ކާބޯތަކެތީގެ ގާނޫނަށް އަމަލު ކުރަން ފެށުމާ އެކު، ފިހާރަތަކުގައި އަމިއްލަ ފަރާތްތަކުން ތައްޔާރުކޮށް، ވިއްކަމުން ގެންދާ ކާބޯތަކެތި ވެސް، ކަނޑައަޅާފައިވާ މިންގަނޑަށް ފެތޭތޯ ބަލަމުންދާނެ ކަމަށް މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ)އިން ބުނެފިއެވެ.
ރައްޔިތުންގެ މަޖިލީހުން ފާސްކުރި ކާބޯތަކެތީގެ ގާނޫނު ރައީސުލްޖުމްހޫރިއްޔާ ތަސްދީގު ކުރައްވާފައިވާއިރު، އަންނަ ހުކުރު ދުވަހުން ފެށިގެން އެ ގާނޫނަށް އަމަލުކުރަން ފަށާނެއެވެ.
ދައުލަތުގެ މީޑިއާ، ޕީއެސްއެމްގައި މިރޭ ވާހަކަ ދައްކަވަމުން އެމްއެފްޑީއޭގެ ފުޑް ކޮލިޓީ އެޝުއަރެންސް ކޯޑިނޭޓަރު ޚާލިސާ މުޙައްމަދު ވިދާޅުވީ އެ ގާނޫނަށް އަމަލުކުރަން ފެށުމާ އެކު، ކާބޯތަކެތީގެ ރައްކާތެރިކަން ކަށަވަރު ކުރުމުގެ މަސައްކަތްތައް ކުރަމުންދާނީ އެމްއެފްޑީއޭއިން ކަމަށެވެ.
އެ ގޮތުން ކާބޯތަކެތީގެ ގިންތިތަކެއް ކަނޑައަޅައި، ހަ މަސް ދުވަހުގެ ތެރޭގައި ކާބޯތަކެތީގެ ވިޔަފާރިކުރާ ތަންތަނުން އެމްއެފްޑީއޭގައި ރެޖިސްޓްރީ ކުރަންޖެހޭނެ ކަމަށް އޭނާ ވިދާޅުވިއެވެ.
ޚާލިސާ ވިދާޅުވި ގޮތުގައި ކާބޯތަކެތީގެ ގާނޫނުގެ ދަށުން ފިހާރަތަކުގައި ކާބޯތަކެތި ބެހެއްޓޭނެ މިންގަނޑުތައް ކަނޑައަޅައި، އެއާ އެއްގޮތަށް އަމަލު ކުރަމުންދޭތޯ އެމްއެފްޑީއޭއިން ބަލަމުންގެންދާނެއެވެ. އަދި ކުރިން އެންގުމަކާ ނުލައި، ގެތަކަށް ގޮސް ކާއެއްޗެހި ތައްޔާރު ކުރުމުގެ މަރުހަލާ މޮނިޓާ ކުރުމުގެ ބާރު ވެސް މި ގާނޫނުގެ ދަށުން އެމްއެފްޑީއަށް ލިބިގެންދެއެވެ.
ކާބޯތަކެތީގެ ރައްކާތެރިކަން ކަށަވަރު ކުރުމަށް މީގެ ކުރިން އެކަށީގެންވާ ބާރު އެ އޮތޯރިޓީއަށް ލިބިފައިނެތްކަން ޚާލިސާ ފާހަގަ ކުރެއްވިއެވެ.
"އެހެންވެ އެމްއެފްޑީއޭ އަދި މިނިސްޓްރީ އޮފް ހެލްތުގެ ވެސް ވަރަށް ބޮޑު އިލްތިމާސެއް އާންމު ފަރުދުން ވެސް އަދި ކާބޯތަކެތީގެ ވިޔަފާރި ކުރާ ފަރާތްތަކުން ވެސް އަޅުގަނޑުމެންގެ މުޖުތަމައުގެ ރައްކާތެރި ކަމަށް ޓަކައި ކުރާ މަސައްކަތެއް ކަމުގައި ބަލައިގެން، އަޅުގަނޑުމެންނާ އެއްކޮށް މި ކަމުގައި އެ ބޭފުޅުންގެ އެއްބާރުލުން އަޅުގަނޑުމެންނަށް ވަރަށް ބޮޑަށް ބޭނުންވާނެ،" ޚާލިސާ ވިދާޅުވިއެވެ.
ކާބޯތަކެތީގެ ގާނޫނުގެ ދަށުން ކަނޑައެޅިފައިވާ މިންގަޑުތަކާ ޚިލާފުވާ ތަންތަން ޖޫރިމަނާކޮށް، ލައިސެންސް ހިފަހައްޓައި، އަދި އެ ތަންތަނުގެ މައުލޫމާތު އާންމު ކުރުމުގެ އިޚްތިޔާރު ވެސް އެމްއެފްޑީއޭއަށް ލިބޭނެއެވެ.
އަމިއްލަ ފަރާތްތަކުން ތައްޔާރުކޮށް، ފިހާރަތަކުގައި ވިއްކަމުންދާ ކާބޯތަކެތީގެ ސާފުތާހިރުކަމާއި، ރައްކާތެރިކަމާ ގުޅޭ ގޮތުން އާންމުންގެ މެދުގައިވަނީ ކަންބޮޑުވުން އުފެދިފައެވެ.
ގަވާއިދާ ޚިލާފަށް އުޅޭ ބިދޭސީންގެ މައްސަލަ ހައްލު ކުރުމަށް ސަރުކާރުން ކުރަމުންދާ މަސައްކަތުގެ ތެރެއިން، ކާބޯތަކެތީގެ ރައްކާތެރި ކަމުގެ މިންގަނޑުން ބޭރުން ބިދޭސީން އެ ތަކެތީގެ ވިޔަފާރި ފުޅާ ދާއިރާއެއްގައި ކުރަމުންދާކަން ވަނީ ފާހަގަކުރެވިފައެވެ. އަދި ސާފުތާހިރު ނޫން ތަންތަނުގައި ކާބޯތަކެތި ތައްޔާރުކޮށް، ފިހާރަތަކުގައި ވިއްކަމުން ދިޔަ ގިނަ އަދަދެއްގެ ބިދޭސީން ހިފަހައްޓައިފައިވެއެވެ.