އިންޑިއާގެ ކެރެލާ ސްޓޭޓަށް ބޯކޮށް ވާރޭވެހި، ބިންގަނޑު ކަނޑައިގެން ދިޔަ ހާދިސާ ހިނގިތާ ތިން ދުވަސް ފަހުން ދިރިތިބި ހަތަރު މީހަކު ސަލާމަތްކޮށްފިއެވެ.
ކެރެލާ ސްޓޭޓްގެ ފުލުހުންގެ އެންމެ އިސް ކޮމާންޑަރު ކަމަށްވާ ވީ ޓީ މަތީ ވިދާޅުވީ މިއަދު ފެނުނު އެ މީހުންތިބީ ގެއެއްގެ ތެރޭގައި ތާށިވެފައި ކަމަށާއި އެއީ ދެ ފިރިހެނުންނާއި ދެ އަންހެނުން ކަމަށެވެ.
ބިންގަނޑު ކެނޑި، ކިސަނޑު ފޭބުމުގެ ހާދިސާތައް ހިނގާފައި ވަނީ ޗަލިޔާރް ކޯރު ކައިރީގައި އޮންނަ ކެރަލާގެ ފަރުބަދަމަތީ ވަޔަނާޑް ޑިސްޓްރިކްޓުގައެވެ. ބިންގަނޑު ކެނޑުމާއެކު، ވަޔަނާޑްގެ ރަށެއް ކަމުގައިވާ މުންޑަކާއީއާއި ޗޫރުލްމަލާއަށް ދަތުރު ކުރެވެން އޮންނަ މައި ބުރިޖު ވެސް ވަނީ ހަލާކުވެފައެވެ.
މައި ބުރިޖް ހަލާކުވުމާ ގުޅިގެން މީހުން ހޯދުމުގެ މަސައްކަތަށް ވެސް ވަނީ ހުރަސް އެޅިފައެވެ. ނަމަވެސް ފުލުހުން މިހާރު ވަނީ ވަގުތީ ފާލަމެއްގެ މަސައްކަތް ނިންމައިފައެވެ. ކިސަނޑުގައި ވަޅުލެވިފައިވާ މީހުން ހޯދުމަށް ޑްރޯންއާއި އެނޫންވެސް ޓެކްނޮލޮޖީތައް ބޭނުންކުރުމުގެ މަސައްކަތް ކުރަމުން އަންނަ ކަމަށް ފުލުހުން ބުނެއެވެ.
ހަށިގަނޑުތައް ފެނުމުގެ ފުރުސަތު އޮތް ކޯރު ފަދަ ތަންތަނަށް ބެލުމަށް ރެސްކިއު ޓީމުތަކުން އަންނަނީ ފެތުމުގެ ތަޖުރިބާކާރުންނާ އެކު މަސައްކަތް ފެށުމަށް ވެސް ތައްޔާރުވަމުންނެވެ.
ހޯމަ ދުވަހުގެ ރޭ ހިނގި އެ ހާދިސާގައި 300އަށްވުރެ ގިނަ މީހުން މަރުވެފައިވާއިރު، އެތައް ބަޔަކު ވަނީ ވީނުވީއެއް ނޭންގި ގެއްލިފައެވެ. އެ ހާދިސާއާ ގުޅިގެން ކެރެލާ ސްޓޭޓްގެ ސްކޫލްތަކާއި ޔުނިވާސިޓީތައް ވެސް ވަނީ ބަންދުކޮށްފައެވެ.