އިސްރާއީލުގެ ބޮޑު ވަޒީރު ބެންޖަމިން ނަތަންޔާހޫ ހިމެނޭހެން އިސްރާއީލުގެ އިސް އޮފިޝަލުންނަށް މިނިވަންކަމާ އެކު ޕޮލެންޑަށް ދަތުރުކުރެވޭނެ ކަމަށް އެ ގައުމުގެ ސަރުކާރުން ބުނެފިއެވެ.
ޕޮލެންޑުގެ ބޮޑު ވަޒީރު ޑޮނަލްޑް ޓަސްކުގެ އޮފީހުން ނެރުނު ބަޔާނެއްގައި ބުނީ، ދެވަނަ ބޮޑު ހަނގުރާމައިގައި ނާޒީން ގާއިމުކުރި އޮޝްވިޓްޒް-ބިރްކެނައު ކޮންސެންޓްރޭޝަން ކޭމްޕް މިނިވަން ކުރިތާ 80 އަހަރު ފުރުން ފާހަގަކުރުމަށް މި މަހު ފަހުކޮޅު ބާއްވާ ހަފުލާގައި ބައިވެރިވުމަށް އިސްރާއީލުގެ ބޮޑު ވަޒީރަށާއި އިސް ވެރިންނަށް ޕޮލެންޑަށް ދަތުރުކުރެވޭނެ ކަމަށެވެ.
ޕޮލެންޑު ސަރުކާރުން އެ މީހުންގެ ރައްކާތެރިކަން ކަށަވަރުކޮށްދޭނެ ކަމަށް ވެސް އެ ބަޔާނުގައި ބުނެފައިވެއެވެ.
ޕޮލެންޑުން އެގޮތަށް ބުނީ، އިސްރާއީލުން ޣައްޒާއާ ދެކޮޅަށް ކުރަމުން އަންނަ ހަނގުރާމައިގައި، ހަނގުރާމައިގެ ޖަރީމާތަކެއް ހިންގި ކަމަށް ތުހުމަތުކުރެވޭ މައްސަލައިގައި އިންޓަނޭޝަނަލް ކްރިމިނަލް ކޯޓު (އައިސީސީ)ން ނަތަންޔާހޫ ހައްޔަރުކުރުމުގެ އަމުރެއް ނެރެފައިވަނިކޮށެވެ.
ނޮވެމްބަރު މަހު އައިސީސީން ނެރުނު އެ އަމުރުގައި ނަތަންޔާހޫއާއި އޭނާގެ ކުރީގެ ދިފާއީ ވަޒީރު ޔޯވް ގަލަންޓްގެ އިތުރުން ހަމާސްގެ ކޮމާންޑަރު އިބްރާހިމް އަ މަސްރީ މުހައްމަދު ޟައިފް ވެސް ހައްޔަރުކުރާނެ ކަމަށް ވަނީ ބުނެފައެވެ.
އިސްރާއީލުން އެ އަމުރު ކުށްވެރިކޮށް، ޣައްޒާއަށް ހަމަލާ ދޭން ފެށީ އޮކްޓޫބަރު 7، 2023 ގައި ހަމާސްއިން އިސްރާއީލަށް ދިން ހަމަލާގެ ސަބަބުން އަމިއްލަ ދިފާއުގައި ކަމަށް ބުނެފައެވެ. އައިސީސީގެ މެންބަރު ގައުމުތަކުގެ އަދަދު 124އަށް އަރާއިރު، ހައްޔަރުކުރުމުގެ އަމުރު ރައްދުވާ ފަރާތަކު އޭގެ ތެރެއިން ގައުމަކަށް ޒިޔާރަތް ކުރުމުން ހައްޔަރުކުރަން ލާޒިމުވާނެއެވެ.
އެގޮތުން، އައިސީސީގެ މެމްބަރު ގައުމެއްގެ ގޮތުގައި އޮތް ޕޮލެންޑަށް ނަތަންޔާހޫ ނުވަތަ ގަލަޓް ވެސް ޒިޔާރަތްކޮށްފިނަމަ، ހައްޔަރުކުރަން ޖެހޭނެއެވެ. ނަމަވެސް، އިސްރާއީލަކީ އައިސީސީގެ މެންބަރު ގައުމެއް ނޫންކަމުން އެފަދަ އަމުރުތައް ތަންފީޒުކުރުމުގެ ބާރު އައިސީސީއަކަށް ނޯވެއެވެ.
އައިސީސީއަކީ ހަނގުރާމައިގެ ކުށްތަކާއި، އިންސާނިއްޔަތާ ޚިލާފު ކުށްތަކާއި، ގަތުލުއާންމުތަކުގެ މައްސަލަތައް ބަލާ ދުނިޔޭގެ އެންމެ މަތީ ކޯޓެވެ. އައިސީސީ އެކުލަވައިލީ 1998 ވަނަ އަހަރެވެ.