މިދިޔަ ހުކުރު ދުވަހުގެ ރޭ އދ. ހަންޏާމީދޫ, ރޯޝަނީ ގޭގައި ހިނގި އަލިފާނުގެ ހާދިސާގައި ހާލުގައި ޖެހުނު މީހަކަށް އެއްމަސް ދުވަހުގެ ވަގުތީ ބޯހިޔާވަހިކަން ފޯރުކޮށްދީފިއެވެ.
ނެޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ)އިން އެކްސްގައި ކޮށްފައިވާ ޕޯސްޓެއްގައި ބުނީ، އެ ހާދިސާ ހިނގި ގޭގައި ދިރިއުޅެނީ 40 އަހަރުގެ ފިރިހެނެއް ކަމަށާއި އެރަށުގެ ކައުންސިލާ ގުޅިގެން އޭނާއަށް ވަގުތީ ބޯހިޔާވަހިކަމާއި ކާބޯތަކެތި ފޯރުކޮށްދީފައިވާ ކަމަށެވެ.
މި ހާދިސާއާ ގުޅުން ހުރި އިތުުރު މައުލޫމާތު ހިއްސާކުރައްވަމުން އެންޑީއެމްއޭގެ އޮފިޝަލަކު މިއަދު 'ސަން'އަށް ވިދާޅުވީ، އެރަށަކީ ފުލުހުން ތިބޭ ރަށަކަށް ނުވާތީ ހާދިސާ ހިނގަން މެދުވެރިވި ސީދާ ސަބަބެއް ދެނެގަނެވިފައިނުވާ ކަމަށެވެ. ނަމަވެސް، އެއީ ކަރަންޓު ޝޯޓެއް ވެގެން ދިމާވި ހާދިސާއެއް ކަމަށް ބެލެވޭ ކަމަށް ރަށު ކައުންސިލާ ހަވާލައިދެއްވައި އޮފިޝަލް ވިދާޅުވިއެވެ.
މި ވަގުތު އެއްމަސްދުވަހުގެ ބޯހިޔާވަހިކަން ދިނުމަށް އެއްމަސްދުވަހަށް ތަނެއް ކުއްޔަށް ނަގާފައި ވާނީއެންޑީއެމްއޭގެ އޮފިޝަލް
މީގެއިތުރުން، ހާދިސާގައި ލިބުނު ގެއްލުންތައް ވަޒަން ކުރުމަށް ކައުންސިލުން މިހާރު އެސެސްމަންޓުތައް ހަދަމުން އަންނަ ކަމަށް އޮފިޝަލް ވިދާޅުވިއެވެ.
މީގެކުރިން އެންޑީއެމްއޭއިން ބުނީ، އެ ހާދިސާގައި ދިރިނޫޅެެވޭ ވަރަށް އެގެއަށް ގެއްލުން ލިބިފައިވާ ކަމަށެވެ.
ފާހަގަކޮށްލެވޭ ގޮތުގައި، ގޭގޭގަޔާއި ޕާކިން ޒޯންފަދަ ތަންތަނުގައި އަލިފާން ރޯވެ، މި ފަދަ ހިތާމަވެރި ހާދިސާތައް ދޭތެރެއަކުން ހިނގައެވެ.
އަލިފާނުގެ ހާދިސާތަކުގައި އަސަރުކުރާ އާއިލާތަކަށް އެންޑީއެމްއޭއިން ވަގުތީ ބޯހިޔާވަހިކަން ފޯރުކޮށްދެއެވެ.