ރޯޑް ޑެވަލޮޕްމަންޓް ކޯޕަރޭޝަން (އާރްޑީސީ)އާ ހަވާލުވީއިރު އެ ކުންފުނީގެ ދަރަނި ހުރީ 837 މިލިއަން ރުފިޔާގައި ކަމަށް އެ ކުންފުނީގެ މެނޭޖިން ޑިރެކްޓަރު ބްރިގޭޑިއާ ޖެނެރަލް (ރިޓަޔާޑް) އަލީ ޒުހޭރު މިއަދު ވިދާޅުވެއްޖެއެވެ.
ޒުހޭރު މިފަދައިން ވިދާޅުވީ، ރައްޔިތުންގެ މަޖިލީހުގެ ސްޓޭޓް އޯންޑް އެންޓަޕްރައިޒަސް (އެސްއޯއީ) ކޮމިޓީއަށް ހާޒިރު ކުރުމުން ވާހަކަދައްކަވަމުންނެވެ.
ކޮމިޓީއަށް އާރްޑީސީ ހާޒިރުކޮށްފައިވަނީ އެ ކުންފުނިން ހިންގާފައި ހުރި ކޮރަޕްޝަންގެ އަމަލުތަކާއި، އެކަން ހުއްޓުވުމުގެ ގޮތުން މިހާރުގެ މެނޭޖްމަންޓުން އަޅާފައިވާ ފިޔަވަޅުތަކާ ގުޅޭގޮތުން މައުލޫމާތު ސާފުކުރުމަށެވެ.
އެ ބައްދަލުވުމުގައި ޒުހޭރު ވިދާޅުވީ އެ ކުންފުންޏާ ހަވާލުވީއިރު އެކި ފަރާތްތަކަށް ދަރަނީގެ ގޮތުގައި ދައްކަން ޖެހޭ އަދަދު 837 މިލިއަނަށް އަރާ ކަމަށެވެ. ނަމަވެސް މިއަދާ ހަމައަށް ސަރުކާރުގެ އެހީތެރިކަމާއެކު އެކި ފަރާތްތަކަށް ދައްކަން ޖެހޭ ދަރަނީގެ ތެރެއިން 152 މިލިއަން ދައްކާފައި ވާކަމަށް އޭނާ ވިދާޅުވިއެވެ. އެއާއެކު ބާކީ ދައްކަންޖެހޭ ދަރަނީގެ އަދަދު 685 މިލިއަނަށް ތިރިކުރެވިފައި ވާކަމަށް ވެސް އޭނާ ވިދާޅުވިއެވެ.
ޒުހޭރު ވިދާޅުވީ ކުންފުނިން މަޝްރޫއުތައް ހިންގުމަށްޓަކައި މީގެ ކުރިން ބޭރުން ވެސް އެތައް މުވައްޒަފުންނެއް ގެނެސް، މަސައްކަތް ހަވާލުނުކޮށް ބައިތިއްބާފައި ވާކަމަށެވެ. އަދި ވަރަށް ގިނަ ވެހިކަލްތައް ވެސް ބޮޑު އަގުގައި ކުއްޔަށް ނަގާފައި ވާކަަމަށް ވެސް އޭނާ ވިދާޅުވިއެވެ.
އާރްޑީސީން މަޖިލީހުގެ އެސްއޯއީ ކޮމިޓީ ބައްދަލުވުމުގައި -- ފޮޓޯ/ މަޖިލިސް
މި ކަންކަމާހުރެ ކުންފުނީގެ ޚަރަދުތައް އިތުރުވިކަމަށް ޒުހޭރު ވިދާޅުވިއެވެ. އެގޮތުން އޭރު ވެހިކަލްތަކުގެ ކުއްޔަށް އެކަނި ވެސް މަހެއްގެ މައްޗަށް 15 މިލިއަން ރުފިޔާ ޚަރަދުކުރި ކަމަށް ޒުހޭރު ވިދާޅުވިއެވެ.
އާރްޑީސީން މިހާރު ހިންގުމުގެ ނިޒާމަށް ގެނެސްފައިވާ ބަދަލުތައް ފާހަގަކޮށް ޑެޕިއުޓީ މެނޭޖިން ޑިރެކްޓަރު މުހައްމަދު އަސްބާހް ވިދާޅުވީ، ޓްރާންސެކްޝަނެއް ހަދަން ކުންފުނީގެ ޗީފް ފައިނޭންޝަލް އޮފިސަރު (ސީއެފްއޯ)އަށް އިތުރު ދެމީހެއްގެ ހުއްދަ މިހާރު ބޭނުންވާނެ ކަމަށެވެ.
ކުރިން އޮތް އުސޫލުގެ ދަށުން އެ ކުންފުނީގެ ޗީފް ފައިނޭންޝަލް އޮފިސަރު (ސީއެފްއޯ)އަށް އިތުރު މީހެއްގެ ހުއްދަ އަކާ ނުލާ އެއް މިލިއަން ރުފިޔާއާ ހަމައަށް ޓްރާންސެކްޝަންތައް ހެދުމުގެ ބާރު އޮވެއެވެ.
މީގެ އިތުރުން، އުސޫލާ ޚިލާފަށް ހިންގާފައިވާ ފައިސާގެ މުއާމަލާތްތަކާ ގުޅިގެން ބައެއް މުވައްޒަފުން އެހެން ޑިޕާޓްމަންޓަކަށް ބަދަލުކޮށްފައި ވާކަމަށް ވެސް އޭނާ ވިދާޅުވިއެވެ. އަދި އެ މުވައްޒަފުންނާ ދޭތެރޭ އަޅަންޖެހޭ ފިޔަވަޅު އަޅާނެ ކަމުގެ ޔަގީންކަން ވެސް ދެއްވާފައި ވެއެވެ.
ދަރަނީގެ އިތުރުން އާރްޑީސީއަކީ ކޮރަޕްޝަންގެ ބޮޑެތި ތުހުމަތުތައް އަމާޒުވާ ކުންފުންޏެކެވެ.
އެގޮތުން، އެ އޮފީހުގެ ފައިސާ ތިޖޫރީ ގެއްލުމާއި، އާރްޑީސީގެ އޮފީހުން ވައްކަން ކުރުން ފަދަ އެތައް މައްސަލައެއް ވެސް ވަނީ ހިނގައިފައެވެ.
ކޮރަޕްޝަންގެ މައްސަލާގައި ތަހުގީގުކުރުމަށްޓަކައި މިދިޔަ އަހަރުގެ ނޮވެމްބަރު 15 ގައި ފުލުހުން ވަނީ އާރްޑީސީ އޮފީސްތެރެއަށް ވަދެ، ގިނަ އަދަދެއްގެ ލިޔެކިޔުންތައް ގެންގޮސްފައެވެ.
މިވަގުތު ފުލުހުންގެ އިތުރުން އެންޓި ކޮރަޕްޝަން ކޮމިޝަން (އޭސީސީ)ން ވެސް ގެންދަނީ އާރްޑީސީގެ ކޮރަޕްޝަންގެ މައްސަލަ ބަލަމުންނެވެ.
ރައީސް އިބްރާހިމް މުހައްމަދު ޞާލިޙުގެ ސަރުކާރުގައި އުފެއްދި އާރްޑީސީގެ ކޮރަޕްޝަނުގެ މައްސަލާގައި އެންމެ ބޮޑު ތުހުމަތެއް ކުރެވެނީ އޭރު އެ ކުންފުނީގެ އެމްޑީގެ މަގާމުގައި ހުންނެވި މޫސާ އަލިމަނިކު (މޫކޭ)ގެ މައްޗަށެވެ.