ޓެލްއަވީވު (5 އޮގަސްޓް 2024): އިސްރާއީލަކީ މުޅި ސަރަހައްދުގައިވެސް އޮތް އެންމެ ބާރުގަދަ ގައުމުކަމަށާއި އިސްރާއީލު ހުއްޓުވޭނެ އެއްވެސް ފަރާތެއް އަދި އިސްރާއީލަށް ނުކުރެވޭނެ އެއްވެސް ކަމެއް އަދި އިސްރާއީލަށް ހުރަސް ނުކުރެވޭނެ އެއްވެސް ރަތްރޮނގެއް ދުނިޔޭގައި ނޯންނާނެ ކަމަށް އެގައުމުގެ ހައްދު ފަހަނަޅާފައިވާ ބޮޑުވަޒީރު ބެންޖަމިން ނަތަންޔާހޫ ބުނެފިއެވެ.
ޓެލްއަވީވުގައި ދިން ބަޔާނެއްގައި އީރާނަށް އިންޒާރު ދެމުން ނަތަންޔާހޫ ބުނީ އިސްރާއީލުގެ އަތްވަރަށް ދިގުވާނެކަމަށާއި އެއަތް ނުފޯރާނެ އެއްވެސް ތަނެއް ދުނިޔޭގައި ނޯންނާނެކަމުގައެވެ.
އީރާނާއި ހިޒްބުﷲ ގެ ނަން ސީދާގޮތެއްގައި ފާހަގަނުކޮށް ނަތަންޔާހޫ ބުނީ އިސްރާއީލަށް ދޭ ކޮންމެ ހަމަލާއަކަށް ދެ ހަމަލާދޭނެކަމުގައެވެ. މަރާލި މީހަކަށް އެތައް ސަތޭކަ ބަޔަކު މަރާލާނެކަމުގައެވެ. "އިސްރާއީލުގެ ދިފާއުގައި ހަމަލާދޭން ނުކެރޭނެ ތަނެއް އަދި މަރަންނުޖެހޭ މީހެއް ނުހުންނާނެ" ކަމުގައެވެ.
"ބައިރޫތަށް ތެހެރާނަށް އަދި ޔަމަނަށް އަދި އެނޫންތަންތަނަށްވެސް ފޯރާވަރަށް އިސްރާއިލުގެ އަތް ދިގުވާނެ އަދި އެއަތުގައި އާރާއި ބާރުވެސް ހުންނާނެ، އިސްރާއީލުގެ ދިފާއަށްކުރާ މަސައްކަތުގައި އިސްރާއީލު ބިރުގަންނާނެ އެއްވެސް ފަރާތެއް އިސްރާއީލު ހުއްޓުވޭނެ މުއައްސަސާއެއް އަދި އިސްރާއީލު ބޯލަނބަންޖެހޭ ގަވައދެއް ގާނޫނެއް ނޯންނެ" ވަރަށް ހަރުކަށިކޮށް ޖޯޝާއެކު ވާހަކަ ދައްކަމުން ނަތަންޔާހޫ ބުނެފައިވެއެވެ.
ނަތަންޔާހޫ ހިންގި ގަތުލުއާންމެއްގައި ޝަހީދުކޮށްލާފައިވާ ޣައްޒާގެ އާންމުން
އިސްރާއީލުގެ އިދިކޮޅު ނޫހެއްކަމަށްވާ "ހާއާރެޓްސް" ބުނާގޮތުން ލުބްނާނަށް ހަމަލާދީ ހިޒްބުﷲގެ އިސް ކޮމާންޑަރު ފުއާދު ޝުކުރު އަވަހާރަކޮށްލުމަށާއި އީރާނުގެ ވެރިރަށް ތެހެރާނުގައި ހަމާސްގެ ވެރިޔާ އިސްމާއީލު ހަނިއްޔާ ހުންނަވަނިކޮށް ހަނިއްޔާ އަވަހާރަކޮށްލުމަށް ނަތަންޔާހޫ އެންގީ ނަތަންޔާހޫ އެމެރިކާއަށް ކުރި ދަތުރަށްފަހުއެވެ.
މިދެބޭފުޅުން ޝަހީދު ކޮށްލުމަށްފަހު ނަތަންޔަހޫ ވަނީ ޣައްޒާގައި ފަލަސްތީނުގެ ރެފިއުޖީން ރައްކާތެރިކަން ހޯދައިގެން ތިބޭ ތިން ސްކޫލަކަށާއި ޣައްޒާގެ ދެކުނުގައިވާ އާރެއް ބާރެއްނެތް ނިކަމެތި ރެފިއުޖީން ހިމެނޭ ފޭލިގެތަކަށް ކޮންމެ ދުވަހަކު ފައިޓާޖެޓުން އެތަށް ހަމަލާތަކެއްދީ ބޮޑު ފަސް ގަތުލުއާންމު ހިންގާފައެވެ.
މިގަތުލުއާންމުތަކުގައި ޝަހީދުކޮށްލި މީހުންގެ ތެރެއިން 70 އިންސައްތައަކީ ޣައްޒާގެ ކުޑަކުދިންނެވެ. މި ފަސް ގަތުލުއާންމުގައި އިސްރާއީލު ސިފައިން ޝަހީދުކޮށްލި ޣައްޒާގެ އާންމުންގެ އަދަދު 130 އަށް އަރައެވެ. ޒަޚަމްކޮށްލި މީހުންގެ އަދަދު ވަނީ 300 އަށް ވުރެ މަތީގައެވެ.
ނަތަންޔާހޫ ހިންގި މިއިން އެއްވެސް ގަތުލުއާންމަކާ ދެކޮޅަށް އެމެރިކާވެސް އަދި ޔޫރަޕްގެ ގައުމަކުންވެސް ބަހެއް ބުނެފައެއް ނުވެއެވެ. އަދި ބީބީސީ އާއި ސީއެންއެން ފަދަ ހުޅަނގުގެ މެއިންސްޓްރީމް މީޑިއާތަކުން މިޖަރީމާތަކާބެހޭ މީޑީއާ ކަވަރެޖް ގެނަސްދީފައިވަނީ އެއްކޮޅަށް ބުރަވެއެވެ.
ނަތަންޔާހޫ އޭނާގެ ސިފައިންނާއެކު
އިސްރާއީލުގެ އަސްރިއްޔާއިން ދޭ ބަޔާނާ މުޅިން އެއްގޮތަށެވެ. އިސްރާއީލުގެ ދިފާއުގައި ކުރާ ކަމެއްގެ ގޮތުގައެވެ. ނަމަވެސް އިސްރާއީލު މިގަތުލުއާންމުތައް ހިންގަނީ އިސްރާއީލު އިސްތިއުމާރުކޮށްފައިވާ ފަލަސްތީނުގެ ބިމުގައެވެ. އިސްރާއީލުކަމަށް އދ.އިން ކަނޑައަޅާފައިވާ ސަރަހައްދުގައެއް ނޫނެވެ.
އިސްރާއީލުން ޣައްޒާ އާއި ފަލަސްތީނުގެ ބިންތައް ގަދަބާރުން ހިފައި އެބިންތަކަށް ވެރިވެގަނެގެން އުޅޭ އުޅުމާއި އދ. ގެ ގަރާރުތަކާއި ބައިނަލްއަގްވާމީ ގާނޫނަށް އިސްރާއީލު ގޮންޖަހައި ދެދައުލަތުގެ ހައްލަށް އިސްރާއީލު އިންކާރުކުރާ ވާހަކައާއި އަމިއްލަ ނަފްސުގައި ގައުމުގެ މިނިވަންކަމަށް މަސައްކަތްކުރުމުގެ ހައްގު ފަލަސްތީނަށް އޮންނާނެކަން ހުޅަނގުގެ މީޑިއާތަކުން ހާމައެއް ނުކުރެއެވެ. އަދި އިސްރާއީލުން ފަލަސްތީނުގެ 150 އަށް ވުރެ ގިނަ ނޫސްވެރިން ޝަހީދުކޮށްލުމުންވެސް އެއީ މައްސަލައަކަށް ނުވެއެވެ.
ޔަހޫދީ ޒަޔަނިސްޓުންގެ ބާރާއި ނުފޫޒުގެ ދަށުގައިވާ ހުޅަނގުގެ މި މީޑިއާ ތަކުން ޣައްޒާގައި ހިންގާ ޖަރީމާތައް ސިފަކުރަނީ އިސްރާއީލުގެ ދިފާއުގައި ކުރާކަމެއްގެ ގޮތުގައެވެ. އިސްރާއީލުން ފަލަސްތީނުގެ ބިންތައްހިފައި އެބިންތައް އިސްތިއުމާރު ކުރުމަށް ހިންގާ ޖަރީމާތަކެއްގެ ގޮތުގައެއް ނޫނެވެ.
ފަލަސްތީނުގެ ގާތްގަނޑަކަށް ބައިލައްކައެއްހާ އާންމުން މަރައި ދެލައްކައެއްހާ އާންމުން ޒަޚަމްކޮށް ހޮސްޕިޓަލްތަކަށް ބޮންއަޅައި ބަލިމީހުންނާއި ޑޮކްޓަރުންނާއި ނަރުހުންގެ އެތަށް ހާސްބަޔަކު މަރައި ނަސްލު ނައްތާލުމުގެ ޖަރީމާތައް ހިންގަމުން ގެންދާ ނަތަންޔާހޫ އަކީ މިޒަމާނުގެ ހިޓްލަރުކަމަށް ދުނިޔޭގެ އެތަށް ގައުމަކުން ވަނީ ސިފަކޮށްފައެވެ.
އަދި ނަތަންޔާހޫ ހައްޔަރުކުރުމުގެ އަމުރަކަށް ބައިނަލްއަގްވާމީ ޖިނާއީ ކޯޓުގެ ޕްރޮސެކިއުޓަރު އެކޯޓުގެ ފަނޑިޔާރުންގެ ކިބައިން އެދިފައެވެ. ނަމަވެސް ޣައްޒާގެ ޖައްލާދުކަމަށް ސިފަކުރެވޭ ނަތަންޔާހޫ އަށް އެމެރިކާގެ ކޮންގްރެސް އިންވަނީ ވަރަށް ހޫނު މަރުހަބާއެއްކިޔާފައެވެ.
އިސްރާއީލުގެ އިދިކޮޅު ނޫހެއްކަމަށްވާ "ހާއާރެޓްސް" ބުނާގޮތުން އެމެރިކާއަށް ކުރި ދަތުރަށްފަހު ނަތަންޔާހޫގެ ބަސްމަގުވަނީ އާދަޔާ ޚިލާފަށް ހަރުކަށިވެފައެވެ.
ބައެއް ރިޕޯޓްތައް ބުނާގޮތުން ނަތަންޔާހޫ އަށްވަނީ ކޮންމެ ފަދަ ގަތުލުއާންމުތަކާއި ޖަރީމާތަކެއް ހިންގައި ލައްކައިން އާންމުން މެރިނަމަވެސް އެމެރިކާގެ ހިމާޔަތާއި ރައްކާތެރިކަން ލިބޭނެކަމާ އަދި ލިބޭނެ އަދަބެއް އަދި ހާޒިރު ކުރެވޭނެ ކޯޓެއް ނޯންނާނެކަމުގެ ގެރެންޓީ އެމެރިކާގެ ފަރާތުން ލިބިފައެވެ. މިކަމުގެ ސަބަބުން ނަތަންޔާހޫ މިހާރުވަނީ ކުރިޔަށްވުރެވެސް އިތުރަށް ބޮޑާވެފައިކަމަށް މި ރިޕޯޓްތައް ބުނެއެވެ.