އިނގިރޭސިވިލާތުގައި މުސްލިމުންނާ ދެކޮޅަށް މުޒާހަރާކުރާތީ، އެގައުމުގައި ދިރިއުޅޭ އަދި އެގައުމަށް ދަތުރުކުރާ ދިވެހީން ސަމާލުވުމަށް ރާއްޖޭގެ ފޮރިން މިނިސްޓްރީން މިއަދު އިލްތިމާސްކޮށްފިއެވެ.
ފޮރިން މިނިސްޓްރީން ނެރުނު ބަޔާނެއްގައި ވަނީ އިނގިރޭސިވިލާތުގެ ހުޅަނގު އުތުރުގައި ހިމެނޭ ސައުތްޕޯޓުގައި ކުޑަކުދިންގެ ޑާންސް އަދި ޔޯގާ ކްލާހަކަށް ވަޅިން ހަމަލާދިނުމުގެ ހާދިސާގައި ތިން ކުޑަކުދިން ނިޔާވުމާ ގުޅިގެން، މުސްލިމުންނާ ދެކޮޅަށް ސިލްސިލާ މުޒާހަރާތަކާއި ހަރަކާތްތައް ހިންގަމުން އަންނަ ކަމަށެވެ.
އެ މައްސަލަ، އިނގިރޭސިވިލާތުގައި ހުންނަ ދިވެހިރާއްޖޭގެ ހައިކޮމިޝަނުން ވަރަށް ގާތުން ބަލަމުން އަންނަ މިނިސްޓްރީން ބުންޏެވެ. އަދި އެ ހާލަތާ ގުޅިގެން، އިނގިރޭސިވިލާތުގައި ދިރިއުޅޭ ދިވެހިންނާއި އެގައުމަށް ދަތުރުކުރާ ދިވެހިން، ވަކިން ޚާއްސަކޮށް ސައުތްޕޯޓް އަދި އެތާގެ ވަށައިގެންވާ ސަރަހައްދުތަކުގައި ދިރިއުޅޭ މީހުން،އިތުރަށް ސަމާލުވުމަށް މިނިސްޓްރީން އިލްތިމާސްކުރިއެވެ.
މިނިސްޓރީއިން ނެރެފައިވާ ބަޔާނުގައި ވަނީ މިނިސްޓްރީގެ އެދުމަކީ އެންމެން ވެސް އިންތިހާއަށް ފަރުވާތެރިވެ، އަބަދުވެސް އެންމެ ފަހުގެ މައުލޫމާތު ހޯދަމުން ދިއުން ކަމަށާއި އަމިއްލަ ރައްކާތެރިކަމަށް އިސްކަންދިނުން ކަމަށެވެ.
މީގެ އިތުރުން، އަމަންއަމާންކަން ގެއްލިފައިވާ ސަރަހައްދުތަކާ ދުރުވެ، އެ ސަރަހައްދުގެ ކަމާބެހޭ އިދާރާތަކުން ދޭ އެންމެހައި އިރުޝާދުތަކަށް ފުރިހަމައަށް ތަބާވުމަށް މިނިސްޓްރީއިން ވަނީ އިލްތިމާސް ކޮށްފައެވެ. އަދި އެ ހަމަނުޖެހުންތަކާ ގުޅިގެން އެއްވެސް ބާވަތެއްގެ ކޮންސިއުލާ އެހީތެރިކަމެއް ބޭނުންވެއްޖެ ހިނދެއްގައި، އިނގިރޭސިވިލާތުގައި ހުންނަ ދިވެހިރާއްޖޭގެ ހައިކޮމިޝަނާ ގުޅުމަށް މިނިސްޓްރީން ވަނީ އެދިފައެވެ.
މިނިސްޓްރީން އެދިފައިވަނީ ހައިކޮމިޝަންގެ ނަމްބަރު (44)02072242135 އަށް ގުޅުމަށް ނުވަތަ އީމެއިލް އެޑްރެސް [email protected] އަށް މެއިލް ކުރުމަށެވެ.
ސައުތުޕޯޓުގައި ދިން ހަމަލާގައި ތިން ކުދިން މަރާލުމުގެ ކުދިން އަށް ކުޑަކުދިންނާއި ދެ މީހަކު ޒަޚަމްކޮށްފައިވެއެވެ. އެ ހަމަލާގެ ތުހުމަތުގައި ހައްޔަރުކޮށްފައިވަނީ 17 އަހަރުގެ ފިރިހެނެކެވެ. އޭނާގެ މައްޗަށް ވަނީ މީހަކު މަރާލަން އުޅުމުގެ ދައުވާތަކާއި މަރާލަން މަސައްކަތް ކުރުމުގެ ދައުވާތަކެއްކޮށްފައެވެ.
އެ މައްސަލައާ ގުޅިގެން ފުރަތަމަ ސޯޝަލް މީޑިއާގައި މައުލޫމާތު ދައުރުވީ ހަމަލާ ދިނީ މުސްލިމެއް ކަމަށް ބުނެއެވެ. އެ މައުލޫމާތު ސައްހަ ނުވި ނަމަވެސް، ސައުތްޕޯޓްގެ މިސްކިތެއް ކައިރީ ބަޔަކު މުޒާހަރާކުރަން ފަށައި، ތަކެއްޗަށް ގެއްލުން ދޭން ފެށިއެވެ. އެ ހަމަނުޖެހުންތަކުގައި 50އަށް ވުރެ ގިނަ ފުލުހުންނަށް އަނިޔާވިއެވެ.
އޭގެ ފަހުން ވެސް އެ ސަރަހައްދުގައި އަންނަނީ މުޒާހަރާތައް ކުރަމުންނެވެ.