ސީރިޔާގެ ގޯލާން ހައިޓްސްގެ ބިންތަކުގައި އިޒްރޭލުން ވަޒަންވެރިވުމަށް ކުރަމުންގެންދާ މަސައްކަތްތަށް ފުޅާކުރުމަށް އިޒްރޭލުގެ ސަރުކާރުން ނިންމާފައިވާ ނިންމުން ދިވެހި ސަރުކާރުން ހަރުކަށި އިބާރާތުން ކުށްވެރިކޮށްފިއެވެ.
އިސްރާއީލްގެ ސަރުކާރުން ވަނީ، އިސްރާއީލުން ހިފައިފައިވާ ސީރިއާގެ ގޯލާން ހައިޓްސްގައި ޔަހޫދީން ވަޒަންވެރިކުރުން އިތުރުކުރުމަށް ބޮޑުވަޒީރު ބެންޖަމިން ނަތަންޔާހޫ ހުށަހެޅުއްވި ރޭވުމެއް ފާސްކޮށްފައެވެ.
ފޮރިން މިނިސްޓްރީން ނެރުނު ބަޔާނެއްގައި ވަނީ މި ނިންމުމަކީ ބައިނަލްއަގުވާމީ އެންމެހާ ގާނޫނުތަކާ ކަނޑައެޅިގެން ޚިލާފު ނިންމުމެއް ކަމަށާއި މިކަމުގެ ސަބަބުން، އެ ސަރަހައްދުގައި ސުލްހަ ގާއިމުކުރުމަށް ކުރަމުންދާ މަސައްކަތްތަކަށް އިތުރު ގޮންޖެހުންތަކެއް ކުރިމަތި ކުރުވާނެ ކަމަށް ގަބޫލުކުރެވޭ ކަމަށެވެ.
ބައިނަލްއަގްވާމީ ގާނޫނާ ޚިލާފަށް ސީރިޔާގެ ގޯލާން ހައިޓްސްގެ ބިންތަކަށް ނުޙައްގުން ވެރިވެގަތުމަށް އިސްރާއީލުން ހިންގަމުންގެންދާ ޖަރީމާތައް ހުއްޓުވުމަށާއި، އިސްރާއީލުން ސީރިޔާއަށް ދެމުންގެންދާ އުދުވާނީ ހަމަލާތަށް ނިމުމަކަށް ގެނެސް އދ.ގެ ކަމާބެހޭ ގަރާރުތަކަށް ހުރުމަތްތެރިކޮށް ހިތުމަށް، އިޒްރޭލަށް މަޖުބޫރުކުރުވުމަށް އަޅަންޖެހޭ އަވަސް ފިޔަވަޅުތައް އެޅުމަށް ބައިނަލްއަގުވާމީ މުޖުތަމައަށް ދިވެހި ސަރުކާރުން ގޮވާލާ ކަމަށް ވެސް ބަޔާނުގައި ވަނީ ބުނެފައެވެ.
މީގެ އިތުރުން، 1967 ވަނަ އަހަރުން ފެށިގެން ސީރިޔާގެ ގޯލާން ހިފާފައިވާކަން ފާހަގަކޮށް ސަލާމަތީ މަޖިލީހުގެ ގަރާރު 497 (1981) ފަދަ އދ.ގެ ކަމާގުޅޭ ގަރާރުތަކަށް އަމަލުކުރުމަށް ސަރުކާރުން ވަނީ އިސްރާއީލަށް އިލްތިމާސްކޮށްފައެވެ.
ސީރިއާގެ މިނިވަންކަމާއި، ސިޔާދަތާއި، ސަރަޙައްދީ ސަލާމަތަށް ތާއީދުކުރުމުގައި ރާއްޖެ ދެމި އޮންނާނެ ކަމަށާއި ސީރިޔާގެ ރައްޔިތުންގެ އުންމީދުތައް ހާސިލްވާނެ ގޮތަށް، އެ ގައުމުގައި ސުލްހައާއި، ސަލާމަތާއި، އިސްތިގްލާލު ގާއިމްކުރުމަށް ކުރެވޭ ސަރަހައްދީ އަދި ބައިނަލްއަގުްވާމީ ހުރިހާ މަސައްކަތަކަށް ރާއްޖެއިން ފުރިހަމައަށް އެއްބާރުލުން ދޭނެ ކަމުގެ ޔަގީންކަން އެ ބަޔާނުގައި ވަނީ އަރުވާފައެވެ.
ސީރިއާގެ ރައީސް ބައްޝާރުލް އަސަދުގެ ވެރިކަން ވައްޓާލުމާ ގުޅިގެން އިސްރާއީލުން ވަނީ އެ ގައުމަށްދޭ ހަމަލާތައް ވަރުގަދަކޮށް އެގައުމުގެ ދެކުނުގައި އޮންނަ ތިން އަވަށެއް ހިފައިފިއެވެ.
މީގެ އިތުރުން އިސްރާއީލުން ވަނީ 1974 ވަނަ އަހަރު ސީރިއާއާއެކު ވެފައިވާ އެއްބަސްވުން ބާތިލުވެފައިވާކަން އިއުލާންކޮށް، 1967 ވަނަ އަހަރުން ފެށިގެން އިސްރާއީލުން ހިފާފައިވާ ގޯލާން އުސްބިންތަކަށް ސިފައިން ފޮނުވާފައެވެ.
ގޯލާން އުސްބިންތަކުގެ 30 އަށްވުރެ ގިނަ ތަންތަން އިސްރާއީލުން ހިފާފައިވާއިރު، އެއީ ގާތްގަނޑަކަށް 20،000 މީހުންގެ ގެދޮރެވެ. އެއީ ބައިނަލްއަގްވާމީ ގާނޫނުތަކުގެ ދަށުން ގާނޫނާ ޚިލާފު އަމަލެއް ނަމަވެސް އެކަމާ އިސްރާއީލުން ދެބަސްވެއެވެ.
އެމެރިކާއާއި ގިނަ އަރަބި ގައުމުތަކުން ވަނީ އިސްރާއީލުގެ އެ އަމަލު ކުށްވެރިކޮށްފައެވެ.