ޓޫރިޒަމް މިނިސްޓަރު އިބްރާހިމް ފައިސަލް އިންޑިއާގެ ޓޫރިޒަމް މިނިސްޓަރު ޝްރީ ގަޖެންދުރާ ސިންގް ޝެޚަވަތުއާ ބައްދަލުކުރައްވައި، ރާއްޖޭގެ ފަތުރުވެރިކަމުގެ ދާއިރާ އިތުރަށް ފުޅާކުރުމަށް މަޝްވަރާކުރައްވައިފިއެވެ.
ރާއްޖެ ޕްރޮމޯޓްކުރުމަށް އިންޑިއާގެ މުމްބާއި އާއި ބެންގަލޫރުގައި ބާއްވާ ރޯޑްޝޯތަކުގައި ބައިވެރިވެވަޑައިގަތުމަށް ފައިސަލް ވަނީ ހޯމަ ދުވަހު އެގައުމަށް ވަޑައިގެންފައެވެ.
ފައިސަލް ސޯޝަލް މީޑިއާގައި ހިއްސާކުރެއްވި ޕޯސްޓެއްގައި ވިދާޅުވީ ގަޖެންދުރާއާ އެކު ބޭއްވެވި ބައްދަލުވުމުގެ އަމާޒަކީ ދެ ގައުމުގެ މެދުގައި ފަތުރުވެރިކަން އިތުރުކުރެވޭނެ ގޮތްތައް މަޝްވަރާކުރުން ކަމަށެވެ. އެގޮތުން ދެ ގައުމުގެ ފަތުރުވެރިކަމުގެ ދާއިރާ ކުރިއަރުވައި، އެކަމުގައި އެއް ގައުމުން އަނެއް ގައުމަށް އެހީތެރިވެ، މައުލޫމާތު ހިއްސާކުރުމަށް ކުރެވޭނެ ކަންތައްތަކާ ގުޅޭ ގޮތުން މަޝްވަރާކުރި ކަމަށް އޭނާ ވިދާޅުވިއެވެ.
މީގެ އިތުރުން ރާއްޖެއާއި އިންޑިއާ އާ ދެމެދު އޮންނަ ތާރީޚީ ގުޅުން ފާހަގަކުރައްވާ ފައިސަލް ވިދާޅުވީ އިންޑިއާއަކީ ރާއްޖެއަށް ވަރަށް މުހިއްމު ބައިވެރިއެއް ކަމަށެވެ.
ފައިސަލް އިތުރަށް ވިދާޅުވީ އުއްމީދަކީ ދެ ގައުމުގެ މެދުގައި އާ ޕާޓްނާޝިޕްތައް އުފައްދާއި ދަތުރުވެރިންގެ ތަޖުރިބާ މިހާރަށް ވުރެ ރަނގަޅު ކުރުން ކަމަށެވެ.
މީގެ ކުރީ އަހަރުތަކުގައި ރާއްޖޭގެ އެންމެ ބޮޑު މާކެޓުގެ ގޮތުގައި އިންޑިއާ އޮތުމަށް ފަހު، އެގައުމުން އަންނަ ފަތުރުވެރިންގެ އަދަދު މިއަހަރު ވަނީ މަދުވެފައެވެ. އެއީ މި ސަރުކާރުގެ ތިން ނައިބު ވަޒީރުން އިންޑިއާގެ ބޮޑުވަޒީރު ނަރެންދުރަ މޯދީ އާއި އެގައުމުގެ ރައްޔިތުންނަށް ކުޑައިމީސްކޮށް ސޯޝަލް މީޑިއާގައި ޕޯސްޓުތަކެއް ކުރި ފަހުންނެވެ.
އެ މައްސަލައިގައި އިންޑިއާގެ މަޝްހޫރު ފަންނާނުން ހިމެނޭ ގޮތަށް، ރާއްޖެ ބޮއިކޮޓް ކުރުމަށް ގޮވާލައި ބޮޑު ކެމްޕެއިނެއް ކުރިއަށްގެންދިޔައެވެ. ނަމަވެސް އެ މައްސަލަ ހައްލުވެ، ދެ ގައުމުގެ ގުޅުން ރަނގަޅުވެފައިވާ ކަމަށް ސަރުކާރުން ބުނެއެވެ.
އޭގެ ފަހުން ސަރުކާރުން އަންނަނީ އިންޑިއާގައި ރާއްޖޭގެ ފަތުރުވެރިކަން އިޝްތިހާރު ކުރުމަށް ގިނަ މަސައްކަތްތަކެއް ކުރަމުންނެވެ.