އުސް އިމާރާތްތަކުގައި ހިނގާ އަލިފާނުގެ ހާދިސާތައް ކޮންޓްރޯލްކޮށް، އަލިފާން ނިއްވުމަށް ޑްރޯން ބޭނުންކުރުމަށް ތައްޔާރުވަމުން އަންނަކަމަށް ދިފާޢީ އަދި ގައުމީ ޚިދުމަތާބެހޭ ވަޒީރު ޙަސަން ރަޝީދު މިރޭ ވިދާޅުވެއްޖެއެވެ.
އަހާ ފޯރަމްގައި އާންމު ފަރާތަކުން ވަނީ، އަލިފާނުގެ ހާދިސާތަކުން ރައްކާތެރިވުމަށް މާލޭގައި އަޅައިފައިވާ ފިޔަވަޅުތަކަކީ ކޮބައިތޯއާއި އެފަދަ ހާދިސާތަކުގައި ބޮޑެތި ގެއްލުންތައް ނުލިބޭނެ ގޮތް ހެދުމަށް ކުރަމުންގެންދާ ކަންތައްތަކަކީ ކޮބައިތޯ ސުވާލުކޮށްފައެވެ.
އެ ސުވާލުތަކަށް ޖަވާބުދެއްވަމުން ވަޒީރު ވިދާޅުވީ ރާއްޖޭގެ ސަރަހައްދުގައި ހިނގާ އަލިފާނުގެ ހާދިސާތަކުގެ އިތުރުން ދިމާވާ އެހެނިހެން ނުރައްކާތަކުން ގައުމާއި ރައްޔިތުންނަށް ރައްކާތެރިކަން ކަށަވަރުކުރުމަށް، ސިފައިން ތިބެނީ އަބަދުވެސް ތައްޔާރީ ޙާލަތުގައިކަމަށެވެ.
ވަޒީރު ވިދާޅުވީ އަލިފާނުގެ ހާދިސާތައް އާދަޔާޚިލާފަށް މިހާރު އަންނަނީ އިތުރުވަމުން ކަމަށެވެ. މިކަން ދިމާވާ އެންމެ ބޮޑު ސަބަބަކީ ދިރިއުޅެން ޖެހިފައިވާ ގޮތް ނުވަތަ ދަތި ހާލަތު ކަމަށާއި އެގޮތުން ވަރަށް ބޮޑަށް ތޮއްޖެހިގެން ގިނަ ކުދިކުދި ތަންތަންކޮޅުގައި ދިރިއުޅުމަކީ ވެސް އެކަމުގެ ސަބަބެއް ކަމަށް ވަޒީރު ވިދާޅުވިއެވެ.
މާލޭގައި އަލިފާނުގެ ހާދިސާތައް އިތުރުވަމުންދާ މައިގަނޑު ސަބަބުތަކަށް އަލިއަޅުއްވާލައްވަމުން ވަޒީރު ވިދާޅުވީ، ދިރިއުޅުމުގެ ހާލަތު ހުރިގޮތުން ތަންތަން ތޮއްޖެހިފައިވުމާއި، ގަވާއިދާ ޚިލާފަށް އަދި އެއްވެސް ތަރުތީބެއް ނެތި ކަރަންޓު ވައިރުކޮށްފައި ހުރުމުގެ ސަބަބުން ޝޯޓްވެގެން އަލިފާން ރޯވުން ގިނަ ކަމަށެވެ.
"މިހާރު އަޅުގަނޑުމެން އެބަ ގަސްތުކުރަން. މާލޭގައި، މިހާރު އެކަމުގެ އެކްސްޕެރިމެންޓް ވެސް ހެދިއްޖެ. އާދެ ޑްރޯން ބޭނުންކޮށްގެން އުސް އިމާރާތްތަކުގެ އަލިފާން ނިއްވުމުގެ މަސައްކަތް ކުރަން. އަޅުގަނޑު ގަބޫލުކުރާ ގޮތައި މި އަހަރު ނިމުމުގެ ކުރިން ނޫނީ އަންނަ އަހަރުގެ ކުރީކޮޅުގައި އެ މަސައްކަތް ފެށޭވަރުވާނެ ކަމަށް އަޅުގަނޑު ގަބޫލުކުރަނީ." ވަޒީރު ވިދާޅުވިއެވެ.
މީގެ އިތުރުން، މަގުތަކުގައި ފެންހޮޅި ވަޅުލެވިފައި ހުރި ނަމަވެސް، އެ ތަންތަނުގައި ވެހިކަލް ޕާކުކޮށްފައި ހުރުމާއި ހަނި ގޯޅިތަކަށް ފަޔަރު ވެހިކަލްތަކަށް ނުވަދެވުމަކީ ވެސް ދިމާވާ ބޮޑު ގޮންޖެހުމެއްކަން ވަޒީރު ފާހަގަކުރެއްވިއެވެ. ނަމަވެސް ޗައިނާގެ އެހީގައި ކުރިއަށްގެންދާ މާލޭގެ މަގުތައް ހެދުމުގެ މަޝްރޫޢާއެކު މިކަމަށް އެދެވޭ ހައްލެއް ލިބޭނެ ކަމަށް އޭނާ ވިދާޅުވިއެވެ.
މީގެ އިތުރުން ވަޒީރު ވިދާޅުވީ، ބާޒާރުގައި ހުންނަ ތަފާތު ކޮލިޓީގެ ގޭސް ރެގިއުލޭޓަރުތަކުގެ މައްސަލަ ހައްލުކުރުމަށްޓަކައި ވަކި ސްޓޭންޑަޑެއް ކަނޑައަޅައި، އެ މިންގަނޑަށް ނުފެތޭ ތަކެތި ބޭނުން ނުކުރެވޭ ގޮތް ހެދުމަށް ގަސްތުކުރައްވާ ކަމަށެވެ.
ގޭސް ވިއްކާ ފަރާތްތަކާ މަޝްވަރާކޮށް، ގޭސްފުޅި ގެންގުޅުމާއި ގޭގޭގައި ބަހައްޓާ ތަންތަނުގެ ރައްކާތެރިކަން ކަށަވަރުކުރުމުގެ މަސައްކަތް ކުރިއަށްދާ ކަމަށާއި، މިހާރުވެސް ރައްޔިތުން ހޭލުންތެރިކުރުމުގެ ގިނަ ޕްރޮގްރާމްތަކެއް ހިންގަމުންދާ ކަމަށް މިނިސްޓަރު ވިދާޅުވިއެވެ.
މިނިސްޓަރު އެފަދައިން ފާހަގަކުރެއްވި އިރު، މާލޭގައި ވަނީ ބޮޑެތި އަލިފާނުގެ ހާދިސާތަކެއް ހިނގައި ބޮޑެތި ގެއްލުންތަކެއް ވެ، ބައެއްގެ ފުރާނަވެސް ގެއްލިފައެވެ.