ޣައްޒާގެ އަލް ތަބައީން ސްކޫލަށް އިޒްރޭލުން އިއްޔެ ދިން ހަމަލާ ރައީސް ޑރ. މުޙައްމަދު މުއިއްޒު މިއަދު ހަރުކަށި އިބާރާތުން ކުށްވެރިކުރައްވައި، އިޒްރޭލު ޖަވާބުދާރީ ކުރުވަން ގޮވައިލައްވައިފިއެވެ.
ރައީސް އެކްސްގައި ކުރެއްވި ޕޯސްޓެއްގައި ވިދާޅުވީ އަލް ތަބައީން ސްކޫލަކީ ޣައްޒާގެ ގެދޮރުގެއްލިފައިވާ ރައްޔިތުން ރައްކާތެރިކަން ހޯދަން ގޮސް ތިބި ތަނެއް ކަމަށާއި، އެ ހަމަލާގައި އަންހެނުންނާއި ކުޑަކުދިންނާއި އުމުރުން ދުވަސްވީ މީހުން ޝަހީދުވެފައިވާ މަންޒަރާއި ޒަޚަމްވެފައިވާ މަންޒަރު ފޮޓޯތަކުން ފެންނަ ކަމަށެވެ.
މިދިޔަ އޮކްޓޯބަރު މަހުގެ ފަހުން ފަލަސްތީނުގެ 39،000އަށް ވުރެ ގިނަ މީހުން ޝަހީދުކޮށްފައިވާކަން ފާހަގަކުރައްވައި ރައީސް ވިދާޅުވީ އިޒްރޭލުން ހަމަލާތައް ހުއްޓާލަން ނޫޅޭ ކަމަށެވެ. އަދި އިޒްރޭލުން ބައިނަލްއަގުވާމީ ގާނޫނާ ޚިލާފުވެފައިވާ ކަމަށް އެ މަނިކުފާނު ވިދާޅުވިއެވެ.
"އާންމު ރައްޔިތުން ރައްކާތެރިކޮށް، އިޒްރޭލު ޖަވާބުދާރިކުރުވަން ބައިނަލްއަގުވާމީ މުޖުތަމައުން ވަގުތުން މަސައްކަތް ކުރަންޖެހޭ،" ރައީސް ވިދާޅުވިއެވެ.
އިޒްރޭލު ފަތުރުވެރިންނަށް ރާއްޖެ ނާދެވޭގޮތަށް އެ ގައުމުގެ ޕާސްޕޯޓު މަނާކުރަން އިމިގްރޭޝަންގެ ގާނޫނަށް އިސްލާހު ގެނައުމަށް ރައްޔިތުންގެ މަޖިލީހަށް ބިލެއް ހުށަހަޅައިފައިވެއެވެ. އެ ބިލު ދިރާސާ ކުރުމަށް ސަލާމަތީ ޚިދުމަތްތަކާ ބެހޭ (241) ކޮމިޓީއަށް ޖޫން މަހުގެ 10ގައި ފޮނުވައިފައިވާއިރު، ބިލުގެ މަސައްކަތް އަދިވެސް ކުރިއަކަށް ނުދެއެވެ.
އެ މައްސަލައިގައި ސަރުކާރަށް ވަނީ ފާޑުކިޔުންތައް އަމާޒުވެފައެވެ.
ޣައްޒާގެ ސިވިލް ޑިފެންސް އޭޖެންސީން ރިޕޯޓުކޮށްފައިވާ ގޮތުގައި އިއްޔެގެ ހަމަލާގައި ފަލަސްތީނުގެ 100އަށް ވުރެ ގިނަ މީހުން ޝަހީދުކޮށްފައިވެއެވެ.
އިޒްރޭލުގެ ހަމަލާތައް ޣައްޒާގެ ރައްޔިތުންގެ ގެދޮރަށް އަމާޒުކޮށް، އެ މީހުން މަގުމަތި ކުރަމުންދާއިރު، އިޒްރޭލުން ދަނީ ވަގުތީ ހިޔާތަކަށް ވެސް ހަމަލާތައް ދެމުންނެވެ. އެގޮތުން ފާއިތުވި ދުވަސްތަކުގައި އެފަދަ އިމާރާތްތަކާއި ރެފިއުޖީ ކޭމްޕުތަކަށް ދޭ ހަމަލާތައް ވަނީ އިތުރުކޮށްފައެވެ.
އދ.އިން އާންމުކޮށްފައިވާ ތަފާސްހިސާބުން ދައްކާ ގޮތުގައި މިދިޔަ މަހުގެ ހަޔަކާ ހަމައަށް އިޒްރޭލުންވަނީ ޣައްޒާގެ 564 ސްކޫލްގެ ތެރެއިން 477 ސްކޫލަކަށް ހަމަލާ ދީފައިވެއެވެ.