހުއެވެ. އަދި، އޭނާ އެ ތަނަށް ގޮސްފައިވަނީ ދިގު ޝިފްޓަކަށް ފަހު އަރާމުކޮށްލަން ކަމަށް ވެސް ނޫސްތަކުން ރިޕޯޓުކޮށްފައިވެއެވެ.
އެ މައްސަލައާ ގުޅިގެން އިންޑިއާގެ ހޮސްޕިޓަލްތަކުގެ ގިނަ އަދަދެއްގެ ޑޮކްޓަރުންނާއި އާންމުން ވަނީ މަގުތަކަށް ނުކުމެ ހަޅުތާލު ކޮށްފައެވެ.
އެ ހާދިސާއާ ގުޅިގެން އިންޑިއާގެ ސިއްޚީ ޚިދުމަތްތެރިންނަށް ރައްކާތެރިކަން އޮތް މިންވަރެއް ބަލައި، އެ މީހުންގެ ސަލާމަތާއި ރައްކާތެރިކަމަށް ކަނޑައަޅާނެ އުސޫލުތައް އެކުލަވައިލުމަށް ޚާއްސަ ޓާސްކްފޯހެއް ވެސް މި ހަފުތާގައި ވަނީ އެކުލައިވައިލާފައެވެ.
ނޭޝަނަލް ކްރައިމް ރެކޯޑްސް ބިއުރޯ (އެންސީއާރުބީ)އިން ބުނާ ގޮތުގައި 2022 ވަނަ އަހަރު 31،000 އަށް ވުރެ ގިނަ ރޭޕްގެ މައްސަލަ ރިޕޯޓްކޮށްފައިވެއެވެ. އެ އަހަރަކީ މިހާތަނަށް ރިކޯޑުތައް ނަގައިފައިވާ އެންމެ ފަހު އަހަރެވެ.