ރާއްޖޭގައި ބޭނުންކުރަންހުރި ޑޮލަރު ރިޒާވް ހުސްނުވާ ކަމަށާއި މިމަހުގެ ރިޒާވްގެ އަދަދު އިތުރުވާނެ ކަމަށް މަރުކަޒީ ބޭންކު އެމްއެމްއޭއިން ބުނެފިއެވެ.
މިކަމާ ގުޅުވާ އެމްއެމްއޭއިން ނެރެފައިވާ ނޫސް ބަޔާނުގައި ވަނީ ރާއްޖޭގެ ރިޒާވާ ބޭހޭގޮތުން "ބޭނުންކުރެވޭ ޑޮލަރު ރިޒާވް ތާރީހުގައި ވެސް ފުރަތަމަ ފަހަރަށް ހުސްވެއްޖެ" ކަމަށް ބުނެ ނޫހަކުން ލިޔެފައިވާ ޚަބަރަކީ ހަގީގަތާ ޚިލާފު ޚަބަރެއްކަމަށެވެ.
އަދި ރިޒާވުގެ މައުލޫމާތު މިހާރެކޭ އެއްގޮތަށް އެ އޮތޯރެޓީން ބަރާބަރަށް މަހުން މަހަށް ޝާއިއު ކުރަމުން އަންނަކަމަށް ވެސް އެމްއެމްއޭއިން ވަނީ ބުނެފައެވެ.
އެމްއެމްއޭއިން ބުނީ ރާއްޖޭގައި ބޭނުންކުރެވޭ ޑޮލަރު ޖުލައި މަސް ނިމުނުއިރު ހުރި މިންރަށްވުރެ މިމަހުގެ ނިޔަލަށް އިތުރުވެގެން ދާނެކަމަށް ލަފާކުރެވޭ ކަމަށެވެ.
އެހެންކަމުން މިފަދަ ކަންކަމާމެދު ހަގީގަތާ ޚިލާފަށް ޚަބަރުތައް ގެނައުމަކީ އެ އޮތޯރެޓީއިން ނުހަނު ކަންބޮޑުވާ ކަމެއްކަމަށް ވެސް އެމްއެމްއޭއިން ވަނީ ބުނެފައެވެ.
އެމްއެމްއޭގެ އިތުރުން އިކޮނޮމިކް މިނިސްޓަރު އަހުމަދު ސައީދު ވެސް ވަނީ މިކަން ދޮގުކުރައްވާ އެކްސްގައި ޕޯސްޓު ކޮށްފައެވެ.
މިނިސްޓަރު ސައީދުގެ ޓުވީޓުގައި ވަނީ "ބޭނުންކުރެވޭ ޑޮލަރު ރިޒާވު ހުސްވެއްޖެ" ކަމަށް ނޫހަކުން މިއަދު ޝާއިޢުކުރި ޚަބަރަކީ ކަނޑައެޅިގެން ބުހުތާނު ދޮގު ޚަބަރެއް ކަމަށެވެ.
އެމްއެމްއޭއިން ޖުލައި މަހު އާންމުކުރި ތަފާސްހިސާބުން ދައްކާ ގޮތުގައި ޖޫން މަސް ނިމުނުއިރު ރިޒާވްގައި ހުރީ 509.2 މިލިއަން ޑޮލަރެވެ. އަދި މެއި މަހުގެ ނިޔަލަށް ރިޒާވްގައި ހުރީ 492.2 މިލިއަން ޑޮލަރެވެ. އެހެންކަމުން، މެއި މަހާ އަޅާބަލާއިރު، ޖޫން މަހު ވެސް ރިޒާވް ވަނީ ކުރިއަރާފައެވެ.