ހުޅުމާލޭ ދެވަނަ ފިޔަވަހީގައި ހުންނަ އަމާން އުދަރެސް ޓަވަރެއްގައި އިއްޔެ ހިނގި އަލިފާނުގެ ހާދިސާއަށްފަހު، އެ ޓަވަރުގެ ފެންހޮޅިތަކަށް ދިމާވި މައްސަލަ މިހާރު ހައްލުކޮށްފައިވާ ކަމަށް އެ ޓަވަރުތައް ބަލަހައްޓާ، ފަހި ދިރިއުޅުން ކޯޕަރޭޝަން (އެފްޑީސީ)ގެ މެނޭޖިން ޑިރެކްޓަރު ހަމްދާން ޝަކީލް މިއަދު ވިދާޅުވެއްޖެއެވެ.
އިއްޔެ އަލިފާން ރޯވީ އަމާން އުދަރެސްގެ ފަސްވަނަ ޓަވަރުގެ ގްރައުންޑް ފްލޯގައި ހުރި ކުނިތަކެއްގައެވެ. އެ ހާދިސާގެ ސަބަބުން އެއްވެސް މީހަކަށް އަނިޔާއެއް ލިބިފައި ނުވާ ކަމަށް އެފްޑީސީން އިއްޔެ ވަނީ މައުލޫމާތުދީފައެވެ. ނަމަވެސް ޓަވަރުގެ ބައެއް ފެންހޮޅިތަކަށް ގެއްލުން ލިބިފައިވާތީ، އެ ހޮޅިތައް މަރާމާތުކުރުމުގެ މަސައްކަތް ފަށައިފައިވާ ކަމަށް ރޭ އެ ކުންފުނިން ސޯޝަލް މީޑިއާގައި ކުރި ޕޯސްޓެއްގައި ބުންޏެވެ.
އެ މަރާމާތުގެ މަސައްކަތް ނިމެންދެން އެ ޓަވަރުގެ ބައެއް ޔުނިޓުތަކަށް ފެނާއި ކަރަންޓުގެ ޚިދުމަތް މެދުކެނޑޭނެ ކަމަށް އެފްޑީސީން އޭރު ވަނީ ބުނެފައެވެ. ނަމަވެސް ޚިދުމަތް މެދުކެނޑޭނީ ކިތައް ޔުނިޓަކަށް ކަމެއް ބުނެފައިނުވެއެވެ.
ހުޅުމާލެ އަމާން އުދަރެސް ޓަވަރު ކައިރީގައި ހިނގި އަލިފާނުގެ ހާދިސާގައި އަނދާފައިވާ ކުނިތައް --- ފޮޓޯ: އެފްޑިސީއެ މައްސަލައާ ގުޅޭ ގޮތުން 'ސަން' އިން މިއަދު ސުވާލުކުރުމުން ހަމްދާން ވިދާޅުވީ، އެ ހާދިސާގެ ސަބަބުން ފެންހޮޅިތަކަށް ދިމާވި މައްސަލަ އެއްކޮށް ހައްލުކޮށްފައިވާ ކަމަށާއި މިހާރު ހުރިހާ އެޕާޓްމެންޓްތަކަށް ވެސް މައްސަލައެއް ނުޖެހި ފެން ލިބޭނެ ކަމަށެވެ.
"މިހާރު ދެން އެކްސްޓާނަލް މަސައްކަތް ހުންނާނީ. އަލިފާނުގައި ދުމުގެ އަސަރުކޮށްފައި ހުރި ފާރުތަކުގައި ކުލަލުމާއި އެކަހަލަ މަސައްކަތް މިހާރު ނުނިމި ހުންނާނީ،" އޭނާ ވިދާޅުވިއެވެ.
ސޯޝަލް މީޑިއާގައި އިއްޔެ ދައުރުވި ވީޑިއޯތަކުން، ކުނިތަކުގައި އަލިފާން ރޯވެފައި ހުރި ވަގުތު، ގިނަ ބަޔަކު އެއްވެފައި ތިއްބެވެ. އަދި ބައެއް މީހުން އަލިފާން ނިއްވޭތޯ މަސައްކަތްކުރިއެވެ.
ފުލުހުން އިއްޔެ ވަނީ އެ ހާދިސާ ހިނގަން މެދުވެރިވި ސަބަބު ތަހުގީގު ކުރަމުން އަންނަ ކަމަށް ބުނެފައެވެ.
އެފްޑީސީގެ ފުލެޓުތައް ކައިިރިއަށް ކުނި އަޅައި، ގޮނޑު ކުރުމުގެ މައްސަލަ ވަނީ ވަރަށް ބޮޑުވެފައެވެ. އެގޮތުން ޓަވަރުތައް ކައިރިއަށް ބޮޑެތި ކުނި އަޅާ މީހުން ޖޫރިމަނާ ކުރުމުގެ މަސައްކަތް ވެސް އެފްޑީސީން ކުރެއެވެ.