ބްލޮގަރު ޔާމިން ރަޝީދުގެ މަރުގެ މައްސަލައިގައި ސިއްރު ހެކިބަސްދިނީ އެ މައްސަލައިގައި ތުހުމަތު ކުރެވޭ މީހެއް ކަމަށާއި، ދައުލަތުގެ ވަކީލުން އެ ކަމަށް އިންކާރު ކުރާ ކަމަށް ދިފާއީ ވަކީލުން މިއަދު ހައިކޯޓުގައި ބުނެފިއެވެ.
ޔާމީން ރަޝީދު މަރާލާފައިވަނީ އޭނާ ދިރިއުޅުނު ގޭގެ ސިޑިގޮޅީގައި އޭނާއަށް ތޫނު އެއްޗަކުން ހަމަލާދީގެންނެވެ.
މި މައްސަލައިގައި ކުށް ސާބިތުވީ ހ. އަންނާރުމާގެ، އިސްމާއިލް ހައިޝަމް ރަޝީދާއި މ. އިރާސްމިކުގެ، އަހްމަދު ޒިހާން އިސްމާއިލްގެ މައްޗަށެވެ.
އެ މައްސަލައިގައި އެ ދެ މީހުން އުމުރަށް ޖަލަށް ލުމަށާއި މަރުގެ ދިޔައިގެ ގޮތުގައި 1.3 މިލިއަން ރުފިޔާ ދެއްކުމަށް ކްރިމިނަލް ކޯޓުން ހުކުމް ކުރީ 2022ވަނަ އަހަރުގެ ޖެނުއަރީ މަހުގައެވެ. އިތުރު ހަތަރު މީހަކު މި މައްސަލައިން ސަލާމަތްވިއެވެ.
އޭގެ ތެރެއިން ގދ. ގައްދޫ، ސިންދުބާދުގެ، މުހައްމަދު ދިފްރާންއާއި މ. ތާއިފް، އިސްމާއީލް ރަޝީދުގެ މައްޗަށް ދައުވާ ސާބިތުނުވި މައްސަލަ ޕީޖީ އޮފީހުން ވަނީ ހައިކޯޓުގައި އިސްތިއުނާފު ކޮށްފައެވެ.
އެ ދެ މީހުންގެ މައްޗަށް ކުރި ޖަލު ހުކުމް އިސްތިއުނާފު ކުރުމަށް އެ މީހުންގެ ފަރާތުން ހުށަހެޅި މައްސަލައިގައި މިއަދު ބޭއްވި އަޑު އެހުމުގައި ދިފާއީ ވަކީލު ބުނެފައިވަނީ މި މައްސަލައިގައި ހެކިބަސް ދިން ސިއްރު ހެކިވެރިޔާ-1 އާއި ދޭތެރޭގައި ވަރަށް ބޮޑެތި ޝައްކުތައް އުފެދިފައިވާ ކަމަށެވެ.
އެ ގޮތުން ދިފާއުން ކުރި އެއްވެސް ސުވާލަކަށް ޖަވާބުދިނުމަށް އޭނާ އިންކާރުކޮށްފައިވާކަން ދިފާއީ ވަކީލު ފާހަގަކުރެއްވިއެވެ.
"މަށާ ބެހޭގޮތުން ކަލޭމެން ސުވާލު ނުކުރޭ، ކަލޭމެންގެ މުވައްކިލާބެހޭ ގޮތުން ކަލޭމެން ސުވާލުކުރޭ، މިއީ އޭނާގެ ބަހުރުވަ ހުރި ގޮތް. ފަނޑިޔާރު ހޯޕްލެސް ވެގެން ވިދާޅުވީ ތިމަންނާއަކަށް މަޖުބޫރެއް ނުކުރެވޭނެއޭ ހެކިބަސް ދޭކަށް. ފަނޑިޔާރު ހަމަ އެކަނި ވިދާޅުވި އެއްޗަކީ ޝަކުވާ ކުރީމަ އެއީ. އަޅުގަނޑުމެން ޝައްކު ކުރާ ގޮތުގައި އޭނާއަކީ ޔާމިން ރަޝީދު މަރާލުމުގެ ތުހުމަތު ރައްދުވީ މީހެއް،" ދިފާއީ ވަކީލު ވިދާޅުވިއެވެ.
ދައުލަތުން އެ ކަމާ ދެކޮޅު ހެދިނަމަވެސް، ސިއްރު ހެކިވެރިޔާގެ ކުށުގެ ރެކޯޑެއް، އަދި ހައްޔަރުގެ ރެކޯޑެއް ދައުލަތުން ސާފުކޮށްދީފައިނުވާކަން ދިފާއީ ވަކީލުވަނީ ފާހަގަ ކުރައްވާފައެވެ. އެއީ ސިއްރު ހެކިވެރިޔާއާ ދޭތެރޭގައި ސުވާލު އުފެދޭ ކަންތައްތަކެއްކަން ވަކީލު ފާހަގަކުރެއްވިއެވެ.
މި މައްސަލައިގައި ސިއްރު ހެކިވެރިޔާއަށް ވީޑިއޯ ފުޓޭޖެއް ދެއްކުމުން، އެ ވީޑިއޯއިން ފެންނަނީ ޒިހާން ކަމަށް ވަނީ ބުނެފައެވެ.
އަނެއް ހެކިވެރިޔާއަކީ އިމޭޖް އެނަލިސްޓެއް ކަމަށްވާއިރު، އޭނާ ބުނެފައިވަނީ ވީޑިއޯއިން ފެންނަ މީހާއާއި ޒިހާންއާއި ދެ ސިފައެއް އެއްގޮތް ކަމަށެވެ.
މި ކަން ފާހަގަކުރައްވައި ދިފާއީ ވަކީލު ވިދާޅުވީ މިއީ އެކަށީގެންވާ ޝައްކެއް ނެތް މިންވަރަށް ގަތުލުއާންމެއް ސާބިތު ކުރެވޭ ވަރުގެ ހެއްކެއް ނޫން ކަމަށެވެ.
"އަޅުގަނޑުމެން އެންމެން ވެސް ހިތާމަކުރަން ފުރާނައެއް ނެތިގެން ދިޔައިމަ، އެކަމަކު ފުރާނައިގެ ބަދަލުގައި އެ މީހަކަށް އިންސާފު ހޯދައިދޭންޖެހޭނީ މިހެންނެއް ނޫން. ރަނގަޅު ތަހުގީގެއް ނުކޮށް، ބަލިކަށި ހެކިތަކެއް ހުށަހަޅައިގެން ޝަރީއަތުގެ ހެކި ސާތިބު ކުރުމުގެ މިންގަނޑު ދަށްކޮށްގެނެއް ނޫން،" ދިފާއީ ވަކީލު ވިދާޅުވިއެވެ.
މި މައްސަލައިގައި މިއަދުގެ އަޑުއެހުން ނިންމާލީ އިތުރު އަޑުއެހުމެއް ބާއްވާނެ ކަމަށް ފަނޑިޔާރުންގެ ބެންޗުން އިޢުލާން ކުރެއްވުމަށް ފަހުގައެވެ.
މިއަދުގެ ޝަރީއަތުގެ އަޑުއެހުމުގައި ފަނޑިޔާރުންގެ ބެންޗުގައި މައްސަލަ ބެއްލެވީ އިސްފަނޑިޔާރު ޙަސަން ޝަފީއުގެ އިތުރުން، ފަނޑިޔާރު ފާތިމަތު ފަރުހީޒާއާއި ފަނޑިޔާރު އަބްދުލްމާނިއު ޙުސައިނެވެ.