ހުޅުމާލޭ ދެވަނަ ފިޔަވަހީގެ ރީތިގަސްމަގު ބްރިޖް ކައިރީ ބަހައްޓާފައި ހުރި ޓްރާންސްފޯމަރަކުން މީހަކު ވައްކަން ކުރަނިކޮށް، އެތަނަށް ދިޔަ ސްޓެލްކޯގެ މުވައްޒަފަކު އެކަން ހުއްޓުވަން އުޅުމުން އެ މުވައްޒަފަށް ހަމަލާދިން މީހާ ފުލުހުންގެ ބެލުމުގެ ދަށަށް ގެންގޮސްފިއެވެ.
މި މައްސަލައާ ގުޅިގެން ފުލުހުންގެ ބެލުމުގެ ދަށަށް ގެންގޮސްފައި ވަނީ ށ. ބިލެއްފަހި ޗަބޭލީގެ އިބްރާހީމް ޛާލިފް (37އ) އެވެ.
މި މީހާ ފުލުހުންގެ ބެލުމުގެ ދަށަށް ގެންގޮސްފައި ވަނީ ރޭ 21:43 ހާއިރުކަމަށް ފުލުހުން ވަނީ މައުލޫމާތު ދީފައެވެ.
މި މައްސަލަ ފުލުހުން ދަނީ އިތުރަށް ތަހުގީގުކުރަމުންއެވެ.
ސްޓެލްކޯގެ މެނޭޖިން ޑިރެކްޓަރު ޙުސައިން ފަހުމީ ރޭ ވިދާޅުވީ، ވައްކަން ކުރަން އުޅުނު ދެ މީހުންގެ ތެރެއިން އެކަކު އަތުލައިގަނެ ފުލުހުންނާ ހަވާލުކޮށްފައިވާ ކަމަށާއި އެކަމުގައި ބައިވެރިވި ދެވަނަ މީހާ ފިލާފައިވާ ކަމަށެވެ.
މީގެ އިތުރުން ފަހުމީ ވިދާޅުވީ ހުޅުމާލޭ ދެވަނަ ފިޔަވަހީގައި ބަހައްޓާފައި ހުރި ޓްރާންސްފޯމަރުތަކަކީ އެ ކުންފުނިން ކުރިއަށް ގެންދިޔަ ޕްރޮޖެކްޓެއްނޫން ކަމުން، އެ ތަންތަނުގައި ސީސީޓީވީ ނެތް ކަމަށެވެ.
އެހެންވެ، މިހާރުގެ އެޗްޑީސީގެ މެނޭޖުމަންޓާ ގުޅިގެން އެ ތަނުގައި ސީސީޓީވީ ބެހެއްޓުުމުގެ މަސައްކަތް ކުރަމުން އަންނަކަން އޭނާ ފާހަގަކުރެއްވިއެވެ.
ޓްރާންސްފޯމަރުތަކުން ވައްކަންކުރުން މިހާރުވަނީ ވަރަށް އާންމު ކަމަކަށް ވެފައެވެ.