ކަރަންޓް ބިލްތައް ބޮޑުވެގެން މި މަހު ވެސް އާންމުންގެ ޝަކުވާތައް އިތުރުވެއްޖެއެވެ.
ފާއިތުވެ ދިޔަ ދެ ތިން މަހު ވެސް ކަރަންޓު ބިލު ބޮޑުވެ، އާންމުން ވަނީ ސޯޝަލް މީޑިއާގައި އެތައް ޝަކުވާތަކެއް ކޮށްފައެވެ. އެއާއެކު މި މަހުގެ ބިލުތައް އައިއިރު ވެސް އެކަމަށް އެއްވެސް ހައްލެއް ލިބިފައި ނުވާ ކަމަށް ބުނެ މީހުން ނުރުހުން ފާޅުކޮށްފައިވެއެވެ.
މީގެ ކުރިން މި މައްސަލާގައި ސްޓެލްކޯއަށް އާންމުންގެ ފަރާތްތަކުން ވަނީ ޝަކުވާތައް ވެސް ހުށަހަޅާފައެވެ. ޝަކުވާތަކަށް ބެލުމަށްފަހު ސްޓެލްކޯއިން ބުނީ ގޭބިސީތަކުން ކަރަންޓް ބޭނުން ކުރާ މިންވަރު އިތުރުކަން ފާހަގަކުރެވިފައިވާ ކަމަށެވެ.
ރާއްޖޭގައި ކަރަންޓު ފޯރުކޮށްދެމުން ދަނީ ސްޓެލްކޯއާއި ފެނަކަ މެދުވެރިކޮށެވެ.
ފެނަކަ ކޯޕަރޭޝަންގެ މެނޭޖިން ޑިރެކްޓަރު މުއާޒް މުޙައްމަދު ރަޝީދު: އޭނާ ވިދާޅުވީ ކަރަންޓު ބިލު ބޮޑުވާ މައްސަލާގައި ފެނަކައިގެ މާބޮޑު މައްސަލައެއް އުޅޭ ކަމަށް ނުދެކޭކަމަށް -- ފޮޓޯ/ ރައީސް އޮފީސް
މިކަމާ ގުޅިގެން އެސްއެސްޓީވީގެ "ބާރުހަތަރެއް" ޕްރޮގްރާމްގައި ވާހަކަދައްކަވަމުން ފެނަކައިގެ މެނޭޖިން ޑިރެކްޓަރު މުއާޒު މުހައްމަދު ރަޝީދު ވިދާޅުވީ، ކަރަންޓު ބިލު ބޮޑުވާ މައްސަލަ ފެނަކައިގެ ސަމާލުކަމަށް އައިސްފައިވާ ކަމަށެވެ. ނަމަވެސް އެކަމުގައި ފެނަކައިގެ މާބޮޑު މައްސަލައެއް އުޅޭ ކަމަށް ދެކެވަޑައިނުގަންނަވާ ކަމަށް މުއާޒް ވިދާޅުވިއެވެ.
މުއާޒް ވިދާޅުވި ގޮތުގައި މި އަހަރަކީ އެހެން އަހަރުތަކާ ޚިލާފަށް ރާއްޖެއަށް ވަރަށް ހޫނުގަދަ އަހަރެކެވެ. އެހެން އަހަރުތަކުގައި ވެސް ހޫނު މޫސުމުގައި ރާއްޖޭގައި ކަރަންޓު ބިލުތައް ބޮޑުކަން ފާހަގަކުރެވިފައިވާ ކަމަށް އޭނާ ވިދާޅުވިއެވެ.
ހަމައެއާއެކު ކަރަންޓު އިގްތިޞާދުކުރަން ފެނަކައިން ގޭބީސީތަކުގައި ސްމާޓު މީޓަރުތަކެއް ހަރުކުރަން ވަނީ ފަށާފައެވެ. އެ ޕްރޮޖެކްޓުގެ ތެރެއިން ވަރަށް ގިނަ ރަށްރަށުގައި ސްމާޓް މީޓަރަށް ބަދަލު ކުރެވިފައިވާ ކަމަށް މިއަދު އެ ކޯޕަރޭޝަނުން ބުނެފައިވެއެވެ.
މިކަމާ ގުޅިގެން ސްޓެލްކޯގެ މީޑިއާ އޮފިޝަލަކު "ސަން" އަށް ވިދާޅުވީ، މި މަހުގެ ބިލުތައް އައިއިރު ގިނަ ބަޔަކަށް ކުޑަވެފައިވާ ކަމަށެވެ. އަދި ބިލު ބޮޑުވެފައި ވަނީ ވަރަށް މަދު ބަޔަކަށް ކަމަށް އޭނާ ވިދާޅުވިއެވެ.
"ހަތްދިހަ ފަސެންޓަށް ވުރެ ވެސް ގިނަ މީހުންނަށް ބިލުތައް އައިއިރު ހުރީ ކުޑަވެފައި. މަދު ބައެއްގެ ބިލުތައް ބޮޑުވެފައި ހުރީ،" އޭނާ ވިދާޅުވިއެވެ.
ސްޓެލްކޯ އިމާރާތް: އެ ކުންފުނިން ބުނީ ގިނަ ބަޔަކަށް ކަރަންޓު ބިލު ކުޑަވެފައިވާ ކަމަށް -- ފޮޓޯ/ ސްޓެލްކޯ
ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގަތުމަށް ފަހުގައި ވަނީ ރޯދަ މަހު ބޭނުންކުރާ ކަރަންޓާއި ފެނުން ޑިސްކައުންޓު ދޭން ނިންމަވައިފައެވެ. އެގޮތުން، މި އަހަރުގެ މާޗު މަހުގެ ބިލާއި އޭޕްރީލް މަހުގެ ބިލުން ވެސް ވަނީ ޑިސްކައުންޓު ދީފައެވެ.
އެހެންވެ، ޑިސްކައުންޓް ދިން ބިލްތަކާ އަޅައިބަލާއިރު ވެސް، ވޭތުވެ ދިޔަ މަސްތަކުގައި ބިލް ބޮޑުކަން ވަނީ ފާހަގަކުރެވިފައެވެ.
ފާއިތުވީ މަސްތަކުގައި ކަރަންޓު ބިލުތައް ބޮޑުވާތީ އެ މައްސަލަ ހައްލުކޮށްދިނުމަށް ގޮވާލައި ރައްޔިތުންގެ މަޖިލީީހަށް ވެސް ކުއްލި މައްސަލައެއް މިދިޔަ މަހު ހުށަހަޅާފައިވެއެވެ. އެ ކުއްލި މައްސަލައިގައި ވަނީ ސަރުކާރުން ކަރަންޓު ފޯރުކޮށްދޭ ކުންފުނިތައް ކަމަށްވާ ފެނަކައާއި ސްޓެލްކޯގެ ބިލުތައް ބޮޑުވެފައިވާތީ އެކަމާ ރައްޔިތުންގެ ގިނަ ޝަކުވާތަކެއް ހުރިކަން ފާހަގަކޮށްފައެވެ.
މަޖިލިސް މެންބަރުން ވެސް ވަނީ އެކަމުގައި ކަންބޮޑުވުން ފާޅުކޮށް ފުޅާ ދާއިރާއެއްގައި އެކަމަށް ބަހުސްކުރައްވާފައެވެ.
ހަމައެއާއެކު މި މައްސަލާގައި ރައްޔިތުން ވަނީ ސްޓެލްކޯ ކުރިމަތީގައި މީގެ ކުރިން އިހުތިޖާޖުވެސް ކޮށްފައެވެ.
ކަރަންޓު ބިލް ބޮޑުވުމުން ސްޓެލްކޯއަށް ގިނަ ބަޔަކު ފާޑުކިޔުން އަމާޒުވަމުންދާއިރު މި ޚިދުމަތުގެ ކަންކަން ބަލަހައްޓައި ރެގިއުލޭޓްކުރުމުގެ ޒިންމާ އޮންނަ ޔުޓިލިޓީ ރެގިއުލޭޓަރީ އޮތޯރިޓީ އިން މިހާތަނަށް އައިއިރު މި ކަމުގައި އެއްވެސް އެއްޗެއް ބުނެފައެއް ނުވެއެވެ.