ކަރަންޓް ބިލުތައް ބޮޑުވާ މައްސަލަ، ޔުޓިލިޓީ ރެގިއުލެޓަރީ އޮތޯރިޓީ (ޔޫއާރުއޭ) އިން ބަލަންޖެހޭ ކަމަށް ފެނަކައިގެ މެނޭޖިން ޑިރެކްޓަރު މުއާޒް މުހައްމަދު ރަޝީދު ރޭ ވިދާޅުވެއްޖެއެވެ.
ފާއިތުވެ ދިޔަ ދެ ތިން މަހު ވެސް ކަރަންޓު ބިލު ބޮޑުވެ، އާންމުން ވަނީ ސޯޝަލް މީޑިއާގައި އެތައް ޝަކުވާތަކެއް ކޮށްފައެވެ. އެއާއެކު މި މަހުގެ ބިލުތައް އައިއިރު ވެސް އެކަމަށް އެއްވެސް ހައްލެއް ލިބިފައި ނުވާ ކަމަށް ބުނެ މީހުން ނުރުހުން ފާޅުކޮށްފައިވެއެވެ.
ރާއްޖޭގައި ކަރަންޓު ފޯރުކޮށްދެމުން ދަނީ ސްޓެލްކޯއާއި ފެނަކަ މެދުވެރިކޮށެވެ.
އެސްއެސްޓީވީގެ "ބާރުހަތަރެއް" ޕްރޮގްރާމްގައި ވާހަކަދައްކަވަމުން މުއާޒު ވިދާޅުވީ، ކަރަންޓު ބިލުތައް ބޮޑުވާ މައްސަލާގައި އާންމުންގެ ޝަކުވާ މިހާރު އެހާ ބޮޑުވުމުން އެކަން ބަލަން ޖެހެއެވެ. އަދި އެކަން ބަލަންޖެހޭނީ އޭނާ ގަބޫލުކުރާ ގޮތުގައި ފެނަކަ އަދި ސްޓެލްކޯއަކުން ވެސް ނޫންކަމަށާއި، އެކަން ރަނގަޅަށް ބަލަންޖެހޭނީ ޔުޓިލިޓީ އޮތޯރިޓީން ކަމަށް މުއާޒު ވިދާޅުވިއެވެ.
އެއީ އަޅުގަނޑުމެންގެ މައްސަލައެއް ހުރިތޯ ޗެކްކުރެވޭނީ ތިންވަނަ ފަރާތެއް މެދުވެރިކޮށް ކަމަށް އަޅުގަނޑު ގަބުލުކުރަނީ. އަޅުގަނޑުމެން ރެގިއުލޭޓުކުރާ އޮތޯރިޓީ ޔޫއާރުއޭއިން އިސްނަގައިގެން އަޅުގަނޑަށް ގަބޫލުކުރެވޭ ގޮތުގައި މިކަހަލަ އެކްސަސައިޒެއް ހިންގައިފިއްޔާ އާންމުންގެ އިތުބާރު މިކަމަށް ވަރަށް ބޮޑުވެގެންދާނެ ކަމަށް އަޅުގަނޑު ގަބޫލުކުރަނީ، ފެނަކައިގެ މެނޭޖިން ޑިރެކްޓަރު މުއާޒް މުހައްމަދު ރަޝީދު
މުއާޒު ވިދާޅުވީ އެކަމުގައި ފެނަކައިގެ މައްސަލައެއް އުޅޭކަމަކަށް ފާހަގަ ކުރެވިފައެއް ނެތް ކަމަށެވެ. އެގޮތުން ފެނަކައިގެ މީޓަރުތައް ހަރުކޮށްފައި ހުންނާނީ ޔުޓިލިޓީ އޮތޯރިޓީން ގަބޫލުކުރާ މިންގަނޑުތަކަށް ކަމަށް އޭނާ ވިދާޅުވިއެވެ. ނަމަވެސް މީޓަރުތަކުން މައްސަލައެއް އުޅޭކަމަށް ފާހަގަކުރެވޭނަމަ އެކަން އެންގުމުން އެކަން ވެސް ބަލައި މީޓަރުގައި މައްސަލައެއް ހުރިތޯ ޓެސްޓު ވެސް ކޮށްދޭނެ ކަމަށް އޭނާ ވިދާޅުވިއެވެ.
ކަރަންޓު ބިލުތައް ބޮޑުވާ ދެ ސަބަބެއް މުއާޒު ވަނީ ތަފްސީލުކޮށްދެއްވާފައެވެ. އެގޮތުން އެއް ކަމަކަށް ފާހަގަކުރެއްވީ، ބިލުކުރާއިރު ޔުނިޓު ބޭންޑަށް އަންނަ ބަދަލުތަކެވެ.
ކަރަންޓު ބިލުތަކުގައި ހަ ޔުނިޓު ބޭންޑަކަށް ބަހާލާފައި ހުންނާނެކަން ފާހަގަކުރައްވާ މުއާޒު ވިދާޅުވީ ކޮންމެ ޔުނިޓަކަށް ވަކިވަރެއް ޗާޖުކުރާނެ ކަމަށެވެ. އެގޮތަށް ގޮސް ހަވަނަ ޔުނިޓަށް އެރުމުން ހަތަރު ރުފިޔާ 25 ލާރީގެ މަގުން ބިލުކުރާނެ ކަމަށް މުއާޒު ވިދާޅުވިއެވެ.
ދެވަނަ ސަބަބެއްގެ ގޮތުގައި މުއާޒު ފާހަގަކުރެއްވީ މޫސުމީ ބަދަލުތަކެވެ. ވެތުވެދިޔަ ދެތިން މަހަކީ ވަރަށް ހޫނުގަދަ މަސްތަކެއްކަން ފާހަގަކުރައްވާ އޭނާ ވިދާޅުވީ ކޮންމެ އަހަރަކު ވެސް ހޫނު މޫސުމާ ދިމާކޮށް ކަރަންޓު ބިލުތައް ބޮޑުވާ ކަމަށެވެ.
މި ސަބަބުތަކަށްޓަކާ ކަރަންޓު ބޭނުންކުރާ ނިސްބަތް އިތުރުވާނެ ކަމަށް ކުންފުނީގެ ޓެކްނިކަލް ސްޓާފުން ވެސް މައުލޫމާތުދޭ ކަމަށް މުއާޒު ވިދާޅުވިއެވެ.
ހަގިގަތުގަ މިވެގެން އުޅޭ ކަމަކީ ކޮންމެ ގޭބީސީއެއްގަ ވެސް ކަރަންޓު ބޭނުންކުރާ ނިސްބަތް އިތުރުވެގެން މިއުޅެނީ. އެހެންވީމަ ދެގުނަ ނުވަތަ ތިންގުނައިން ބިލުތައް ބޮޑުވުމުގެ ފުރުސަތު އެބައޮތް. އަޅުގަނޑުމެން ނުވޭ ހަގީގަތުގައި އާންމުންގެ ބިލުތައް ބޮޑުކުރާކަށެއް. އެކަމަކު އަޅުގަނޑުމެން ބިލުކުރަނީ މީގެ ކުރީގައި ވެސް އެހެންޏާ ވެސް ބިލުކުރާ ގޮތަށް، ފެނަކައިގެ މެނޭޖިން ޑިރެކްޓަރު މުއާޒް މުހައްމަދު ރަޝީދު
ހަމައެއާއެކު ބިލުތައް ކުޑަކުރުމަށްޓަކާ ކުޑަކުރެވޭނެ ކަންކަން ވެސް އެބަހުރި ކަމަށް މުއާޒު ވިދާޅުވިއެވެ. މިސާލެއްގެ ގޮތުން އޭނާ ފާހަގަކުރެއްވީ ކޮޓަރިއެއް ގެއެއް ނަމަ ރަނގަޅަށް އިންސިއުލޭޓް ކުރުމެވެ. އަދި މިފަދަ ކަންކަމަށް ސަމާލުކަން ދީފި ނަމަ ކޮންމެވެސް ވަރެއްގެ ދަށްކަމެއް ކަރަންޓު ބިލުތަކަށް އަންނާނެ ކަމަށް މުއާޒު ވިދާޅުވިއެވެ.
ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގަތުމަށް ފަހުގައި ވަނީ ރޯދަ މަހު ބޭނުންކުރާ ކަރަންޓާއި ފެނުން ޑިސްކައުންޓު ދޭން ނިންމަވައިފައެވެ. އެގޮތުން، މި އަހަރުގެ މާޗު މަހުގެ ބިލާއި އޭޕްރީލް މަހުގެ ބިލުން ވެސް ވަނީ ޑިސްކައުންޓު ދީފައެވެ.
އެހެންވެ، ޑިސްކައުންޓް ދިން ބިލްތަކާ އަޅައިބަލާއިރު ވެސް، ވޭތުވެ ދިޔަ މަސްތަކުގައި ބިލް ބޮޑުކަން ވަނީ ފާހަގަކުރެވިފައެވެ.
ހަމައެއާއެކު މި މައްސަލާގައި ރައްޔިތުން ވަނީ ސްޓެލްކޯ ކުރިމަތީގައި މީގެ ކުރިން އިހުތިޖާޖުވެސް ކޮށްފައެވެ.
ކަރަންޓު ބިލް ބޮޑުވުމުން ސްޓެލްކޯއަށް ގިނަ ބަޔަކު ފާޑުކިޔުން އަމާޒުވަމުންދާއިރު މި ޚިދުމަތުގެ ކަންކަން ބަލަހައްޓައި ރެގިއުލޭޓްކުރުމުގެ ޒިންމާ އޮންނަ ޔުޓިލިޓީ ރެގިއުލޭޓަރީ އޮތޯރިޓީ އިން މިހާތަނަށް އައިއިރު މި ކަމުގައި އެއްވެސް އެއްޗެއް ބުނެފައެއް ނުވެއެވެ.