އދ. ހަންޏާމީދޫގެ ގެއެއްގައި އަލިފާން ރޯވެ، އެއްކޮށް އަނދާ ހުލިވެއްޖެއެވެ.
މި ކަމާ ގުޅިގެން ނެޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ)އިން ކޮށްފައިވާ ޕޯސްޓެއްގައި ވަނީ އދ. ހަންޏާމީދޫގައި ރޭ ދަންވަރު އަލިފާނުގެ ހާދިސާއެއް ހިނގައި ދިރިނޫޅެވޭ ވަރަށް އެ ތަނަށް ގެއްލުން ލިބިފައިވާ ކަމަށެވެ.
އެކަމަކު، އެ ހާދިސާއާ ގުޅޭ މާ ބޮޑު ތަފުސީލެއް ހިއްސާކޮށްފައެއް ނުވެއެވެ.
އެންޑީއެމްއޭއިން ބުނީ، ހާލުގައި ޖެހުނު ފަރާތަށް އެހީތެރިކަން ފޯރުކޮށްދިނުމުގެ މަސައްކަތް ކައުންސިލާ ގުޅިގެން އެ އޮތޯރިޓީން ކުރަމުން އަންނަ ކަމަށެވެ.
މި ހާދިސާއާ ގުޅޭ ގޮތުން މިހާތަނަށް ހަންޏާމީދޫ ކައުންސިލްގެ ބަހެއް ވެސް ލިބިފައެއް ނުވެއެވެ.
އެމްއެންޑީއެފުން ބުނީ، އެ ކަހަލަ ހާދިސާއެއް ހިނގައިގެން ރޭ ރިޕޯޓެއް ކޮށްފައިނުވާ ކަމަށެވެ. އެހެންވެ، ހާދިސާއާ ގުޅޭ ތަފުސީލެއް މިހާތަނަށް ލިބިފައެއް ނުވެއެވެ. އަދި، ހާދިސާ ހިނގަން މެދުވެރިވީ ކީއްވެކަމެއް ވެސް އެނގިފައެއް ނުވެއެވެ.
އދ. ހަންޏާމީދޫގައި ރޭ ދަންވަރު ހިނގި އަލިފާނުގެ ހާދިސާ--- ފޮޓޯ/ އެންޑީއެމްއޭ
ގޭގޭގަޔާއި ޕާކިން ޒޯންފަދަ ތަންތަނުގައި އަލިފާން ރޯވެ، މި ފަދަ ހިތާމަވެރި ހާދިސާތައް ދޭތެރެއަކުން ހިނގައެވެ.
އަލިފާނުގެ ހާދިސާތަކުގައި އަސަރުކުރާ އާއިލާތަކަށް އެންޑީއެމްއޭއިން ވަގުތީ ބޯހިޔާވަހިކަން ފޯރުކޮށްދެއެވެ.