އިންޑިއާގެ އެގްޒިމް ބޭންކުން ދޫކޮށްފައިވާ 800 މިލިއަން ޑޮލަރުގެ ލައިން އޮފް ކްރެޑިޓް ފެސިލިޓީގެ ދަށުން ރާއްޖޭގެ 28 ރަށެއްގައި ގާއިމުކޮށްފައިވާ ފެނާއި ނަރުދަމާ ނިޒާމްގެ މަސައްކަތްތައް ނިންމައި ދިވެހި ސަރުކާރާ މިއަދު ހަވާލުކޮށްފިއެވެ.
އެ މަޝްރޫއުތައް ރާއްޖެއާ ހަވާލުކޮށްފައިވަނީ މިއަދު މެންދުރު ރައީސް އޮފީހުގައި ބޭއްވި ރަސްމިއްޔާތުގައި އިންޑިއާގެ އެކްސްޓާނަލް އެފެއާޒް މިނިސްޓަރު ޑރ. ސުބްރަމާނިއަމް ޖައިޝަންކަރެވެ. ރާއްޖޭގެ ފަރާތުން އެ މަޝްރޫއުތަކާ ހަވާލުވީ، ފޮރިން މިނިސްޓަރު މޫސާ ޒަމީރެވެ.
އަށާވީސް ރަށެއްގައި ކުރިއަށް ގެންދިޔަ މި މަޝްރޫއުތަކުގެ ތެރޭގައި ހިމެނެނީ ފެނާއި ނަރުދަމާގެ މަސައްކަތް ކުރިއަށް ގެންދިޔަ ހަތަރު ރަށަކާއި، ފެނުގެ މަސައްކަތް ކުރިއަށް ގެންދިޔަ 22 ރަށެއްގެ އިތުރުން ނަރުދަމާގެ މަސައްކަތް ކުރިއަށް ގެންދިޔަ ދެ ރަށެކެވެ.
ފެނާއި ނަރުދަމާގެ މަސައްކަތް ކުރިއަށް ގެންދިޔަ ރަށްތައް:
- ވ. ފުލިދޫ
- ވ. ތިނަދޫ
- ދ. ބަނޑިދޫ
- ފ. ދަރަނބޫދޫ
28 ރަށެއްގައި ގާއިމްކޮށްފައިވާ ފެނާއި ނަރުދަމާ ނިޒާމްގެ މަސައްކަތްތައް ނިންމައި ދިވެހި ސަރުކާރާ ހަވާލުކުރުމުގެ ރަސްމިއްޔާތުގެ ތެރެއިން: ރައީސް މުއިއްޒާއި ހައި ކޮމިޝަނަރު މުނު މަހާވަރު ވަނީ ބައިވެރިވެވަޑައިގެންފައި -- ފޮޓޯ/ ރައީސް އޮފީސް
ފެނުގެ މަސައްކަތް ކުރިއަށް ގެންދިޔަ ރަށްތައް:
- ހއ. ކެލާ
- ށ. ފުނަދޫ
- ނ. މަނަދޫ
- ކ. ކާށިދޫ
- ޅ. ކުރެންދޫ
- ވ. ފެލިދޫ
- ދ. މީދޫ
- ފ. ބިލެއްދޫ
- ލ. މާބައިދޫ
- ލ. އިސްދޫ - ކަލައިދޫ
- ލ. މާމެންދޫ
- ލ. ގަން
- މ. ކޮޅުފުށި
- މ. މުލި
- މ. މަޑުއްވަރި
- ތ. ހިރިލަންދޫ
- ގއ. މާމެންދޫ
- ގއ. ދާންދޫ
- ގއ. ގެމަނަފުށި
- ގދ. ފަރެސްމާތޮޑާ
- ގދ. ހޯޑެއްދޫ
- ގދ. މަޑަވެލި
ނަރުދަމާގެ މަސައްކަތް ކުރިއަށް ގެންދިޔަ ރަށްތައް:
- އއ. ތޮއްޑޫ
- އދ. ދަނގެތި
މި ޕްރޮޖެކްޓުގެ ދަށުން އެންމެ ޒަމާނީ ޓެކްނޮލޮޖީގެ އެހީގައި ޚިދުމަތްތައް ލިބޭނެއެވެ.
އެ ގޮތުން، ފެން ޕްލާންޓުތައް ގާއިމުކުރުމާއި ފެން މީޓަރުތައް ހަރުކުރާނެއެވެ. އަދި، އޮފީސް އިމާރާތްތައް އަޅާ، އެ އިމާރާތްތަކުގެ ފުރާޅުގައި ސޯލާ ޕެނަލް ހަރުކުރާނެއެވެ. އާރުއޯ ޕްލާންޓްތައް ހިންގުމަށް ހޭދަކުރާ ހަކަތައިން ބައެއް، އިއާދަކުރުވަނިވި ހަކަތައިން ފޯރުކޮށްދިނުމުގެ ނިޒާމު ވެސް ގާއިމުކުރާނެއެވެ.
މި މަޝްރޫއާ ގުޅޭގޮތުން ވާހަކަދައްކަވަމުން ޖައިޝަންކަރު ވިދާޅުވީ، މަޝްރޫއުގެ ސަބަބުން 28،000 ދިވެހި ރައްޔިތުންނަށް ފައިދާވާނެ ކަމަށް ގަބޫލުކުރައްވާ ކަމަށެވެ. އަދި، އެ މަޝްރޫއާ އެކު އެންމެ ފަހުގެ ޓެކްނޮލޮޖީގެ އެހީގައި ސާފު ބޯފެން ފޯރުކޮށްދޭނެ ކަމަށް ވެސް އޭނާ ވިދާޅުވިއެވެ.