ފަރަންސޭސިވިލާތުގެ ވެރިރަށް ޕެރިހުގައި މިހާރު ކުރިއަށްދާ އޮލިމްޕިކް ކުޅިވަރު މުބާރާތުގެ ފުޓްބޯޅައިގެ ފިރިހެން އިވެންޓްގައި އާޖެންޓީނާ ބަލިކޮށް މުބާރާތް ބާއްވާ ގައުމު ފަރަންސޭސިވިލާތުން ސެމީފައިނަލްގެ ޖާގައެއް ކަށަވަރުކޮށްފިއެވެ.
ކުއާޓާ ފައިނަލްގެ މިމެޗުވީ ކުޅުމަށްވުރެ މެޗު ތެރެއާއި ބޭރުން ހިނގައިދިޔަ އެހެން ކަންތައްތައް ބޮޑަށް ފާހަގަވި މެޗަކަށެވެ.
ދާދިފަހުން އާޖެންޓީނާގެ ސީނިއާ ފުޓްބޯޅަ ޓީމު ކޮމެބޯލް ކޮޕާ އެމެރިކާ ފުޓްބޯޅަ މުބާރާތް ކާމިޔާބު ކުރުމަށްފަހު ބަހުގައި އުފާފާޅުކުރިއިރު ފަރަންސޭސި ސީނިއާ ގައުމީ ޓީމުގެ ކުޅުންތެރިންނަށް ހުތުރުވާގޮތަށް ލަވަކިޔާފައިވާކަން އާންމުވި ފަހުން މިދެ ގައުމުގެ ދެމެދުގައި އޮންނަ ހިތްހަމަ ނުޖެހުމާއި ވާދަވެރިކަންވަނީ ބޮޑުވެފައެވެ. މިގޮތުން މިމެޗު ފެށުމުގެ ކުރިން އާޖެންޓީނާގެ ގައުމީ ސަލާން ކުޅުނު ވަގުތު ފަރަންސޭސި ސަޕޯޓަރުން އަޑުގަދަ ކޮށްފައިވާއިރު މެޗު ނިމުނު ފަހުން ދެ ޓީމުގެ ކުޅުންތެރިންނާއި ކޯޗުންގެ މެދުގައި ވަނީ ހަމަނުޖެހުން ހިނގާފައެވެ.
މިމެޗުގައި ފަރަންސޭސީން ކާމިޔާބު ކުރި ހަމައެކަނި ލަނޑު ޖެހީ މެޗުގެ ފަސް ވަނަ މިނެޓުގައި މައިކަލް އޮލީސޭ ނަގައިދިން ހުރަހަކުން ޖޮން ފިލީޕޭ ޕަޓޭޓާއެވެ. މިމެޗުގައި އާޖެންޓީނާއަށް ލިބުނު އެންމެ ރަނގަޅު ފުރުސަތު ލިބުނީ ފުރަތަމަ ހާފު ނިމެން ގާތްވެފައިވަނިކޮށް ޖުއިލިއާނޯ ސިމިއޯނީއަށެވެ. ނަމަވެސް އޭނާ ގޯލް ކައިރީ ހުރެ ބޮލުން ފޮނުވާލި ބޯޅަ ދިޔައީ ހުރަސް ދަނޑިމަތިން ބޭރަށެވެ.
މިމެޗު ނިމެން ކައިރިވެފައިވަނިކޮށް ފަރަންސޭސީން ދެވަނަ ލަނޑެއް ކާމިޔާބު ކުރި ނަމަވެސް ވީއޭއާރުން ބެލުމަށްފަހު އެލަނޑު ޖެހުމުގެ ކުރިން ފައުލް އެއް ހިނގާފައިވާތީ އެލަނޑު ބަލައި ނުގަންނަން ނިންމިއެވެ.
އޮލިމްޕިކް ކުޅިވަރު މުބާރާތުގައި އެންމެ ފަހުން 1984ގެ މުބާރާތުގައި ރަން މެޑަލް ފުޓްބޯޅައިން ހާސިލުކުރި ފަރަންސޭސި ޓީމު މިމުބާރާތުގެ ސެމީފައިނަލްގައި ބައްދަލުކުރާނީ މިސްރާއެވެ.
މިމުބާރާތުގެ ސެމީފައިނަލުން މިސްރު ޖާގަހޯދީ ކުއާޓާ ފައިނަލްގައި ޕެރަގުއާއީއާ ބައްދަލުކުރި މެޗު އެއް ލަނޑު އެއް ލަނޑުން އެއްވަރު ވުމުން ޕެނަލްޓީ ޖަހައިގެން ފަސް ލަނޑު ހަތަރު ލަނޑުންނެވެ.
މިމުބާރާތުގެ ދެވަނަ ސެމީފައިނަލްގައި ބައްދަލުކުރާނީ ސްޕެއިން އާއި މޮރޮކޯއެވެ. ސެމީފައިނަލުން ސްޕެއިން ޖާގަހޯދީ ކްއާޓާ ފައިނަލްގައި ޖަޕާންއާ ބައްދަލުކުރި މެޗު ތިން ލަނޑު ސުން ލަނޑުން ކާމިޔާބު ކޮށްގެންނެވެ. މިމެޗުގައި ސްޕެއިން އިން ކާމިޔާބު ކުރި ތިން ލަނޑުގެ ތެރެއިން ދެ ލަނޑު ކާމިޔާބު ކޮށްދީފައިވަނީ ވަރަށް ފަހުން ނިމުނު ޔޫރޯ މުބާރާތުގެ ތަށި ހޯދި ސްޕެއިން ޓީމުގައިވެސް ހިމެނުނު ފާމިން ލޯޕޭޒްއެވެ. އަދި ތިންވަނަ ލަނޑު ޖަހައިދިނީ އަބެލް ރުއިޒްއެވެ.
މިމެޗުގައި ޖަޕާނުން ލަނޑެއް ޖެހި ނަމަވެސް މާއޯ ހޮސޯޔާ ޖަހައިދިން ލަނޑުވަނީ ވީއޭއާރުން ބެލުމަށްފަހު އޮފްސައިޑް ކަމަށް ނިންމާފައެވެ.
ސްޕެއިންއާ ސެމީފައިނަލްގައި ބައްދަލުކުރާ މޮރޮކޯ ޓީމު ޖާގަހޯދާފައިވަނީ ކްއާޓާ ފައިނަލްގައި އެމެރިކާއާ ބައްދަލުކުރި މެޗު ހަތަރު ލަނޑު ސުން ލަނޑުން ކާމިޔާބު ކޮށްގެންނެވެ. މިމެޗުގައި މޮރޮކޯގެ ފުރަތަމަ ލަނޑު ލިބުނު ޕެނަލްޓީއަކުން ކާމިޔާބު ކޮށްދިނީ މިމުބާރާތުގައި ފަސްވަނަ ލަނޑު ކާމިޔާބު ކުރި ސޫފިއާން ރަހީމީއެވެ. މިމެޗުގައި މޮރޮކޯގެ ތިން ލަނޑު ޖަހައިދިނީ އިލިއާސް އަހޯމާޗް އާއި ކެޕްޓަން އަޝްރަފް ހަކީމީ އަދި ބަދަލު ކުޅުންތެރިޔާ މެހްދީ މައުހޫބްއެވެ.
މިމުބާރާތުގެ ސެމީފައިނަލް މެޗުތަށް ކުޅުމަށް ހަމަޖެހިފައިވަނީ މިއަންނަ ހޯދަ ދުވަހުއެވެ.