ޓެލްއަވީވު (31 ޖުލައި 2024) : ފަލަސްތީނުގެ މިނިވަންކަމަށް މަސައްކަތްކުރާ ހަމާސް ޖަމާއަތުގެ ސިޔާސީ ގޮފީގެ ލީޑަރު އިސްމާއީލް ހަނިއްޔާ އަވަހާރަކޮށްލުމަކީ އެފަދަ ނުބައި ނުލަފާ މީހުންގެ މުޑުދާރުކަމުން ދުނިޔެ ސާފުކުރުމަށް ހިންގި ފަޚުރުވެރި އަމަލެއްކަމަށް އިސްރާއީލުން ސިފަކޮށްފިއެވެ.
މަސްޖިދުލްއަގްސާއަށް ގޯނާކުރުންފަދަ ހަރުކަށި ކަންކަމުގައި ހައްދު ފަހަނަޅާފައިވާ ޔަހޫދީ އެއްކަމަށްވާ އިސްރާއީލުގެ ހެރިޓޭޖް މިނިސްޓަރު އަމިހާއި އިލްޔާހޫ ވިދާޅުވީ މިފަދަ މުޑުދާރު މީހުންގެ ހަޑިކަމުން ދުނިޔެ ސާފުކުރަން ޖެހޭ ކަމަށާއި ދުނިޔެ ސާފުކުރުމުގެ މިފަދަ އެތައް އަމަލެއް އަދި ފެނިގެންދާނެ ކަމުގައެވެ.
ހަރުކަށި ޔަހޫދީ އެއްކަމަށްވާ އިލްޔާހޫ ވިދާޅުވިގޮތުގައި އިސްރާއީލާ ދެކޮޅަށް ތެދުވާ ކޮންމެ މީހެއްގެ ނިމުންދާނީ މިގޮތަށެވެ. އިސްރާއީލާ ދެކޮޅަށް ނުކުންނަ ކޮންމެ މީހެއްގެ އަދަބަކީ މަރެވެ. އެފަދަ މީހުން މަރާލެވެން ޖެހޭނެކަމަށް އޭނާ ވިދާޅުވެފައިވެއެވެ.
ފަލަސްތީނުގެ މިނިވަންކަމަށް ޖިހާދުކުރާ ހަމާސް ޖަމާއަތުން ވަނީ އިސްރާއީލުން ދިން ޓެރަރިސްޓް ހަމަލާއެއްގައި އެޖަމާއަތުގެ ސިޔާސީ ގޮފީގެ ވެރިޔާ އިސްމާއީލް ހަނިއްޔާ އިރާނުގައި މިއަދު ޝަހީދުވެފައިވާކަން ކަށަވަރުކޮށްދީފައެވެ.
އިސްމާއީލް ހަނިއްޔާ ޝަހީދުކޮށްލާފައިވަނީ އީރާނުގެ އިންތިޚާބީ ރައީސް މަސްއޫދު ބަޒެޝްކިޔާން ރައީސްކަމުގެ ގާނޫނީ ހުވާކުރުމަށް ބޭއްވި ރަސްމިއްޔާތުގައި ބައިވެރިވެރިވުމަށް ތެހެރާނަށް ވަޑައިގެން ހުންނަވަނިކޮށެވެ.
އިސްމާއީލް ހަނިއްޔާ
ހަނިއްޔާ ވަނީ މިރަސްމިއްޔާތުގައި ބައިވެރިވެވަޑައިގަތުމަށްފަހު އީރާނުގެ ދީނީ މުރުޝިދު އާޔަތުﷲ އަލީ ޚަމަނާއި އާ އަދި ރައީސް މަސްއޫދު ބަޒެޝްކިޔާން އާ ވަކިވަކިން ބައްދަލުކުރައްވާފައެވެ.
އީރާނުގެ ރަސްމީ ޓީވީ ބުނާގޮތުން އިސްމާއީލް ހަނިއްޔާ އަވަހާރަކޮށްލާފައިވަނީ އޭނާ ތެހެރާންގައި ހުންނެވި ގެކޮޅަށް އެރި ގޮތްނޭންގޭ ހަމަލާއެއްގައެވެ. މި ހަމަލާދިނީ ވަރަށް ކުޑަ ޑްރޯނަކުންކަމަށް ބައެއް ރިޕޯޓްތައް ބުނާއިރު ހަމަލާދިން ގޮތް ބަލައި ތަހްގީގު ކުރަން ފަށާފައިވާކަން އީރާނުގެ ރިވޮލިއުޝަނަރީ ގާޑުންގެ ލަޝްކަރުތަކުންވަނީ ހާމަކޮށްފައެވެ.
މިއީ އީރާނުގެ އަމަނާބެހޭ ނިޒާމުގައި ހިމެނޭ ފޯލްޓެއްގެ ސަބަބުން ދިމާވިކަމެއްކަމަށް ވުމަކީ އެކަށީގެންވާ ކަމެއްކަމަށް ވަނީ ބެލެވިފައެވެ. ތެހެރާނުގެ ފުލުހުން ވެސް ވަނީ މި ހާދިސާގެ ތަހުގީގު ފެށިކަން ހާމަކޮށްފައެވެ.
އިސްމާއީލް ހަނިއްޔާ އަވަހާރަކޮށްލުމަށް އިސްރާއީލުން މަސައްކަތް ކުރަމުންގެންދާތާ 15 ވަރަކަށް އަހަރުވެފައިވާއިރު އިސްރާއީލުން ހިންގާ މިފަދަ ޓެރަރިސްޓް ހަރަކާތްތަކަށް އެމެރިކާއާއި އިނގިރޭސިވިލާތްފަދަ ހުޅަނގުގެ އެތައް ގައުމެއްގެ ޖާސޫސީ އިދާރާތަކުން އިންތިހާއަށް އެހީތެރިވެ އިސްރާއީލަށް ބޭނުންވާ ޖާސޫސީ މައުލޫމާތުތައް ފޯރުކޮށްދޭ ކަމަށް ރިޕޯޓްތައް ބުނެއެވެ.
މުހައްލިލުން ވިދާޅުވާގޮތުގައި އިސްރާއީލުން ހިންގާ މިފަދަ ޓެރަރިސްޓް ޙަމަލާތަކުގެ އަޑީގައި ނުފެންނަގޮތަށް އެމެރިކާއާއި އިނގިރޭސިވިލާތްފަދަ ހުޅަނގުގެ އެތައް ގައުމެއްގެ ޖާސޫސީ އިދާރާތައް އޮންނާނެކަމަށް ބެލެވެއެވެ.
މިފަދަ ޓެރަރިސްޓް އަމަލުތައް ހިންގުމަށް ޓެރަރިސްޓުން ރެކްރޫޓް ކުރުމަކީ މިލިޔަނުން ޑޮލަރު ދީގެން އެމެރިކާފަދަ ގައުމުތަކުގެ ޖާސޫސީ އިދާރާތަކަށް ކުރަން މާދަތިކަމަކަށް ނުވާނެކަންވެސް އެ ފަރާތްތަކުން ފާހަގަކުރެއެވެ.
ހުޅަނގުގެ ގައުމުތައް އިސްރާއީލު ލައްވައި މިފަދަ ޖަރީމާތައް ހިންގަނީ އިސްރާއީލަކީ ބާރުގަދަ ގައުމެއްކަން ދުނިޔެއަށް ދެއްކުމުގެ ބޭނުމުގައާއި އިސްރާއީލުގެ އަނިޔާވެރިކަމާއި އިސްތިއުމާރާ ދެކޮޅަށް ޖިހާދުކުރާ ފަރާތްތަކުގެ ނިމުންއަންނާނީ މިގޮތަށްކަން ދައްކައި އިސްރާއީލުގެ ކުރިމަތީގައި އަރަބި މުސްލިމް ލީޑަރުން ކުޑަކަކޫ ޖެއްސުމުގެ ބޭނުމުގައި ކަމަށް މުހައްލިލުން ވިދާޅުވެއެވެ.
އިސްރާއީލުން ފަލަސްތީނުގެ ލީޑަރުން ޝަހީދުކުރި ނަމަވެސް ފަލަސްތީނުގެ މިނިވަންކަމަށްޓަކައި އިސްރާއީލުގެ އަނިޔާވެރިކަމާ އަދި އިސްތިއުމާރާ ދެކޮޅަށް ފަލަސްތީނުން ކުރާ މިނިވަންކަމުގެ ޖިހާދަށް ހުއްޓުމެއް އައިސްފައެއް ނުވެއެވެ. އަދި ފަލަސްތީނުގެ ބިންތައް ހިފައިގެން އޮވެ އިސްރާއީލަށް އަމާންކަން ހާސިލް ކުރެވިފައެއް ނުވެއެވެ. ހަމާސް ބުނާގޮތުން ލީޑަރުން ޝަހީދުކޮށްގެން ފަލަސްތީނުގެ ޖިހާދު ހުއްޓުވޭނެކަމަށް އިސްރާއީލުން ދެކޭ ހުވަފެނަކީ ބިލާހެކެވެ.
ފަލަސްތީނުގެ ކުރީގެ ރައީސް ޔާސިރު އަރަފާތަށް ވިހަލައިގެން އޭނާ ޝަހީދުކޮށްލިކަމުގެ ތުހުމަތުވެސް ކުރެވިފައިވަނީ އިސްރާއީލުގެ މައްޗަށެވެ.
ހަމާސްގެ ފައުންޑަރު ޝައިޚް އަހްމަދު ޔާސީން އަވަހާރަކޮށްލީވެސް އިސްރާއީލުންނެވެ. ފޮރޮޅުލީ ގޮނޑިއެއްގައި އުޅުއްވާ ނުކުޅެދޭ ބޭފުޅެއްކަމަށްވާ އަހްމަދު ޔާސީން އަވަހާރަކޮށްލުމަށް އިސްރާއީލުން ހަމަލާދިނީ އެމެރިކާގައި އުފައްދާފައިވާ އެފް-16 ގެ ފައިޓާ ޖެޓަކުންނެވެ. ޖެޓުން ހަމަލާދީ އޭނާ އަވަހާރަކޮށްލީ އޭނާ ފަތިހު ފަތިސް ނަމާދަށް ވަޑައިގަންނަވަނިކޮށް މަގުމަތިންނެވެ.