ހަޑިކޮށް، ނުތާހިރު ތަންތަނުގައި ކާބޯތަކެތި ތައްޔާރު ކޮށް ވިއްކާ ކަމުގެ ހިލަމެއް އާންމު ރައްޔިތަކަށް ވެއްޖެނަަމަ ކަމާ ގުޅޭ އިދާރާތަކަށް ރިޕޯޓުކުރުމަށް ހެލްތު މިނިސްޓަރު ޑރ. އަބްދުﷲ ޚަލީލް މިއަދު އިލްތިމާސްކުރައްވައިފިއެވެ.
މިނިސްޓަރު ޚަލީލް މިފަދައިން އިލްތިމާސްކުރެއްވީ ހޯމް މިނިސްޓްރީއާއި އިކޮނޮމިކް މިނިސްޓްރްއާއި ހެލްތު މިނިސްޓްރީ ގުޅިގެން މިއަދު ބޭއްވި ނޫސްވެރިންގެ ބައްދަލުވުމުގައެވެ.
އެ ބައްދަލުވުމުގައި ޚަލީލް ވިދާޅުވީ، ގެތަކުގައި ކާބޯތަކެތި އުފައްދަން ހުއްދަ ދޭނީ މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ)އިން ދޫކުރާ ވަކި ލައިސަންސެއްގެ ދަށުން ކަމަށެވެ.
އެ ލައިސަންސްގެ ނަންބަރު، އުފައްދާ ތަކެތީގެ ލޭބަލްގައި ޖަހަން ޖެހޭނެކަން ފާހަގަކުރައްވައި މިނިސްޓަރު ޚަލީލް ވިދާޅުވީ، އެ ޖެހުމުގެ ބޭނުމަކީ އެ ތަކެތި އުފައްދާފައިވާ ތަނާ ފަރާތް ހޯދުމަށް ފަސޭހަކުރުން ކަމަށެވެ.
އެއާއެކު ގެތަކުގައި ހަދާ ކާބޯތަކެތީގެ ރައްކާތެރިކަން ކަށަވަރުކުރުމަށް މިހާރެކޭ އެއްގޮތަށް އާންމު ގަނޫނުގެ ދަށުންނާއި ކާބޯތަކެތީގެ ގާނޫނުގެ ދަށުން އެ ތަންތަނުގެ ރައްކާތެރިކަން ކަށަވަރު ކުރައްވާނެ ކަމުގެ ޔަގީންކަން ޚަލީލް ވަނީ ދެއްވާފައެވެ.
މިނިސްޓަރު ވަނީ ބައެއް ފަހަރަށް ގެތަކުގެ ކޮޓަރިތަކުގައި ކުރާ މިފަދަ ކަންކަމަކީ ބޭރަށް ފެންނަން ހުންނަ ކަންތައްތަކެއް ނޫން ކަމަށާއި އެކަންކަން އެނގެނީ ކޮންމެވެސް ފަރާތަކުން ކުރާ ރިޕޯޓަކުން ކަން ފާހަގަކުރައްވާފައެވެ.
އެހެންވީމަ އެގޮތަށް އުފައްދާ ތަކެތި [މުޑުދާރުކޮށް އުފައްދާ ކާބޯތަކެތި] އާންމު ފަރާތަކަށް ފާހަގަކުރެވޭ ހިސާބުން ފޮޓޯއާއި އެއްޗެހި އާންމުކުރެއްވުމުގެ ބަދަލުގައި ސޯޝަލް މީޑިއާއަށް ދޫކޮށްލުމުގެ ބަދަލުގައި ހިއްސާކޮށްދެއްވާށޭ އަޅުގަނޑުމެނަށް. އެއީ ވެސް އަޅުގަނޑުމެނަށް ވަރަށް ބޮޑު ބާރަކަށް ވެގެންދާނެ މިކަންކަން ހައްލުކުރުމަށް ޓަކައި
ހެލްތު މިނިސްޓްރީން ވަނީ މުޑުދާރުކޮށް ކާބޯތަކެތި ތައްޔާރުކުރާ ތަނެއް ފާހަގަވެއްޖެނަމަ 7603204 އަށް ގުޅައިގެން އެ ކަމެއް ރިޕޯޓު ކުރުމަށް އިލްތިމާސްކޮށްފައެވެ.
މީގެއިތުރުން، ސޯޝަލް މީޑިއާގައި އެފަދަ ތަންތަން އާންމުކޮށްގެން އެ ތަނަށް ދާއިރުގައި ހުންނަނީ އެ ތަނެއްގައި ހުންނަ ހެކިތައް ނައްތާފައި ކަމަށާއި އެހެންވެ އެތަނެއް ބަންދުކުރުމަށް އެއްވެސް ކަަހަލަ ފުރުސަތެއް ނުލިބޭ ކަމަށް ޚަލީލް ވިދާޅުވިއެވެ.
ފާހަގަކޮށްލެވޭ ގޮތުގައި މިދިޔަ އާދިއްތަ ދުވަހު ވަނީ ބަންގްލަދޭޝްގެ 32 އަހަރުގެ، އެމްޑީ އަރަފާތު ހޮސައިން ކިޔާ މީހަކު ބުޅާ މަރައި، އޭގެ މަހުން ކައްކައިފައިވާ ކާތަކެތި ވިއްކާކަމުގެ މައްސަލައެއް ފެންމަތިވެފައެވެ.
އެ މައްސަލައާ ގުޅުވައި ފުލުހުން އިއްޔެ މީޑިއާއަށް ހިއްސާކުރި މެސެޖެއްގައި ބުނީ، އެ މީހާ ހައްޔަރުކޮށް އަންގާރަ ދުވަހު އިމިގްރޭޝަނާ ހަވާލުކޮށްފައިވާ ކަމަށެވެ.
އަދި، އޭނާގެ މައްޗަށް ތުހުމަތުކުރެވޭ މައްސަލަ ފުލުހުން ތަހުގީގު ކުރަމުންގެންދާ ކަމަށް ވެސް ފުލުހުން ބުންޏެވެ. އެހެންނަމަވެސް، މިހާތަނަށް އިމިގްރޭޝަނުން އެ މީހާގެ އަޅާނެ ފިޔަވަޅެއް ހާމަކޮށްފައެއް ނުވެއެވެ.
މިނިސްޓަރު ޚަލީލް ވިދާޅުވީ، އެފަދަ އެއްވެސް މައްސަލައެއްގެ ރިޕޯޓެއް އެއްވެސް ފަރާތަކުން މިނިސްޓްރީއަށް ހުށަހަޅާފައި ނުވާ ކަމަށެވެ.
އެހެންނަމަވެސް އެ މައްސަލަ މިހާރު ތަހުގީގުކުރަމުންދާއިރު، ތަހުގީގުކުރާ އިދާރާތަކާ ގުޅިގެން ވަރަށް ކައިރިން އެކަން ބަލަމުންދާ ކަމަށް ވެސް ޚަލީލް ވިދާޅުވިއެވެ.