ފަލަސްތީނުގެ މިނިވަންކަމަށް މަސައްކަތްކުރާ ހަމާސް ޖަމާއަތުގެ ސިޔާސީ ގޮފީގެ ލީޑަރު އިސްމާއީލް ހަނިއްޔާ ޝަހީދުކޮށްލުން ދިވެހިރާއްޖޭގެ ސަރުކާރުން ކުށްވެރި ކޮށްފިއެވެ.
މިކަމާ ގުޅިގެން ފޮރިން މިނިސްޓްރީން މިއަދު ނެރުނު ބަޔާނެއްގައި ބުނެފައި ވަނީ، ހަނިއްޔާ ޝަހީދުކޮށްލުން ހަރުކަށި އިބާރާތުން ކުށްވެރި ކުރާކަމަށެވެ.
އަދި ރާއްޖޭން މުޅި ދުނިޔެއަށް ގޮވާލަނީ ބައިނަލްއަގްވާމީ ގާނޫނާއި އިންސާނިއްޔަތުގެ ގާނޫނު ނަގަހައްޓާ، ޣައްޒާގެ ރައްޔިތުންނަށް ދާއިމީ ހައްލެއް ހޯދައި ދިނުމަށް ވަގުތުން މަސައްކަތް ކުރުމަށް ކަމަށް މި ބަޔާނުގައި ވެއެވެ.
އިސްމާއީލް ހަނިއްޔާ ޝަހީދުކޮށްލާފައިވަނީ އީރާނުގެ އިންތިޚާބީ ރައީސް މަސްއޫދު ބަޒެޝްކިޔާން ރައީސްކަމުގެ ގާނޫނީ ހުވާކުރެއްވުމަށް ބޭއްވި ރަސްމިއްޔާތުގައި ބައިވެރިވެވަޑައިގަތުމަށް ތެހެރާނަށް ވަޑައިގެން ހުންނަވަނިކޮށެވެ.
ހަނިއްޔާ ވަނީ މިރަސްމިއްޔާތުގައި ބައިވެރިވެވަޑައިގަތުމަށްފަހު އީރާނުގެ ދީނީ މުރުޝިދު އާޔަތުﷲ އަލީ ޚަމަނާއި އާއި ރައީސް މަސްއޫދު ބަޒެޝްކިޔާން އާ ވަކިވަކިން ބައްދަލުކުރައްވާފައެވެ.
އީރާނުގެ ރަސްމީ ޓީވީ ބުނާގޮތުން ހަނިއްޔާ އަވަހާރަކޮށްލާފައިވަނީ އޭނާ ތެހެރާންގައި ހުންނެވި ގެކޮޅަށް އެރި ގޮތްނޭންގޭ ހަމަލާއެއްގައެވެ. މި ހަމަލާދިނީ ވަރަށް ކުޑަ ޑްރޯނަކުންކަމަށް ބައެއް ރިޕޯޓްތައް ބުނާއިރު ހަމަލާދިން ގޮތް ބަލައި ތަހުގީގު ކުރަން ފަށާފައިވާކަން އީރާނުގެ ރިވޮލިއުޝަނަރީ ގާޑުންގެ ލަޝްކަރުތަކުން ވަނީ ހާމަކޮށްފައެވެ.
މިއީ އީރާނުގެ އަމަނާބެހޭ ނިޒާމުގައި ހިމެނޭ ފޯލްޓެއްގެ ސަބަބުން ދިމާވިކަމެއްކަމަށް ވުމަކީ އެކަށީގެންވާ ކަމެއްކަމަށް ވަނީ ބެލެވިފައެވެ. ތެހެރާނުގެ ފުލުހުން ވެސް ވަނީ މި ހާދިސާގެ ތަހުގީގު ފެށިކަން ހާމަކޮށްފައެވެ.
އިސްމާއީލް ހަނިއްޔާ އަވަހާރަކޮށްލުމަށް އިސްރާއީލުން މަސައްކަތް ކުރަމުންގެންދާތާ 15 ވަރަކަށް އަހަރުވެފައިވާއިރު އިސްރާއީލުން ހިންގާ މިފަދަ ޓެރަރިސްޓް ހަރަކާތްތަކަށް އެމެރިކާއާއި އިނގިރޭސިވިލާތްފަދަ ހުޅަނގުގެ އެތައް ގައުމެއްގެ ޖާސޫސީ އިދާރާތަކުން އެހީތެރިވެ އިސްރާއީލަށް ބޭނުންވާ ޖާސޫސީ މައުލޫމާތުތައް ފޯރުކޮށްދޭ ކަމަށް ރިޕޯޓްތައް ބުނެއެވެ.