ހައުސިން މިނިސްޓްރީއާއި އިންފްރާސްޓަރަކްޗާ މިނިސްޓްރީ ހިންގާ އިމާރާތުގައި ރޯވެފައިވާ އަލިފާންގަނޑާ ގުޅިގެން އެ ސަރަހައްދުގައި ހުރި ގެތަކުން ނުކުންނަން ޖެހިފައިވާ 50 މީހަކަށް ސޯޝަލް ސެންޓަރުން ވަގުތީ ގޮތުން ބޯހިޔާވަހިކަން ފޯރުކޮށްދީފިއެވެ.
ދައުލަތުގެ ބައެއް ވުޒާރާތަކުގެ އިތުރުން މާލޭ ސިޓީ ކައުންސިލްގެ ވެސް މަސައްކަތްތަކެއް ކުރާ ގްރީން ބިލްޑިންގުގައި މިއަދު ހެނދުނު ރޯވި އަލިފާންގަނޑު ނިއްވާލުމުގެ މަސައްކަތް އެމްއެންޑީއެފްގެ ފަޔާ އެންޑް ރެސްކިއު ސާވިސަސްއިން އަދިވެސް އަންނަނީ ކުރަމުންނެވެ.
އެ ސަރަހައްދުގައި ދުންބޯވެ، ރޯވި އިމާރާތާ ކައިރީ ހުރި ގެތަކުން މީހުން ވަނީ ނެރެފައެވެ.
އެކަމާ ގުޅޭ ގޮތުން ނެޝަނަލް ޑިޒާސްޓާ މެނޭޖްމެންޓް އޮތޯރިޓީ (އެންޑީއެމްއޭ)ގެ ޗީފް އެގްޒެކެޓިވް ހިސާން ހަސަން ޓީވީއެމަށް ދެއްވި އިންޓަވިއުއެއްގައި ވިދާޅުވީ، ދުމުގެ އަސަރު ކުރާ ހުރިހާ ތަނަކުން މީހުން އިވެކުއޭޓް ކުރުމަށް ޓަކައި މިހާރު އިވެކުއޭޝަން ސެންޓަރެއް ސޯޝަލް ސެންޓަރުގައި ގާއިމުކޮށްފައިވާ ކަމަށެވެ.
އެ ތަނުގައި އެންޑީއެމްއޭއާއި ދިވެހި ރެޑް ކްރެސެންޓާއި އެ ނޫން ވެސް ފަރާތްތައް މިހާރު ހަރަކާތްތެރިވަމުން އަންނަ ކަމަށް އޭނާ ވިދާޅުވިއެވެ.
"އަޅުގަނޑުމެން މިހާރު ބޭނުންވަނީ އަސަރު ކުރި ފަރާތްތައް އެ ތަނަށް ދިޔުމަށް، އަޅުގަނޑުމެންގެ ޓީމުތައް މިހާރު އެ ސައިޓުގައި ވެސް އެހީތެރިކަން ފޯރުކޮށްދިނުމަށް ތިބޭނެ އަދި ސޯޝަލް ސެންޓަރުގައި ވެސް ތިބޭނެ،" ހިސާން ވިދާޅުވިއެވެ.
ރޯވި އިމާރާތް: އެ ސަރަހައްދުގެ އިމާރާތްތަކުން މީހުން ވަނީ ނެރެފައި -- ސަން ފޮޓޯ
އޭނާ ވިދާޅުވީ މިހާތަނަށް ލިބިފައިވާ މައުލޫމާތަށް ބަލާއިރު، ގާތްގަނޑަކަށް 50 މީހުން ސޯޝަލް ސެންޓަރަށް ދިޔުމުގެ މަގުމަތީގައި ތިބިކަން އެނގިފައިވާ ކަމަށެވެ. ނަމަވެސް ދުމުގެ އަސަރުކޮށްގެން ގެތަކުން ނުކުންނަން ޖެހިފައިވާ މީހުންގެ ސީދާ އަދަދު ޔަގީން ނުވާ ކަމަށް ހިސާން ވިދާޅުވިއެވެ.
އެންޑީއެމްއޭއާއި އެހެން މުއައްސަސާތަކާ ގުޅިގެން އެ މީހުންނަށް ކެއިންބެއުމާއި ނަފުސާނީ އެހީތެރިކަން ފޯރުކޮށްދޭނެކަން އޭނާ ފާހަގަކުރެއްވިއެވެ.
މީގެ އިތުރުން ގެތަަކަށް އަލުން މީހުން ދާން ރައްކާތެރިތޯ ބެލުމަށް އެސެސްމެންޓުތައް ހަދައި، އެކަމަށް ސަލާމަތީ ޚިދުމަތްތަކުގެ ކްލިއަރެންސް ވެސް ހޯދާނެ ކަމަށް ހިސާން ވިދާޅުވިއެވެ.
އެ ހަދާ އެސެސްމެންޓުތަކުން، ގޭގައި ތިބުން ރައްކާތެރި ނޫން ކަމަށް ބެލެވޭ މީހުންނަށް އެހެނިހެން ގޮތްގޮތުން ބޯހިޔާވަހިކަމާއި ޒަރޫރީ ބޭނުންތައް ފުއްދުމަށް ބޭނުންވާ އެހީތެރިކަން ފޯރުކޮށްދިނުމުގެ މަސައްކަތް ކުރާނެ ކަމަށް އޭނާ ވިދާޅުވިއެވެ
"އެކަމަކު މިވަގުތު އަޅުގަނޑުމެންގެ އިރުޝާދަކީ އިވެކުއޭޝަން ސެންޓަރު ގާއިމުކޮށްފައިވާ ސޯޝަލް ސެންޓަރަށް ހުރިހާ އެންމެން ދިޔުން އަދި ހުރިހާ ފަރާތްތަކުން އަޅުގަނޑުމެންގެ ޓީމުތަކުން ދޭ އިރުޝާދާ އެއްގޮތަށް އެ ތަންތަނުގައި ތިބުން މިވަގުތު،" ހިސާން އިލްތިމާސްކުރެއްވިއެވެ.
ގްރީން ބިލްޑިންގުގައި ރޯވި އަލިފާންގަނޑާއެކު މިހާރު އެ އިމާރާތް ބޭނުންނުކުރެވޭ ވަނީ އަނދައި ހުލިވެފައެވެ. އަދި އެ ސަރަހައްދު ބަންދުކޮށް، ފުލުހުން ވެސް އަންނަނީ ހަރަކާތްތެރިވަމުންނެވެ.