ނިމިދިޔަ ޖުލައި މަހުގެ 29އިން ފެށިގެން އިނގިރޭސިވިލާތުގައި ހިނގަމުންދާ ހަމަނުޖެހުންތަކާ ގުޅިގެން، އެގައުމަށް ދަތުރުކުރާ އަދި އެގައުމުގައި ދިރިއުޅޭ ދިވެހީން ސަމާލުވުމަށް ފޮރިން މިނިސްޓްރީން އެދިއްޖެއެވެ.
އިނގިރޭސިވިލާތުގެ ހުޅަނގު އުތުރުގައި ހިމެނޭ ސައުތްޕޯޓުގައި ކުޑަކުދިންގެ ޑާންސް އަދި ޔޯގާ ކްލާހަކަށް ވަޅިން ހަމަލާދިނުމުގެ ހާދިސާގައި ތިން ކުޑަކުދިން ނިޔާވުމާ ގުޅިގެން، މުސްލިމުންނާ ދެކޮޅަށް ސިލްސިލާ މުޒާހަރާތަކާއި ހަރަކާތްތައް އަންނަނީ ހިންގަމުންނެވެ.
ފޮރިން މިނިސްޓްރީން ނެރުނު ބަޔާނެއްގައި ވަނީ، އިނގިރޭސިވިލާތުގެ ހާލަތާ ގުޅިގެން، 100އަށްވުރެ ގިނަ މުޒާހަރާތައް ރާވާފައި ވާކަމުގެ މަޢުލޫމާތު ލިބިފައި ވާކަމަށެވެ. އެހެންކަމުން، އެ ގައުމުގައި ދިރިއުޅޭ އެންމެހައި ދިވެހި ރައްޔިތުންނާއި، އެ ޤައުމަށް ޒިޔާރަތްކުރާ ދިވެހި ފަތުރުވެރިން ރައްކާތެރިކަމާއި ސަލާމަތަށް ހާއްސަ ސަމާލުކަމެއް ދިނުމަށް މިނިސްޓްރީން ވަނީ އިލްތިމާސް ކޮށްފައެވެ.
އަދި މުޒާހަރާތައް ބޭއްވުމަށް ހަމަޖެހިފައިވާ ސަރަޙައްދުތަކާ ގާތްނުވުމަށާއި އެ ގައުމުގެ ސަރުކާރާއި އެ ގައުމުގައި ހުންނަ ރާއްޖޭގެ ހައިކޮމިޝަނުންދޭ އިރުޝާދުތަކާ އެއްގޮތަށް އަމަލުކުރުމަށް ވެސް މިނިސްޓްރީން ވަނީ އިލްތިމާސް ކޮށްފައެވެ.
އެގައުމުގައި ހިނގަމުންދާ ހަމަނުޖެހުންތަކާ ގުޅިގެން އެއްވެސް އެހީތެރިކަމެއް ބޭނުންފުޅުވާނަމަ އިނގިރޭސިވިލާތުގައި ހުންނަ ދިވެހިރާއްޖޭގެ ހައިކޮމިޝަނާ ގުޅުއްވުމަށްވެސް މިނިސްޓްރީއިން ވަނީ އެދިފައެވެ.
އަދި އިނގިރޭސިވިލާތުގައި ދިރިއުޅޭ ދިވެހިން ހައިކޮމިޝަނުގެ ލިންކެއް މެދުވެރިކޮށް ހައި ކޮމިޝަނުގައި ރަޖިސްޓަރީވުމަކީ މުހިންމު ކަމެއް ކަމުގައި މިނިސްޓްރީން ވަނީ ބުނެފައެވެ.
މިނިސްޓްރީން ވަނީ އެއްވެސް ހާލަތެއްގައި އެހީތެރިކަމެއް ބޭނުންވެއްޖެ ނަމަ އެ ގައުމުގައި ހުންނަ ރާއްޖޭގެ ހައިކޮމިޝަނުގެ ނަމްބަރު 02072242135(44+)އަށް ގުޅުއްވުމަށް ނުވަތަ ހައިކޮމިޝަނުގެ އީމެއިލްއަށް މެއިލް ކުރުމަށް އެދިފައެވެ.
އިނގިރޭސިވިލާތުގައި ދިރިއުޅޭ ދިވެހިން އެގައުމުގެ ހާލަތާމެދު ސަމާލުވާން މީގެ ކުރިން ވެސް ސަރުކާރުން ވަނީ އިލްތިމާސް ކޮށްފައެވެ.