މޯލްޑިވްސް މަނިޓަރީ އޮތޯރިޓީގެ ގަވަރުނަރުގެ މަގާމަށް،، އަޙްމަދު މުނައްވަރު, ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު މިއަދު އައްޔަނުކުރައްވައިފިއެވެ.
ގަވަރުނަރުކަމަށް އައްޔަނުކުރެއްވިކަމުގެ ލިޔުން، މުނައްވަރަށް ރައީސުލްޖުމްހޫރިއްޔާ ހަވާލުކުރެއްވީ، އެކަމަށްޓަކައި މިއަދު ހެނދުނު ރައީސުލްޖުމްހޫރިއްޔާގެ އޮފީހުގައި ބޭއްވެވި ހާއްސަ ރަސްމިއްޔާތެއްގައެވެ.
މި ރަސްމިއްޔާތަށްފަހު ރައީސް ވަނީ މުނައްވަރާ ބައްދަލުކުރައްވާފައެވެ.
މި ބައްދަލުކުރެއްވުމުގައި ރައީސުލްޖުމްހޫރިއްޔާ އާއި ގަވަރުނަރު ވަނީ ރާއްޖޭގެ އިޤްތިޞާދީ ޙާލަތާ ގުޅޭގޮތުން މަޝްވަރާ ކުރައްވާފައެވެ. އަދި ފައިނޭންސްގެ ދާއިރާއާއި ގުޅޭ އެހެން މުވައްސަސާތަކާ ގުޅިގެން މަސައްކަތް ކުރެއްވުމަށް ރައީސުލްޖުމްހޫރިއްޔާ ވަނީ ބާރުއަޅުއްވާފައެވެ.
މި ބައްދަލުކުރެއްވުމުގައި ވާހަކަފުޅު ދައްކަވަމުން ގަވަރުނަރު ވިދާޅުވީ ޤައުމުގެ އިޤްތިސާދު ކުރިއެރުވުމަށް ސަރުކާރުން ކުރައްވާ މަސައްކަތްތަކަށް ފުރިހަމައަށް އެއްބާރުލުން ދެއްވާނެ ކަމަށެވެ.
އަޙްމަދު މުނައްވަރު ގަވަރުނަރުގެ މަގާމަށް ހަމަޖެއްސެވުމުގެ ކުރިން 12 ޑިސެންބަރު 2023 އިން 22 ޖުލައި 2024 އާ ހަމަޔަށް ހުންނެވީ ފިނޭންސް މިނިސްޓަރުގެ އެޑްވައިޒަރެއްގެ މަގާމުގައެވެ. އަދި އޭނާ ވަނީ މީގެ ކުރިން މިނިސްޓާ އޮފް ފިނޭންސް އެންޑް ޓްރެރަރީ ކަމުގެ މަގާމުވެސް އަދާކުރައްވާފައެވެ.
މުނައްވަރު ގަވަރުނަރަކަށް އައްޔަން ކުރަން އިއްޔެ ފާސް ކުރީ މަޖިލީހުގައި އެކަމަށް ނެގި ވޯޓްގައި ބައިވެރިވި މެންބަރުންގެ އިއްތިފާގުންނެވެ.
ކުރިން ގަވަރުނަރަކަށް ހުންނެވި އަލީ ހާޝިމް އެ މަގާމުން ވަކި ކުރެއްވީ އޭނާ ރަނގަޅަށް ޒިންމާ އަދާ ނުކުރައްވާކަމަށް ނިންމައި މަޖިލީހުން އެ ލަފާ ރައީސަށް އެރުވުމުންނެވެ.