މާލެއަށް މިއަދު ހެނދުނުން ފެށިގެން ކުރަމުންދާ ވިއްސާރައިގެ ސަބަބުން ގެތަކުގައި ފެންބޮޑުވެގެން 252 ރިޕޯޓު ކޮށްފައިވާ ކަމަަށް ނެޝަނަލް ޑިޒާސްޓާ މެނޭޖްމަންޓު އޮތޯރިޓީ (އެންޑީއެމްއޭ)އިން މިރޭ ބުނެފިއެވެ.
އެންޑީއެމްއޭއިން ބުނީ، ދިރިނޫޅެވޭ ވަރަށް ފެންބޮޑުވެގެން ގެއްލުން ލިބުނު އާއިލާތައް ވަގުތީ ބޯހިޔާވަހިކަމަށް ބަދަލު ކުރުމުގެ މަސައްކަތްތައް ފަށާފައިވާ ކަމަށެވެ.
އެގޮތުން، މިރޭ 8:00 ޖެހުމާ ހަމައަށް ފެންބޮޑުވެގެން 252 ރިޕޯޓެއް އެ ޚިދުމަތަށް ކޮށްފައިވާ ކަމަށާއި ތިން އާއިލާއެއް ދިރިއުޅޭ ތަނުން ބަދަލުކޮށްފައިވާކަމަށް ބުނެފައިވެއެވެ.
އިތުރު ތަފްސީލުތައް ހިއްސާކުރަމުންދާނެ ކަމަށް އެންޑީއެމްއޭއިން ބުނެފައިވެއެވެ.
މާލޭގައި ފެންބޮޑުވެފައި: ގެތަކުގައި ފެންބޮޑުވެގެން މިހާތަނަށް އެންޑީއެމްއޭއަށް 231 ރިޕޯޓެއް ---- ސަންފޮޓޯ/ ނާއިޝް ނާހިދު
މިކަމާ ގުޅުވައި އެންޑީއެމްއޭގެ ޗީފް އެގްޒެކެޓިވް ހިސާން ހަސަން "އެސްއެސްޓީވީ" އަށް ދެއްވި ބަސްދީގަތުމެއްގައި ވިދާޅުވީ، ވިއްސާރައާ ގުޅިގެން އިއްޔެއިން ފެށިގެން އެންމެ ބޮޑު ގެއްލުމެއް ލިބިގެން ރިޕޯޓްކޮށްފައިވަނީ ހއ. އަތޮޅުގެ ރަށްރަށުން ކަމަށެވެ.
އެ އަތޮޅުން 19 ރަށަަކުން ރިޕޯޓްކޮށްފައިވާކަން ފާހަގަކުރައްވައި، ހިސާން ވިދާޅުވީ ހދ. ނޮޅިވަރަމާއި ނޮޅިވަރަންފަރާއި ކުޅުދުށްފުށި ސިޓީއަށް ބޮޑެތި ގެއްލުންތަކެއް ލިބިގެން ރިޕޯޓްކުރި ކަމަށެވެ.
މިއަދު މެންދުރުން ފެށިގެން މާލެއަށް ކުރަމުންދާ ވިއްސާރައިގައި އަޅުގަނޑުމެނަށް މިހާތަނަށް އެކި ގޭގެއާއި ފިހާރައާއި ސަރުކާރުގެ މުއައްސަސާތަކާ އެއްކޮށް 151 ތަނަކުން ވެލިބަސްތާ ޖެހުމަށް އެހީތެރިކަމަށް އެދިފައި ވަނީ އެންޑީއެމްއޭގެ ޗީފް އެގްޒެކިއުޓިވް ހިސާން ހަސަން
މީގެއިތުރުން، މާލެއިން ފެން ހިންދުމަށް އެމްއެންޑީއެފް އެމްއެންޑީއެފް ފަޔާ އެންޑް ރެސްކިޔު ސާވިސްއިން މަލޭގެ ދިހަ ސަރަހައްދެއްގައި މަސައްކަތް ކުރަމުން އަންނަ ކަމަށް އެމްއެންޑީއެފުން ބުނެއެވެ. އަދި، މިހާތަނަށް 3284600 ލީޓަރުގެ ފެން ޕަންޕު މެދުވެރިކޮށް ބޭރުކުރެވިފައިވާ ކަމަށް އެމްއެންޑީއެފުން ވަނީ ބުނެފައެވެ.
އިތުރަށް އެމްއެންޑީއެފުން ބުނީ، 183 ގެއަކަށް ފެން ވަދެފައިވާކަމުގެ ރިޕޯޓް ލިބިފައިވާ ކަމަށާއި އެ ފަރާތްތަކަށް އެހީތެރިކަން ފޯރުކޮށްދިނުމަށް އެމްއެންޑީއެފް މާލޭ އޭރިއާ ކޮމާންޑުން ކުރަމުންދާ މަސައްކަތުގައި މާލޭ ސިޓީގެ ގިނަ މުއައްސަސާތަކެއް ހަރަކާތްތެރިވަމުން އަންނަ ކަމަށެވެ.
މާލޭގައި ފެން ހިންދުމުގެ މަސައްކަތުގައި އެމްއެންޑީއެފްގެ އޮފިޝަލަކު ހަރަކާތްތެރިވަނީ: މިހާތަނަށް 3284600 ލީޓަރުގެ ފެން ޕަންޕު މެދުވެރިކޮށް އެމްއެންޑީއެފުން ވަނީ ބޭރުކޮށްފައި --- ފޮޓޯ/ އެމްއެންޑީއެފް
ފާހަގަކޮށްލެވޭ ގޮތުގައި، މީގެ ކުރިން ރައީސް ޑރ. މުޙައްމަދު މުއިއްޒު ވަނީ، ފެންބޮޑުވުމުގެ މައްސަލަ ހައްލުކުރުމަށް މި ސަރުކާރުން ނިންމާފައި އޮތީ، މާލޭގެ ހުރިހާ މަގެއް ރަނގަޅު ފެންވަރުގައި ހަދައި، އާ ސްޓޯމްވޯޓާ ނިޒާމުގައި ވަރަށް ފަލަ ހޮޅިތަކާއި ވަރުގަދަ ޕަމްޕިން ނިޒާމެއް ހިމެނުމަށް ކަމަށް ވިދާޅުވެފަައެވެ.
އެ މަސައްކަތްތައް ކުރުމަށް ޓަކައި، މިދިޔަ މެއި މަހު ސަރުކާރުން ވަނީ މަޝްރޫއެއް ފަށައިފައެވެ. ޗައިނާ ސަރުކާރާ ގުޅިގެން ކުރިއަށްގެންދާ އެ މަޝްރޫއަށް 100 މިލިއަން ޑޮލަރަށްވުރެ ބޮޑު ހޭދައެއް ކުރަން ޖެހޭނެ ކަމަށް މީގެ ކުރިން ސަރުކާރުން ވަނީ ބުނެފައެވެ.