އިނގިރޭސި ޕްރިމިއާ ލީގުގެ ބޯންމޯތަށް ކުޅެމުންދިޔަ އިނގިރޭސި ފޯވަޑް ޑޮމިނިކް ސޮލާންކީ ޓޮޓްނަމް ހޮޓްސްޕާއަށް ސޮއިކޮށްފިއެވެ.
ކުޅިވަރު ރިޕޯޓުތައް ބުނާ ގޮތުގައި ސޮލަންކީ ސްޕާސްއަށް ސޮއިކޮށްފައިވަނީ 65 މިލިއަން ޕައުންޑްގެ އަގު ހުރި އެއްބަސްވުމެއްގެ ދަށުންނެވެ. ސްޕާސްއިން އެންމެ ފުރަތަމަ 55 މިލިއަން ދިނުމަށް ހަމަޖެހިފައިވާއިރު ބާކީ 10 މިލިއަނަކީ އެހެން ކަންތައްތަކާ ގުޅުވައިގެން ދިނުމަށް ހަމަޖެހިފައިވާ އަދަދެކެވެ.
ސްޕާސްއާ އެކު މިވީ އެއްބަސްވުމާ އެކު އުމުރުން 26 އަހަރުގެ ސޮލާންކީ އެ ކްލަބްގައި 2030 ވަނަ އަހަރާ ހަމައަށް ދެމިހުންނާނެއެވެ.
ސޮލާންކީއަކީ އާ ސީޒަނަށް ސްޕާސްއިން ސޮއިކުރި ހަތަރުވަނަ ކުޅުންތެރިޔާއެވެ. އަނެއް ތިން ކުޅުންތެރިންނަނީ ޔާން މިން ހިޔުކް، ލޫކަސް ބާގްވާލް އަދި އާޗީ ގްރޭއެވެ.
ސްޕާސް ޓީވީއާއި ވާހަކަދައްކަމުން ސޮލާންކީ ވަނީ ސްޕާސްއަކީ ބޮޑު އަދި އޭނާ އެކޭ އެއްގޮތަށް ކާމިޔާބީ ހޯދުމަށް ބޭނުންވާ ކްލަބެއް ކަމަށް ބުނެފައެވެ. އެހެންވެ، އޭނާގެ އާ ޓީމާ ގުޅި އަވަހަށް މަސައްކަތް ފެށުމަށް ތައްޔާރަށް ހުރިކަން ހާމަކުރިއެވެ.
ސޮލާންކީ ބޯންމޯތާއި ގުޅުނީ 2019 ވަނަ އަހަރު ލިވަޕޫލުން 19 މިލިއަން ޕައުންޑްގެ އަގަކަށެވެ. އަދި، އެ އެއްބަސްވުމުގެ ދަށުން މި ފަހަރު މި ކުރި ވިޔަފާރީގެ 20 އިންސައްތަ ވެސް ލިވަޕޫލަށް ލިބޭނެއެވެ.
ނިމުނު ސީޒަންއަކި ސޮލާންކީ ބޯންމޯތުގައި ހޭދަކުރި އެންމެ ކާމިޔާބު އެއް ސީޒަނެވެ. އޭނާ ވަނީ މިދިޔަ ސީޒަންގައި 21 ލަނޑު ޖަހައިފައެވެ.