ޓެލްއަވީވު (8 އޮގަސްޓް 2024): ހަމާސް ޖަމާއަތް އަސްކަރީ ގޮތުން ބަލިކޮށް މިނިވަންކަމުގެ ނަމުގައި އެޖަމާއަތުން ފަތުރާ އަޑުތައް ކަނޑުވާލުމަށްޓަކައި ޣައްޒާގެ އާބާދީގައި ހިމެނޭ 2.3 މިލިޔަން މީހުންގެ ތެރެއިން އެއް މިލިޔަން މީހުން މަރާލުމަށް އިސްރާއީލު ކުޑަކޮށް ވެސް ފަސްނުޖެހޭނެކަމުގެ އިންޒާރު އިސްރާއީލުގެ މާލީ ވަޒީރު ބެންޒައޭލް ސްމޮތްރިޗް ދީފިއެވެ.
ތެލްއަވީވުގައި ހަމާސްއާ ދެކޮޅަށް ދިން ބާޔާނެއްގައި ސްމޮތްރިޗް ބުނީ، ޣައްޒާގައި އިސްރާއީލު ބޭނުންވާ ސިޔާސީ އަދި އަސްކަރީ މަގުސަދުތަކަކީ ހަމާސް ބަލިކޮށްލުމާއި ހަމާސްގެ އަތްދަށުގައިވާ އިސްރާއީލުގެ އަސީރުން މިނިވަންކުރުމުގެ އިތުރުން ދުނިޔޭގެ ކަންކޮޅުތަކުން ޔަހޫދީން ގެނެސް ޣައްޒާގައި ވަޒަންވެރިކުރުވުން ކަމުގައެވެ.
މި ކަމަށްޓަކައި ޣައްޒާގެ ރައްޔިތުންގެ ތެރެއިން އެއް މިލިއަން މީހުން މަރާލުމަކީ އަޚުލާގީ ގޮތުންނާއި އިންސާފުވެރިކަމުގެ ގޮތުން ކުރަން އެންމެ ރަނގަޅުކަމެއް ކަމަށް ސްމޮތްރިޗް ބުންޏެވެ. މިކަން ގޯސްކަމެއްގެ ގޮތުގައި އެމެރިކާ ވެސް އަދި ޔޫރަޕް ވެސް ނުދެކޭނެކަމާ އަދި އެއް މިލިއަން މީހުން މަރާލިޔަސް އެމެރިކާއާއި ޔޫރަޕުން އިސްރާއީލާ ދެކޮޅަށް ދަތިކުރުމުގެ އެއްވެސް ފިޔަވަޅެއް ނާޅާނެކަމުގެ ޔަގީންކަން އިސްރާއީލަށް އޮތްކަމަށް އޭނާ ބުންޏެވެ.
ބެންޒައޭލް ސްމޮތްރިޗަކީ 1948 ވަނަ އަހަރު ފަލަސްތީނުގެ ބިމުގައި އިސްރާއީލުގެ ނަމުގައި ޔަހޫދީ ދައުލަތެއް ހުޅަނގުގެ އިސްތިއުމާރީ ބާރުތަކުގެ އެހީގައި އުފެއްދުމާ އެކު ފަލަސްތީނުގެ ބިމަށް ބޭރުން ހިޖުރަކުރި ޔަހޫދީ ޖީލަށް ނިސްބަތްވާ މީހެކެވެ. ސްމޮތްރިޗް ނިސްބަތްވަނީ އެ ދުވަސްވަރު ފަލަސްތީނުގެ ބިމަށް އިރުމަތީ ޔޫރަޕުން ހިޖުރަކުރި ޔަހޫދީ އާއިލާއަކަށެވެ.
އޭނާއަކީ އިސްރާއީލުގައި މިހާރު އުފައްދާފައިވާ ކޯލިޝަން ސަރުކާރުގައި ހިމެނޭ މައިގަނޑު ތިން ޕާޓީގެ ތެރެއިން އެއް ޕާޓީ ކަމަށްވާ ރެލިޖަސް ޒައޮނިސްޓް ޕާޓީގެ ވެރިޔާއެވެ.
ރެލިޖަސް ޒައޮނިސްޓް ޕާޓީއަކީ ޔަހޫދީންގެ ދީނީ ކަންކަމުގައި ހައްދު ފަހަނަޅާފައިވާ ޕާޓީއެކެވެ. ޔަހޫދީން ޝަރީއަތުގެ ނަމުގައި ގެންގުޅޭ ބޯދާ އުސޫލުތައް ފިޔަވައި އެހެން އެއްވެސް އެއްޗެއް ގަބޫލުނުކުރާ އަދި ބައިނަލްއަގުވާމީ ގާނޫނުތަކާއި ގަވައިދުތަކަށް އެއްވެސް ވަރަކަށް އިހުތިރާމުނުކުރާ ހަރުކަށި ޕާޓީއެކެވެ. އިސްރާއީލުގެ ވާތު ފިޔައިގެ މީހުން އޭނާ ސިފަކުރަނީ ޔަހޫދީންގެ "އައިއެސް" ފިކުރުގެ ލީޑަރުގެ ގޮތުގައެވެ.
އިސްރާއީލު ވެރިވެގަނެގެން އުޅޭ ފަލަސްތީނުގެ ހުޅަނގު އައްސޭރީގައި ފަލަސްތީނުގެ އާންމުންނާ ދެކޮޅަށް ޔަހޫދީ ވަޒަންވެރިން ހިންގާ ޓެރަރިސްޓް ހަރަކާތްތަކުގެ ފަހަތުގައިވާ އެންމެ އިސް އެއް ފަރާތަކީ ވެސް އޭނާއެވެ. ސްމޮތްރިޗް ބުނި ގޮތުގައި އަސްކަރީ ހަމާލާތައް ދޭއިރު ޣައްޒާގެ އާންމުންނަކަށް އެއްވެސް ވަރަކަށް އިސްރާއީލުން ނުބަލާނެއެވެ.
"އާންމުން ކިތަންމެ ވަރަކަށް މަރުވިޔަސް ދޭންބޭނުންވާ ހަމަލާތަކެއް ހޮސްޕިޓަލްތަކަށް ވެސް އަދި ސްކޫލުތަކަށް ވެސް އަދި އާންމުން ދިރިއުޅޭ އާދައިގެ ފޭލިގެތަކަށް ވެސް އިސްރާއީލުން ދޭނެ،" ސްމޮތްރިޗް ބުންޏެވެ.
ހަމާސްގެ ހިތްވަރާއި އަޒުމު ފުނޑާލުމަށްޓަކައި ޣައްޒާގެ އާންމުންނަށް ބޭނުންވާ ކާބޯތަކެތި ރައްކާކުރާ ގުދަންތަކަށް ހަމަލާދީ އެ ތަންތަން އަންދާލައި ބަނޑަށް ޖައްސައިގެން ޣައްޒާގެ ގިނަ ބަޔަކު މަރާލުމަށް ވެސް ދާދިފަހުން އޭނާވަނީ ފާޅުގައި ގޮވާލާފައެވެ.
ސްމޮތްރިޗްގެ މި ގޮވާލުމަށް އިންސާނީ ހައްގުތަކުގެ ނަމުގައި ޕްރޮޕަގެންޑާކުރާ އެމެރިކާއާއި ޔޫރަޕްގެ ގައުމުތަކުން ދެނަހުރި ކަމަށް ވެސް ހަދާފައެއް ނުވެއެވެ. އަދި، ކޮންމެ ދުވަހަކު އިސްރާއީލުން ޣައްޒާގެ ރެފިއުޖީންނަށް ހަމަލާދީ ހިންގަމުން ގެންދާ ގަތުލުއާންމުތައް ހުޅަނގުގެ ގައުމުތަކަށް ވެސް އަދި ޔަހޫދީން ކޮންޓްރޯލްކުރާ އަދި ހުޅަނގުގެ މީޑިއާތަކަށް ވެސް ފެންނަ ކަމަކަށް ނުހަދައެވެ.
ނަމަވެސް، އެމެރިކާގެ ޚާރިޖީ ވަޒީރު އެންޓަނީ ބްލިންކެން އިއްޔެ ވެސް ވަނީ އިންސާނީ ހައްގުތައް ހިމާޔަތް ނުކުރެވޭނަމަ އެމެރިކާ މަޑުން ނޯންނާނެކަމަށް ބުނެ ބަންގްލަދޭޝްގެ އަސްކަރިއްޔާއަށް އިންޒާރެއް ދެއްވާފައެވެ. އިނގިރޭސި ޚާރިޖީ ވަޒީރު ވެސް ވަނީ ބަންގްލަދޭޝްގެ ހަމަނުޖެހުންތަކުގައި އާންމުން މަރުވަމުން ދިޔުމަކީ ގަބޫލު ކުރެވޭނެ ކަމެއް ނޫންކަމަށް ވިދާޅުވެ ބަންގްލަދޭޝަށް އިންޒާރު ކުރައްވާފައެވެ.