އިންޑިއާގައި ހިނގި ބިންގަނޑު ކަނޑައިގެން ދިއުމުގެ ހާދިސާއާ ގުޅިގެން އެ ގައުމުގެ ބޮޑުވަޒީރު ނަރެންދުރަ މޯދީއަށް ރައީސް ޑރ. މުޙައްމަދު މުއިއްޒު ހަމްދަރުދީގެ މެސެޖެއް ފޮނުއްވައިފިއެވެ.
ރައީސުލްޖުމްހޫރިއްޔާގެ މެސެޖުގައި، ބިންގަނޑު ކަނޑައިގެން ދިއުމުގެ ހާދިސާގައި އެ ގައުމުގެ އެތައް ސަތޭކަ ބައެއްގެ ފުރާނަ ގެއްލުނު ޚަބަރާއެކު، ފުން ހިތާމައެއް ލިބިވަޑައިގަތް ކަމަށް ވިދާޅުވިއެވެ.
އަދި އެތައް ބައެއްގެ ފުރާނައާއި ދިރިއުޅުމާއި މުދަލަށް ބޮޑެތި ގެއްލުންތަކެއް ލިބުމަކީ ހިތްޕުޅަށް ގެންނަވަންދަތި ހިތާމަވެރި ހާދިސާއެއްގެ ގޮތުގައި އެ މަނިކުފާނު ވަނީ ސިފަކުރައްވާފައެވެ.
ރައީސްގެ މެސެޖުގައި، ދިވެހި ސަރުކާރާއި، ރައްޔިތުންނާއި، އެމަނިކުފާނުގެ އަމިއްލަ ނަންފުޅުގައި، އިންޑިއާގެ ސަރުކާރަށާއި ރައްޔިތުންނަށް ވަރަށް އިޚްލާސްތެރިކަމާއެކު ވަނީ ހަމްދަރުދީ ފޮނުއްވަވާފައެވެ.
އެ މަނިކުފާނުގެ މެސެޖުގައި މީހުން ސަލާމަތް ކުރުމުގައި އެ ސަރަޙައްދުގައި މިހާރު ކުރިއަށްދާ މަސައްކަތް ކާމިޔާބުކަމާއެކު އަވަސް ފުރުސަތެއްގައި ނިމޭނެ އުންމީދުކުރައްވާކަމަށް ވެސް ވަނީ ވިދާޅުވެފައެވެ.
ރައީސްގެ މެސެޖު ނިންމަވާލައްވާފައިވަނީ މި ހާދިސާގައި އަނިޔާވި ފަރާތްތަކަށް އަވަސް ޝިފާއެއް މިންވަރުކޮށްދެއްވުން އެދި ދުއާ ކުރައްވަމުންނެވެ.
ކެރެލާއަށް މޫސުމީ ވިއްސާރަ ކުރާތާ ދުވަސްތަކެއްވީ ފަހުން ހިނގި ބިންގަނޑު ކަނޑައިގެން ދިޔުމުގެ ހާދިސާގައި އެންމެ ބޮޑަށް ގެއްލުންވެފައިވަނީ ވަޔަނާޑް ޑިސްޓްރިކްޓަށެވެ. އެ ހާދިސާގައި މަރުވި މީހުންގެ އަދަދު ކަށަވަރުވެފައިނުވާއިރު، އެ އަދަދު 160އަށް ވުރެ އިތުރުވާނެ ކަމަށް އެގައުމުގެ މީޑިއާތަކުން ބުންޏެވެ.
އެ ހާދިސާގެ ސަބަބުން ފައިބައިފައިވާ ކިސަޑާއި ވެއްޔާއި ވެއްޓިފައިވާ ގެތަކުގެ ދަށުގައި އެތައް 100 މީހުން ތާށިވެފައިވާ ކަމަށް ބެލެވޭއިރު، ހެލިކަޕްޓަރާއި ޑްރޯން ބޭނުން ކޮށްގެން މީހުން ސަލާމަތްކުރުމުގެ މަސައްކަތްތައް އަންނަނީ ކުރަމުންނެވެ.