ރިޔާސީ އިންތިޚާބު ތެރޭގައި ރައީސް ޑރ. މުހައްމަދު މުއިއްޒު ދެއްކެވި ވާހަކަފުޅުތަކަށް މިހާރު ވަނީ 180 ޑިގްރީގެ ބަދަލެއް އައިސްފައި ކަމަށް ކުރީގެ ރައީސް އަބްދުﷲ ޔާމީން އަބްދުލްގައްޔޫމް ރޭ ވިދާޅުވެއްޖެއެވެ.
ޔާމީން އުފެއްދެވި ޕާޓީ، ޕީޕަލްސް ނެޝަނަލް ފްރަންޓް (ޕީއެންއެފް)އިން ބޭއްވި ޖަލްސާގައި ވާހަކަދައްކަވަމުން އެމަނިކުފާނު ވަނީ ރައީސް މުއިއްޒަށާއި އެމަނިކުފާނުގެ ޕާޓީގެ ޗެއާޕާސަންކަން ކުރައްވާ، ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲއަށް ވަރަށް ބޮޑަށް ފާޑުވިދާޅުވެފައެވެ.
އެގޮތުން މިދިޔަ އަހަރު ބޭއްވި ރިޔާސީ އިންތިޚާބުގެ ދުވަސްވަރު އޭރު ކެންޑިޑޭޓެއްގެ ގޮތުގައި ހުންނަވައި ރައީސް މުއިއްޒު ދެއްކެވި ވާހަކަފުޅުތަކާ، މިހާރު އެމަނިކުފާނުގެ އަރިހުގައި ތިއްބަވާ ބޭފުޅުން ހަރުގެ ޖަލްސާތަކުގައި ދައްކަވާ ވާހަކަތައް ވަރަށް ތަފާތު ކަަމަށް ފާހަގަކުރެއްވިއެވެ.
އޭގެ މިސާލެއްގެ ގޮތުން އެމަނިކުފާނު ނެންގެވީ މަސްވެރިކަމެވެ. އެގޮތުން ރާއްޖޭގެ މަސްވެރިކަން ކުރިއަރުވާނެ ކަމުގެ ވައުދުފުޅާއެކު ރައީސް ވެރިކަމަށް ވަޑައިގަތް ނަމަވެސް މިހާރު މަސްވެރިން ދަނީ ދަށަށް ކަމަށް ޔާމީން ވިދާޅުވިއެވެ.
މުޅި ރާއްޖެތެރޭގެ އިގްތިސާދު ހިފަހައްޓަނީ ކޮން ބައެއްތޯ؟ މަސްވެރިންގެ އަދަދު މަދުވަމުން އައިސް މިހާރު 15 ޕަސެންޓު 17 ޕަސެންޓަށް އެރިއިރު މީގެ ކުރިން މިއަށް ވުރެ މާގިނައޭ. އެހެންނަމަވެސް ރާއްޖޭގެ މަސްވެރިކަން މިހާރު ގޯސްވެގެން މިދަނީ ސަރުކާރުގެ ޕޮލިސީތައް ގޯސްވާތީ،
ޔާމީން ވިދާޅުވީ އެކަމަށް މި ސަރުކާރުގައި ދޭނެ ޖަވާބެއް ނެތް ކަމަށެވެ.
ޕީއެންއެފްއިން ރޭ ބޭއްވި ޖަލްސާގެ ތެރެއިން: ރައީސް ޔާމީނާއި އެ ޕާޓީގެ އިސްވެރިން ބައިވެރިވެވަޑައިގަންނަވަނީ -- ސަން ފޮޓޯ/ މޫސާ ނަދީމް
އެ ވާހަކަތަކާ މިހާރު 180 ޑިގްރީގެ ބަދަލެއް އައީމަ، އަދި ނޫ ޖަގަހައިގެ [ޕީއެންސީ ޖަގަހަ] ތެރޭގައި އެ ދައްކާ ވާހަކައަކުން ބަދަލު އައި ގޮތެއް ބުނެއެއްނުދެވޭ،
އެ ވާހަކައާ ގުޅުވައި އެމަނިކުފާނު ވަނީ އަބްދުއްރަހީމަށް ވެސް ފާޑުވިދާޅުވެފައެވެ.
އެގޮތުން ރައްޔިތުންނާ ގުޅުން ހުރި ހުރިހާ ކަމެއް ބެލުން އޮތީ ރައްޔިތުންގެ މަޖިލީހަށް ކަމަށް ވާއިރު، ރައްޔިތުންގެ މަޖިލީހުގެ ރައީސް ކިތަންމެ ވަރަކަށް އެ މަޖިލީހާ ގާނޫނުއަސާސީން މަތިކޮށްފައި އޮތް ޒިންމާ އަދާކުރާނަމޭ ވިދާޅުވި ނަމަވެސް ރައްޔިތުންނާ ގުޅުން ހުރި އެފަދަ މުހިންމު ކަންކަމަށް ޖަވާބުދާރީ ނުވެވޭނަމަ އެ މަސްއޫލިއްޔަތު އަދާކުރެވޭ ކަމަކަށް ނުވާނެ ކަމަށް ޔާމީން ވިދާޅުވިއެވެ.
ޖަގަހަ ޖަލްސާތަކުގައި އަބްދުއްރަހީމް ވާހަކަދައްކަވަނީ ރައްޔިތުންނަށް ޖަވާބުދާރީ ވާންޖެހޭ ގޮތަކަށް ނޫން ކަމަށް ވެސް އެމަނިކުފާނު ވިދާޅުވިއެވެ. ހަމައެއާއެކު މަޖިލީހުގައި ވެސް ބަލަނީ މެޖޯރިޓީ ޕާޓީ، ޕީއެންސީން ބޭނުންވާ މައްސަލަތަކެއް ކަމަށާއި ބަލަން ޖެހޭ މައްސަލަތައް ނުބަލާ ކަމަށް ވެސް ޔާމީން ތުހުމަތުކުރެއްވިއެވެ.
ހަމައެއާއެކު އަބްދުއްރަހީމްގެ ވާހަކަފުޅުތަކުން ފެންނަނީ ރައީސް މުއިއްޒުގެ އަޚުލާގު ހުންނަވާނެ ގޮތް ކަމަށް ޔާމީން ވިދާޅުވިއެވެ.
ރައީސް އެބަ ވިދާޅުވޭ ތިމަންނަގެ ރޯލް މޮޑަލްއޭ އަބްދުއްރަހީމަކީ. އެހެންވީމާ އަބްދުއްރަހީމް އެ ދައްކާ ވާހަކައިން ރައީސް މުއިއްޒުގެ އަހުލާގު ރައްޔިތުންނަށް ނުފެނޭތޯ؟ އެ ފެންނަނީ އެ ރިފްލެކްޝަންއިން ރައީސް މުއިއްޒުގެ އަހްލާގެއް ނޫންތޯ؟،
ޕީއެންއެފްއިން ބާއްވާ ޖަލްސާތަކުގައި، ޔާމީންގެ ކުރީގެ ވަރަށް އަރިސް ބޭފުޅެއް ކަމަށްވާ އަބްދުއްރަހީމާއި މުޅި ސަރުކާރަށް ވަރަށް ބޮޑަށް ފާޑުކިޔައެވެ.
ހަމައެއާއެކު އަބްދުއްރަހީމް ވެސް ވަނީ ޔާމީންގެ ވާހަަކަފުޅުތަކަށް ރައްދު ދެއްވާފައެވެ. އެންމެ ފަހުން އެ ޕާޓިން ބޭއްވި ހަރުގެ ޖަލްސާގައި "ކުޅަނދުރު ހަތައަށް އޮއްގާ އުކަން ނުހަދަން" ގޮވައިލައްވައި، އެ މަނިކުފާނު ވަނީ ޔާމީނަށް ބަހުގެ ހަމަލާތައް ރައްދުކުރައްވާފައެވެ.