ތައިލޭންޑުގެ ރަސްކަމާ ދެކޮޅަށް ވާހަކަދެއްކުން މަނާކުރާ ގާނޫނޫ އިސްލާހުކުރުމަށް ވާކާލާތު ކުރާތީ، އެ ގައުމުގެ އެންމެ މަގުބޫލު ސިޔާސީ ބޭފުޅާ ސިޔާސީ ކަންކަމުން 10 އަހަރަށް ސަސްޕެންޑުކޮށް އޭނާގެ ޕާޓީ ވެސް އުވާލަން ކޯޓުން އަމުރުކޮށްފިއެވެ.
މޫވް ފޯވާޑް ޕާޓީ (އެމްއެފްޕީ)އާއި ޒުވާން އަދި ކުރީގެ ލީޑަރު ޕިޓާ ލިމްޖަރޯއެންރަޓްއާއި އިތުރު 10 އިސް ބޭފުޅަކަށް ކުރިއަށް އޮތް 10 އަހަރު ދުވަހު ސިޔާސީ ހަރަކާތްތަކުގައި ބައިވެރިވުން ކޯޓުން ވަނީ މަނާކޮށްފައެވެ.
ރަސްކަމާ ދެކޮޅަށް ވާހަކަދެއްކުން މަނާކުރާ ގާނޫނު އިސްލާހު ކުރުމަށް މޫވް ފޯވާޑް ޕާޓީން ވި ވައުދަކީ ގާނޫނުއަސާސީއާ ހިލާފު ވައުދެއް ކަމަށް މިދިޔަ ޖެނުއަރީ މަހު އެ ކޯޓުން ނިންމާފައިވާތީ، ތައިލެންޑުގެ ދުސްތޫރީ ކޯޓުން ކުރި އެ ހުކުމް އަންނާނެ ކަމަށް ކުރިން ވެސް އޮތީ ބެލެވިފައެވެ.
ސާޅީސް ތިން އަހަރުގެ ޕީޓާ ވަނީ ތައިލެންޑުގެ ހަރުކަށި އެ ގާނޫނު އިސްލާހު ކުރުމަށް ވެވަޑައިގެންނެވި ވައުދާ އެކު މިދިޔަ އަހަރު ބޭއްވި އާންމު އިންތިޚާބުގައި އެންމެ ކުރި ހޯދައިފައެވެ.
ނަމަވެސް، އޭނާ ބޮޑުވަޒީރު ކަމަށް ވަޑައިގަތުމަށް ކުރި މަސައްކަތަށް ހުރަސް އެޅީ ސެނެޓުގައި ތިބި ބޯދާ ފިކުރުގެ ޕާޓީތަކުންނެވެ. އޭގެ ބަދަލުގައި ސިފައިންނާ ގުޅުންހުރި ޕާޓީތަކުގެ ކޯލިޝަނަކުން ވެރިކަމާ ހަވާލުވީ ބޮޑުވަޒީރު ސްރެތާ ތަވިސިންގެވެ.
ޕީޓާއާއި އޭނާގެ ޕާޓީ މަނާކުރުމާ އެކު ޔޫރަޕިއަން ޔުނިއަންއާއި އެމެރިކާއިން ވަނީ މިއީ ޑިމޮކްރަޓިކް ގޮތުން ތައިލެންޑުން ހުޅުވާލުމަށް ކުރާ މަސައްކަތަށް ހުރަސްއެޅުން ކަމަށް ބުނެ އެ ނިންމުން ކުށްވެރިކޮށްފައެވެ.