މަގުމަތިން ބުޅާ ހިފައި، އެ މަރައި، އެއިން ކާބޯތަކެތި ތައްޔާރުކޮށްގެން ވިއްކާކަމުގެ އެއްވެސް ރިޕޯޓެއް ހެލްތު މިނިސްޓްރީއަށް ލިބިފައިނުވާ ކަމަށާއި، އެފަދަ ކަމެއް ފެންމަތިވާ ހިސާބުން ސޯޝަލް މީޑިއާގައި އާއްމުކުރުމުގެ ބަދަލުގައި މިނިސްޓްރީއަށް ރިޕޯޓުކުރުމަށް ހެލްތު މިނިސްޓަރު ޑރ. އަބްދުﷲ ޚަލީލް މިއަދު އެދިވަޑައިގެންފިއެވެ.
މިނިސްޓަރު މިފަދައިން ވިދާޅުވީ މާދަމާއިން ފެށިގެން އަމަލުކުރަން ފަށާ ކާބޯތަކެތީގެ ރައްކާތެރިކަން ކަށަވަރުކުރާ ބިލުގެ ތަފްސީލް ހިއްސާކުރުމަށް ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުންނެވެ.
މި ނޫސްވެރިންގެ ބައްދަލުވުމުގައި ނޫސްވެރިން ވަނީ މިދިޔަ އާދިއްތަ ދުވަހު އާންމުންގެ ސަމާލުކަމަށް އައި މައްސަލައަކާ ގުޅޭގޮތުން ސުވާލު އުފައްދާފައެވެ. އެއީ ބަންގްލަދޭޝްގެ 32 އަހަރުގެ، އެމްޑީ އަރަފާތު ހޮސައިން ކިޔާ މީހަކު ބުޅާ މަރައި، އޭގެ މަހުން ކައްކައިފައިވާ ކާތަކެތި ވިއްކާކަމުގެ މައްސަލައެވެ.
އާންމުންގެ ކަންބޮޑުވުން އިންތިހާ ދަރަޖައަށް އުފުލާފައިވާ މި މައްސަލައާ ގުޅިގެން މިނިސްޓަރު ޚަލީލް ވިދާޅުވީ، އެފަދަ އެއްވެސް މައްސަލައެއްގެ ރިޕޯޓެއް އެއްވެސް ފަރާތަކުން މިނިސްޓްރީއަށް ހުށަހަޅާފައި ނުވާ ކަމަށެވެ. އެހެންނަމަވެސް އެ މައްސަލަ މިހާރު ތަހުގީގުކުރަމުންދާއިރު، ތަހުގީގުކުރާ އިދާރާތަކާ ގުޅިގެން ވަރަށް ކައިރިން އެކަން ބަލަމުންދާ ކަމަށް ވެސް ޚަލީލް ވިދާޅުވިއެވެ.
ފުލުހުން އިއްޔެ މީޑިއާއަށް ހިއްސާކުރި މެސެޖެއްގައި ބުނީ، އެ މީހާ ހައްޔަރުކޮށް އަންގާރަ ދުވަހު އިމިގްރޭޝަނާ ހަވާލުކޮށްފައިވާ ކަމަށެވެ. އަދި، އޭނާގެ މައްޗަށް ތުހުމަތުކުރެވޭ މައްސަލަ ފުލުހުން ތަހުގީގު ކުރަމުންގެންދާ ކަމަށް ވެސް ފުލުހުން ބުންޏެވެ. އެހެންނަމަވެސް މިހާތަނަށް އިމިގްރޭޝަނުން އެ މީހާގެ އަޅާނެ ފިޔަވަޅެއް ހާމަކޮށްފައެއް ނުވެއެވެ.
މި މައްސަލައިގެ ކަންބޮޑުވުން ފާޅުކުރައްވާ މިނިސްޓަރު ޚަލީލް އެދިވަޑައިގަތީ، އެފަދަ ކަމެއް އެނގި ނުވަތަ ޝައްކުކުރެވޭ ހާލަތެއްގައި ސޯޝަލް މީޑިއާގައި ހިއްސާކުރުމުގެ ބަދަލުގައި މިނިސްޓްރީއަށް އެކަން ހުށަހެޅުމަށެވެ. ރިޕޯޓް ކުރުމުގެ ބަދަލުގައި ސޯޝަލް މީޑިއާއަށް އެ ފޮޓޯއެއް ނުވަތަ ޕޯސްޓެއް ލުމުން އޭގެން ނުކުންނަ ނަތީޖާ ގޯސްކަމަށް މިނިސްޓަރު ވިދާޅުވިއެވެ.
ގިނަ ފަހަރަށް އަޅުގަނޑުމެންނަށް އެފަދަ ތަނަކަށް ގޮސް މި ވަދެވެނީ ކޯޓު އަމުރަކާ އެކީ. އެ ދާއިރުގަ [ސޯޝަލް މީޑިއާގައި އާއްމުކުރުމުން] އެނގިގެން އެބަ ހުރޭ އެތަނެއް ނުވަތަ ކޮޓަރިއެއް ވިޔަސް ސާފުކޮށްފަ އަޅުގަނޑުމެން ދާއިރު، ހެލްތު މިނިސްޓަރު ޑރ. އަބްދުﷲ ޚަލީލް
އެފަދަ ކަމެއް ޝައްކުވެގެން ނުވަތަ އެނގިގެން މިނިސްޓްރީއަށް ރިޕޯޓުކުރުމުން ކަމާ ގުޅުން ހުރި އިދާރާތަކާއެކު މަސައްކަތް ކުރައްވާނެ ކަމުގެ ޔަގީންކަން މިނިސްޓަރު ވަނީ ދެއްވާފައެވެ.
ޚަލީލް ވިދާޅުވި ގޮތުގައި ގާނޫނުގެ ދަށުން ބަޔަކު ދިރިއުޅޭ ތަނަކަށް ގޮސް ވަނުމުގެ ބާރެއް މިނިސްޓްރީއަކަށް ނުވަތަ، މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އަކަށް ނެތެވެ. އެހެންކަމުން ދިމާވާ ގޮންޖެހުންތަކެއް ވެސް އޮންނަ ކަމަށް ޚަލީލް ވިދާޅުވިއެވެ.
ވަކިން ޚާއްސަކޮށް ރެޖިސްޓާނުކޮށް، ހިންގާ ވިޔަފާރިއަކުން އުފައްދާ ޕްރޮޑަކްޓްސް ފިހާރައެއްގައި ހުއްޓަސް މިނިސްޓްރީއަށް ގޮސް އެތަކެތި ނެގުމުގެ ހުއްދައެއް ނެތް ކަމަށް ވިދާޅުވިއެވެ.
ރަޖިސްޓްރީނުކޮށް ހިންގާ ތަނެއް ނުވަތަ ވިޔަފާރިއަކަށްވާނަމަ، ގެއެއްގެ ބަދިގެއެއްގަ ނޫނީ ކޮޓަރިއެއްގަ ކުރާ ކަމެއް ނަމަ އެތަނަކަށް ވަނުމަކީ ގާނޫނުގެ ދަށުން އޮންނަ ބާރެއް ނޫން. އެ ރައްކާތެރިކަމާ ޕްރައިވެސީ ދީފައި އޮންނަ ގާނޫނީ ބާރުވެރިކަމުގެ ދަށުން އެއީ ކުރަން ދަތިކަމެއް، ހެލްތު މިނިސްޓަރު ޑރ. އަބްދުﷲ ޚަލީލް
އެހެންނަމަވެސް މާދަމާއިން ފެށިގެން އަމަލުކުރާ ކާބޯތަކެތީގެ ރައްކާތެރިކަން ކަށަވަރުކުރުމުގެ ގާނޫނުގެ ދަށުން އެކަންކަމަށް ހައްލެއް ލިބޭނެ ކަމަށް މިނިސްޓަރު ވިދާޅުވިއެވެ.
ބުޅާ މަހުން ތައްޔާރުކުރި ކާތަކެތި ފިހާރަތަކުގައި ވިއްކާ މައްސަލާގައި އާންމުން ވަނީ ވަރަށް ބޮޑަށް އެކަމުގެ ކަންބޮޑުވުން ފާޅުކޮށްފައެވެ.