ދައުލަތުގެ ޚަރަދާއި ދަރަނީގެ ކަންކަން މަޝްވަރާކުރުމަށް ބާއްވާ ކޮމިޓީގެ ބައްދަލުވުން ސިއްރުކުރަން މިއަދު ރައްޔިތުންގެ މަޖިލީހުގެ މާލިއްޔަތު ކޮމިޓީން މިއަދު ފާސްކޮށްފިއެވެ.
މާލިއްޔަތު ކޮމިޓީން އެގޮތަށް ފާސްކުރީ މާލީ ވުޒާރާގެ އެދުމުގެ މަތިންނެވެ.
އެގޮތުން މިއަދުގެ ކޮމިޓީ ބައްދަލުވުމުގައި އެ ކޮމިޓީގެ މުގައްރިރު، މާމިގިލީ ދާއިރާގެ މެންބަރު ގާސިމް އިބްރާހީމް ވިދާޅުވީ، މާލީ ކަންކަމާ ގުޅޭގޮތުން ތިން ލިޔުމެއް އެ ކޮމިޓީއަށް މާލީ ވުޒާރާއިން ހުށަހަޅާފައިވާ ކަމަށެވެ.
އެގޮތުން އެ ވުޒާރާއިން ސިއްރުކޮށްދިނުމަށް އެދުނީ 2024 - 2026 ވަނަ އަހަރަށް މެދު ރާސްތާ ފިސްކަލް ސްޓްރެޓެޖިީ ނުވަތަ ދައުލަތުން ކުރާ ޚަރަދުގެ ސިޔާސަތު އަންގައިދޭ ބަޔާނާއި، ދައުލަތުގެ ދަރަނީގެ ސްޓްރެޓަޖީ ގެންގުޅޭނެ ގޮތުގެ ބަޔާން ކަމަށް ގާސިމް ވިދާޅުވިއެވެ.
އެއާއެކު ގާސިމް ވަނީ އެގޮތަށް ސިއްރުކުރަން އެދުނު ނަމަވެސް ސިއްރު ކުރާނީ ކޮމިޓީން އެގޮތަށް ނިންމަން ފެންނަކަމަށް ވާނަމަކަމަށް ވިދާޅުވެފައެވެ.
މިނިސްޓްރީ އޮފް ފިނޭންސުން އެދިވަޑައިގަންނަވަނީ އެ ދެ މައްސަލައިގައި ސިއްރުކޮށް ކޮމިޓީ ބާއްވައިގެން ގެންގޮސް ދިނުމަށް. ދެން ކޮމިޓީންތާ ނިންމާނީ ސިއްރުތޯ ނޫންތޯ، މާމިގިލީ ދާއިރާގެ މެންބަރު ގާސިމް އިބްރާހީމް
މިއަދު ބޭއްވި މާލިއްޔަތު ކޮމިޓީގެ ބައްދަލުވުމުގެ ތެރެއިން: ކޮމިޓީން ނިންމީ ދައުލަތުގެ ޚަރަދާއި ދަރަނީގެ މައުލޫމާތު މަޝްވަރާކުރާ ކޮމިޓީ ސިއްރުކުރަން -- ފޮޓޯ/ މަޖިލިސް
އެއާއެކު ބާރަށު ދާއިރާގެ މެންބަރު އިބްރާހިމް ޝުޖާއު ވަނީ އެ ދެ ބަޔާން ސިއްރުކުރުމަށް ތާއީދުކުރައްވާ އެގޮތަށް ހުށަހަޅުއްވާފައެވެ. އެ ހުށަހެޅުމަށް ކޮމިޓީގެ ނައިބު މުގައްރިރު، އޭދަފުށީ ދާއިރާގެ މެންބަރު އަހުމަދު ސަލީމް ތާއީދު ކުރެއްވިއެވެ.
ކޮމިޓީ ބައްދަލުވުމުގައި އަށް މެންބަރުން ތިބިއިރު، އެ ހުށަހެޅުމަށް ފުރަތަމަ ވޯޓަށް އެހުމުން އެކަމަށް ތާއީދު ކުރެއްވީ ހަތަރު މެންބަރުންނެވެ. ދެވަނަ ފަހަރަށް ވޯޓަށް އެހުމުން، ފަސް މެންބަރުންގެ ތާއީދާއެކު ނިންމީ އެ ދެ ބަޔާން ސިއްރުކުރުމަށެވެ.
މީގެ ކުރިން މާލީ ވުޒާރާއިން އެ ބަޔާންތައް މަޖިލީހާ ހިއްސާކުރުމުން އެ ބަޔާންތައް އާންމުކުރެއެވެ. އެގޮތުން 2018 ވަނަ އަހަރުން ފެށިގެން މި ބަޔާންތައް ފިނޭންސް މިނިސްޓްރީގެ ވެބްސައިޓުގައި ވެސް ޝާއިއުކޮށްފައިވެއެވެ.