ބޯހިޔާވަހިކަމަށް ހައްލެއް ހޯދުމުގެ ގޮތުން މިދިޔަ އެމްޑީޕީ ސަރުކާރުން ފެށި މަޝްރޫއުތަކާ ގުޅޭގޮތުން މައުލޫމާތު ސާފުކުރުމަށްޓަކައި ރައްޔިތުންގެ މަޖިލީހަށް ހައުސިން މިނިސްޓަރު ޑރ. އަލީ ހައިދަރު އަހުމަދު މިއަދު ހާޒިރުވާން އެންގި ނަމަވެސް މިނިސްޓަރަށް ކުއްލި އާއިލީ ކަމެއް ދިމާވެ، ވަޑައިގެންނެވޭ ގޮތް ނުވެއްޖެއެވެ.
ގާނޫނުއަސާސީގެ ދަށުން ވަޒީރުންގެ މަޖިލީހުގެ މެންބަރުން ޖަވާބުދާރީކުރުވުމަށް މަޖިލީހަށް ހާޒިރު ކުރުމަކީ މަޖިލީހަށް ލިބިގެންވާ ބާރެކެވެ.
މިއަދުގެ ޖަލްސާއަށް އެޖެންޑާ ކޮށްފައި އޮތީ ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް، މިނިސްޓަރު ހައިދަރާ، ސުވާލުކުރުމަށެވެ.
އެއީ ގުޅިފަޅުން ބިން ލިބުނު ފަރާތްތަކަށް އިން ވަކިކޮށް ބިން ހަވާލުކުރަން ފެށޭނެ ތާރީޚަކާއި، ބިންވެރިޔާ ސްކީމްގެ ދަށުން ރައީސް އިބްރާހީމް މުހައްމަދު ޞާލިޙުގެ ސަރުކާރުން މާލޭ މީހުންނަށް ބޯހިޔާވަހިކަން ފޯރުކޮށްދިނުމުގެ ގޮތުން ދީފައިވާ ގޯތިތައް އޭގެ ވެރިފަރާތްތަކާ ހަވާލުކުރެވޭނީ ކިހާ ހިސާބަކުތޯ ސާފުކުރުމަށެވެ. އަދި ހުޅުމާލެ ދެވަނަ ފިޔަވަހީގައި އިމާރާތްކުރަމުންދާ 4،000 ފުލެޓު ލިބުނު ފަރާތްތަކަށް އެ ފުލެޓުތައް ހަވާލުކުރެވޭނީ ކޮންއިރަކުންތޯ ސުވާލުކުރުމެވެ.
އެހެންނަމަވެސް މަޖިލީހުގެ ރިޔާސަތުގައި އިންނެވި މަޖިލީހުގެ ރައީސް އަބްދުއްރަހީމް އަބްދުﷲ ވަނީ މިނިސްޓަރަށް ވަޑައިނުގެންނެވުނުކަން އިއުލާނުކުރައްވާފައެވެ. އަދި އެއީ ކުއްލި އާއިލީ ކަމަކާ ހުރެ ކަމަށް އެމަނިކުފާނު ވިދާޅުވިއެވެ.
އަދި މިނިސްޓަރަށް ވަޑައިގެންނެވޭނެ ދުވަހެއް ބަލައި އެހެން ދުވަހަކަށް އެ ސުވާލު އެޖެންޑާ ކުރައްވާނެ ކަމަށް ވެސް އެމަނިކުފާނު ވިދާޅުވިއެވެ.
ފާހަގަކޮށްލެވޭ ގޮތުގައި ގެދޮރުވެރިޔާ ސްކީމްގެ ދަށުން ފްލެޓް ލިބޭ މީހުންގެ ލިސްޓު ބާތިލު ނުކުރުމަށް އެދި ހުށަހަޅައިފައިވާ ޕެޓިޝަނާ ގުޅޭ ގޮތުން މިދިޔަ މަހުގެ 16 ވަނަ ދުވަހު މަޖިލީހުގެ ޕެޓިޝަން ކޮމިޓީއަށް ވެސް މިނިސްޓަރު ހައިދަރު ހާޒިރުވެވަޑައެއް ނުގަތެވެ. އެއާއެކު ބައެއް މެންބަރުން ވަނީ އެ ދުވަހު ވެސް ނުރުހުން ފާޅުކުރައްވާފައެވެ.
އެ ކޮމިޓީ ބައްދަލުވުމަށް މިނިސްޓަރަށް ވަޑައިނުގަނެވޭނެކަން އިދާރީ މޭޒުން އެންގީ މެންބަރުން ކޮމިޓީއަށް ވަޑައިގަތުމުން ކަމަށް މެންބަރުން އެ ދުވަހު ފާހަގަކުރެއްވިއެވެ. އެއީ މަޖިލީހަށް އިހުތިރާމު ކުޑަ ކުރުމުގެ އަމަލެއްގެ ގޮތުގައި ބައެއް މެންބަރުން ސިފަކުރެއްވިއެވެ.
މިދިޔަ ސަރުކާރުގެ ބޯހިޔާވަހިކަމުގެ މަޝްރޫއުތަކާ ގުޅޭގޮތުން ރައްޔިތުން އަންނަނީ ކަންބޮޑުވުން ފާޅުކުރަމުންނެވެ. އެގޮތުން ހުޅުމާލޭގައި އަޅާ 4،000 ފުލެޓު ދިނުން ލަސްވާތީ މިފަހުން ވެސް މާލޭގައި ރައްޔިތުން ވަނީ މުޒާހަރާ ވެސް ކޮށްފައެވެ.